Ana Onnavekela wi Akhaleno Mwaana

Mulopwana mmoha a Isarayeli awiichaniwa Elikana aahaathela athiyana apiili: Ana ni Penina, nave owo aanatepa omusivela Ana. Penina aanamuroxa Ana mahiku oothene nthowa nawi Ana haayara nto Penina aanayara. Iyaakha soothene Elikana aanakuxa emusi awe wi yamulapele Muluku elapo ya Silo. Ekwaha emoha eri weiwo, Elikana aahoona wi mwaariye Ana aari oothanana. Owo aamukoha: ‘Ana oninlelani, ohinalyelani, miyaano nkinakhwaana ntoko anamwane khumi?’

Voocharela, Ana aaya ovekela. Owo aahinla amvekelaka Yehova. Owo aapaka nlakano nla: ‘Mwakivaha mwaana a mwaamulopwana, miyaano kinamoovahaani yoowo elukuluku yoothene ya okumi awe.’

Namukucho Eli aamoona Ana inlaka, nave aahuupuwela wi Ana aawunrye eviinyu. Ana aahaakhula: ‘Nkiwunryeru eviinyu, nto miyaano kaaloca vamiithoni va Apwiya ohapaleya waka.’ Eli aahoona wi haalonce phaama nave aamuleela: ‘Muluku a Isarayeli oovahe yeeyo onavekaawe.’ Ana aamaala winla nave aarowa. Ehivinre eyaakha emoha, owo aamuyara mwaana amuchuwa nsina na Samuwele. Apwanne Ana haari oohakalala?

Ana haacuwanle nlakano aapankeiye ni Yehova. Vaavaa Samuwele aacharunweiye waamwa, amannya yaamukeriha mu empa ya Muluku eloca ni namukucho Eli: ‘Ti yoola mwaana kaavekaaka Apwiya. Tiva, miyo tho kinnaavaha Apwiya, wi aalapeleke mahiku oothene a okumi awe.’ Elikana ni Ana yaanamuxekurya Samuwele iyaakha soothene nave yaanamuruuhela soowara ivyaani. Yehova aamvaha Ana anamwane akina athanu—apiili aasithiyana ni araru aasilopwana.