MWAHA 55
Mmiravo Mmoha Onnamurumeela Muluku
MANO kaahi mmiravo ooreera owo? Oniichaniwa Samuwele. Nave mulopwana owo omukuhenrye ntata vamuruni vawe ti Eli, mutokweene a alipa ephepa o Isarayeli. Ninnawoona va atiithinya a Samuwele, Elikana ni amannya, Ana, emuruuhelaka Eli.
Samuwele aarino iyaakha xexe akhweya thanu pahiru. Nyenya owo aaya okhalaka o tabernaakulu a Yehova, ni Eli ni alipa ephepa akina. Mano ntakhara heni Elikana ni Ana yaavelenlaaya Samuwele ari mmiraveene wii amurumeeleke Yehova o tabernaakulu? Hinkoni noone.
Iyaakha vakhaani muchuli, Ana aahithanana vancipale. Nthowa nene naari nawii haarino mwaana, nave aanatchunaxa okhalano mmoha. Nihiku nikina, o tabernaakulu a Yehova, Ana aahivekela: ‘Khwoo Yehova, muhikichuwale miyo! Mwaakivaha mwaana mwaamulopwana, kinnalakana woonnyani wii oorumeeleeni mu okumi awe woothene.’
Yehova aahaakhula nivekelo na Ana, nave owo aahimuyara Samuwele. Ana aanamusivela mwanawe, apacerya omuhusiha vooloca sa Yehova, aryeene mwaamukhaani. Aahi wa aiyawe: ‘Mwawihiihaa Samueli ahiyaru waamwa, kinahaala omukeriha o tabernaakulu, wii amurumeeleke Yehova weiwo.’
Eyo ti yeeyo nnoonaahu Elikana ni Ana yeeraka veerukuni va. Nave nthowa nawii Samuwele aahihusihiwa phaameene ni asitiithi awe, owo anahakalalela omurumeela Yehova m’mukochani mwawe. Elikana ni Ana eyaakha eri yoothene yaanaya olapela m’mukocheene yoola wa vameekhaaya ni oya omoona mwanaya. Nave, eyaakha eri yoothene, Ana anamukuxerya yoowara yahiihaano yoohikhala ni miwono yoopakiwa ti yoowo.
Mu ovira wa iyaakha Samuwele anapwahihera orumela mu tabernaakulu ya Yehova, nave Yehova vamoha ni achweene yaanamusivela yoowo. Anamwane a Eli, Hofeni ni Pinehaasi, yaari atherweene. Yeera ichu soonanara nave yaanaatuunyerya akina wii ehimwiiweleleke Yehova. Eli aanaphwanela waavenxavo vamutekoni weephepa, nyenya owo heenreno.
Mmiravo Samuwele heemerenrye wii ichu soonanara saweeriwa mu tabernaakulu simuhiihe omurumeela Yehova. Nyenya, yaari achu avakhaani yaamusivela Yehova, nave wooviravo elukuluku yincipale ovinyerya vavaa Yehova aalonchiiye ni muchu. Vavaa Samuwele ainuwaliiye yeerenyee tiila:
Samuwele aakona mu tabernaakulu, mummo aaviihiwiiye ni nsu. Owo aahaakhula: ‘Kiri va.’ Aavinya ni ochimaka oya wa Eli, ariki: ‘Mookiichana, nave miyo koorwa mwawaakuveya.’
Nyenya Eli aahaakhula: ‘Nkiwiichanne; hawe wakoneke.’ Hiihaa Samuwele aahikookela vakaamani.
Aahiichaniwatho wanaawiili: ‘Samuwele!’ Owo aahichimakatho oya wa Eli. ‘Apwiya mookiichana, nave miyo koorwa mwawaakuveya.’ Nyenya Eli aahaakhula: ‘Miyo nkiwiichanne mwanaka. Hawe wakoneke.’ Nave Samuwele aahikookela vakaamani.
‘Samuwele!’ nsu nlo naahiichana ekwaha yaneeraru. Samuwele aahichimaka oya wa Eli. ‘Kiri va, nthowa nawii munnaphwanela okhala mukiitchanneene,’ aahi yoowo. Vanonto Eli aanasuwela wii aanaphwanela okhala iichaniweene ti Yehova. Va nthowa nla aahi: ‘Hawe wakone, nave owo awiichanatho onnaphwanela weere wii: ‘Locani Yehova, nthowa nawii murummwaanyu ori awiriyanaka.”’
Eyo ti yeeyo Samuwele aalonchiiye vavaa Yehova amwiichanniiyetho. Vanonto Yehova aahiloca wa Samueli wii aahala omulaka Eli ni anamwanaawe. Hofeni ni Pinehaasi vachuli vaya yaahikhwa mu ekhoco yoowana ni asinaFilisti, ni Eli, vooleeliwa sa eyo, aahuuwela oculi, antaka exiko akhwatho. Hiihaa, masu a Yehova va yahaakhwaniheriwa.
Samuwele aahinnuwa nave aahikhala mulipa oothoriha ookuchulela a Isarayeli. Uluvanleene, achu yaahimveka: ‘Onithanlele hiyo mwene.’ Samuwele haachunne weerano eyo, nthowa nawii Yehova aari chiryene mwenaaya. Nyenya, Yehova aahimulamula wii awiiwelele achwaawo.
1 Samuwele 1:1-28; 2:11-36; 4:16-18; 8:4-9.