Yehova Aari Oopixa Murima ni Yona

Mu epooma emoha ya Asiriya o Ninive, yaakhalawo achu ootakhala. Yehova aamuleela mulipa a miririmu Yona wi aye o Ninive wi aalopole achu etoroke meecelo aya. Nto Yona haachunne oyawo. Owo aanwela mwaaceya ayaaka o Tarsi wi achawe.

Mwaaceya arikimweeca, yaapacerya woopa echeku etokweene, nave achu mmwaaceyani yaapacerya othanana. Yaahaavekela amuluku aya ehisuwelaka echu yaatannyile echeku ele. Vookuchulani Yona aahaaleela: ‘Nthowa ti naaka. Kinwenle pophoro wi kaachawe Apwiya. Mukirihele mmaahini, ephareya enamukhurumuwa.’ Achu hiyaachuna omurihela Yona mmaahini, nto owo aatitelela waaleela. Vaavaa yaamurihenlaaya mmaahini, echeku yaamaala.

Yona uupuwela wi aahaala okhwa. Vaavaa ooneiye aneelaka, owo aavekela nave Yehova aalamulela ehopa etokweene wi emmirye Yona, nto ehopa eyo hiyaamwiiphale. Ari mmirimani mwa ehopa, Yona avekela: ‘Miyaano kinamweera yeele kiroromelinhaaka.’ Yehova aamukhapelela Yona mmirimani mwa ehopa mahiku mararu. Vookuchulani, Yehova aaheeriha wi ehopa emuumule Yona va ehaava.

Woona wi Yehova aamukhapelela Yona, enataphulela wi haki akookele o Ninive? Hooye. Yehova aamuruma Yona ekwaha yanawiili. Nto vano Yona aahiiwelela. Aayawo nave aahaaleela achu ariki: ‘Yavira mahiku 40 Ninive onamutolosiwa.’ Yaaheereya echu Yona ahaaweheryeiye: achu yanwiriyana nave yaacharuwa. Mwene o Ninive aahaaleela achu awe ariki: ‘Muchu ti muchu acharuwe meecelo awe oonanara. Akhweya Muluku onamuhiya weera aachuneiye.’ Vaavaa Yehova onneiye wi Aninive yaacharuwa, owo haatolonxe.

Yona aananariwa ntakhara epooma hiyaatoloxiwe. Wuupuwele ela: Yehova aapixa murima ni Yona ni omweerela epewe, nto Yona haamoriwe ikharari ni Ninive. Moohiyana owo aakiraathi ocai wa epooma va muuruxi wa mwiri aweheryaka. Mwiri owo waanyaala, nave Yona aananariwa. Mwawiihiiha Yehova aamuleela: ‘Weyaano onuukhuwa ni mwiri opwaha wuukhuwa ni achu o Ninive. Kohaamorela ikharari ni kohaahiya.’ Tuuvi ori mwaheene? Achu o Ninive yaari oochuneyaxa opwaha mwiri.