Yesu Aahusiha Mukhalelo wa Ovekela

Afarisi yaanasiveliwa waatikhiniha akina. Awo yaaneera echu yaphaama pahiru wi achu ewoone. Awo yaanareherya mavekelo nave yaanuuluula yaawo mu asinakooka ni mmakhwaala wi yooniwe taachu. Mwawiihiiha achu yaatikhina vaavaa Yesu aahusinheiye ariki: ‘Mwaavekelaka, muhikhale ntoko Afarisi: mwaachunaka ovekela mvekeleke weephiini. Mmavekeloni mwanyu muhuuluuleke masu ntoko aneeraaya amalapo. Yehova onachuna wi muloceke yeeyo eri mmurimani mwanyu.

‘Mvekeleke mmukhalelo ola: Atiithihu muri wirimu nsina nanyu neelihiwe, Omwene anyu orwe, okhwela wanyu weereye veelaponi hiiha ntoko oneereyaaya wirimu.’ Yesu aahaahusiha tho wi evekeke yoolya ya nihiku, oveka okhurumuweliwa soocheka ni miyaha mikina.

Yesu aahi: ‘Vekakani ni munamvahiwa. Taani mwa nyuwo onamvaha mwanawe nluku avenke ephaawu? Naari oni amvahe enowa aniiha avenke ehopa?’

Voocharela Yesu aathariha mathoweene: ‘Vano nyuwaano moosuwela waavaha aniinyu ichu saphaama, Atiithinyu a wirimu anamutepa osuwela waavaha saphaama yaale anaveka. Echu munaphwanelaanyu weera ori oveka.’ Weyaano onnachariha ekano yeela ya Yesu? Ichu taani weyaano onaromolaawe mu nivekelo?