MWAHA 82
Mordekai Ni Estere
HINKONI nikookele mu iyaakha sawaalikhanyeya muchuli Estra ahaakuvale oya o Yerusalemu. Mordekai ni Estere yaari aIsarayeli oochuneya vancipale mu omwene wa o Persiya. Estere aari mwene mwamuthiyana, nave murokorawe a amannya akina Mordekai aari anaawiili mu omwenoowo vachuli va mwene. Hinkoni noone mummo serelenyaaya.
Asitiithi a Estere yaakhwile owo aryeene mwaamukhaani, mwawihiihaanto Mordekai aahimphuwa. Asuwero, mwene a o Persiya, aahikhala ni nchacho na mwene m’epooma ya Susani, nave Mordekai aari mmoha a arummwaawe. Nihiku nikina, mwaara a mwene, Vasti, haamwiiwelenle, nave mwenoowo aahiya omuthanla mwaariye ahihano ntoko mwene mwamuthiyana. Mano moosuwela wii amuthanlile taani? Aayi, Estere ooreera owo.
Mano munnamoona mulopwana awiirumiha owo yoowo oothene anuuramaaya vamiithoni vawe? Ti Hamani. Aari muchu oochuneya vancipale m’Persiya. Hamani aachunne wii Mordekai, yoowo munamoonaanyu akilaantheene veerikuni va, wii uurametho. Hiihaanto Mordekai huuramme. Hoonne okhala waphaama wuurama vamiithoni va muchu oonanara. Hamani aahinanariwa vancipale nave aahiya weerano mwawiiha.
Hamani aahimuthoriherya mwenoowo sawootha vooloca sa aIsarayeli. ‘Ti achu oonanara, yaawo ahiniiwelela malamulo,’ aahi yoowo. ‘Annaphwanela wiiphiwa.’ Asuwero haasuwela wii mwaariye Estere aari muIsarayeli. Hiihaanto, Hamani aahiiwelela, nave aahipaka nlamulo nawii aIsarayeli yiiphiwe va nihiku nikina.
Mordekai voosuwela sa nlamulo nla, aahikachamiheya vancipale. Aahirumiha oleeliwa Estere: ‘Munnaphwanela muloce ni mwene ni omveka wii anivuluxe.’ M’Persiya, waari ovaanyihana ni nlamulo oya oloca ni mwene ohiichaniwe. Nyenya, Estere aahiyawo ahiichaniwe. Mwenoowo aahimuthoonya ni ekopo awe ya miivira, othoonyerya wii owo haaphwanela wiiphiwa. Estere aahimwiichanela mwenoowo ni Hamani ofestani. Weiwo, mwenoowo aahimukoha Estere wii yookhaviherya taani aachuniiye wa yoowo. Owo aahimuleela wii aahala omuthoriherya eyo wakhala wii owo vamoha ni Hamani aarwatho va efesta ekinatho omeelwaaya.
Vaavanto, Estere aahi wa mwenoowo: ‘Achwaaka vamoha ni miyo nnahaala wiiphiwa.’ Mwenoowo aahinanariwa. Akoha: ‘Mano taani yoowo oneererya weerano yeela?’
‘Muchu, mwiicani, ti Hamani oonanara ola!’ aahi Estere.
Vaavanto, mwenoowo aahinanariwa chiri. Aahilamula wiiphiwa Hamani. Vachuli vaya, mwenoowo aahimweera Mordekai okhala anaawiili mu olamulelo. Mordekai aahipwachanto wii nlamulo nahihano niweemererye aIsarayeli owanela sa okumi aya, va nihiku nenlo yaahaalaaya wiiphiwa. Vookhala owo muchu oochuneya, ancipale yaahaakhaviherya aIsarayeli, nave ala yaahivuluwa wa amwiicani aya.
Liivuru a m’Piipiliyani a Estere.