Estere Aavuluxa Nloko Nawe

Estere aari a nloko na Yuteya nave akhala epooma ya Susa o Persiya. Khalai, emusi awe yaakuxiwa o Yerusalemu ti Napukotonosori. Owo aanakhapeleliwa ni munnawe Mortekai, mulapeli a mwene Asuwero o Persiya.

Mwene Asuwero aanachuna okhalano mwaariye muvyaani. Akapuro awe yaamuruuhela athiyana ooreeraxa ophitaanyerya Estere. Mwene aamuthanla Estere wi akhale mwaariye. Mortekai aamuleela Estere wi ahilokohe wi aari Muyuta.

Mulopwana mmoha awiirumiha awiichaniwa Hamani aari muhooleli a asitokweene oothene. Owo aachuna wi achu emukokhoreleke. Nto Mortekai aakhooca omukokhorela, nave Hamani aanyeenyeya anachuna omwiipha. Vaavaa Hamani aasuwenleiye wi Mortekai aari Muyuta, aapaka marehereryo a owiipha Ayuta oothene. Owo aahi wa mwene: ‘Ayuta tawoopiha, nnaphwanela waatoloxa.’ Asuwero aariye: ‘Oweerele yeeyo onakhwelaawe,’ nave aamvaha owerya wa opaka nlamulo. Hamani aapaka nlamulo aaleelaka achu wi ewiiphe Ayuta oothene nihiku 13 na mweeri wa Atar. Yehova iiso oonaka.

Estere haasuwenle nlamulo nlo. Mwawiihiiha Mortekai aamurumihela nlamulo nlo ariki: ‘Oye wa mwene wi oloce ni yoowo.’ Estere aahi: ‘Muchu yoole oneererya ophiya wa mwene, ahiichaniwe, hanakophola. Wa miyaano aavira mahiku 30 kihiichaniwe ti mwene! Nyenya kinamuyawo wa mwene naamwi kiheemereryiwaka nave wakhala okhwa, kinamukhwa.’

Estere aaya wa mwene. Vaavaa mwene aamonneiye, aaviiha ekopo awe ya mivira. Estere aavolonweiye aakohiwa: ‘Estere tiheeni onachunaawe?’ Owo aahaakhula: ‘Kinnoowopaani wi nyuwaano ni Hamani murwe va efesta.’ Eri ofestani, Estere aahaawopa tho wa efesta yanaawiili. Variyari va efesta yanaawiili, mwene aakoha tho: ‘Estere tiheeni onachunaawe?’ Owo aahaakhula: ‘Amwiicani ahu anachuna onitoloxa.’ Mwene aakoha: ‘Taani yaawo uupuwenle echu si yeeyo.’ Owo aahi: ‘Mwiicani ahu ti mutakhali Hamani.’ Asuwero aanyeenyeya nthowa na Hamani okhwela owiipha Ayuta.

Nyenya haavo aawerya omaliha nlamulo, voohikhala mwene. Vano mwene aamuthanla Mortekai wi akhale mutokweene ni aamvaha owerya wi ahelevo nlamulo nivyaani. Mortekai aapaka nlamulo wi Ayuta yiisaakihe. Nihiku na 13 a Atar, Ayuta yaahaavootha amwiicani aya. Ovinyerya elukuluku yeeyo awo yaanuupuwelela ovootha iwo iyaakha soothene.