Yesu Onneeca Vasulu va Maahi

Yesu aanawerya waapenuxa areca ni waaviiha alipa ookhwa, nyenya tho aanawerya olamulela echeku ni epula. Ohiyu omoha amanle ovekela o mwaako, Yesu aakhuruwela o Eniya ya Kalileya nave yaanoopa echeku etokweene. Arummwa awe yaari mmwaaceyani ehooxeyaka ni echeku. Yesu aarwa apacerya weeca vasulu va maahi ayaaka weiwo aariwo mwaaceya. Vaavaa arummwa yaamonnaaya, yaapacerya woova. Nto Yesu aahi: ‘Khurumuwani ti miyaano muhoove.’

Petro aamwaakhula: ‘Waari weyaano pwiya okirume kirwe wa weyaano keecaka vasulu va maahi.’ Yesu aamwaakhula: ‘Rwaaka.’ Petro aacupha mmwaaceyani nave aapacerya weeca vasulu va maahi ayaaka wa Yesu. Amwaacamelaka Yesu, Petro aawenheiye echeku, woova waamurweela nave aapacerya oneela. Petro aakhuwela: ‘Pwiya kivuluxe.’ Yesu ampharela moono ariki: ‘Okhwenleni minikwa, mulopwana we a nroromelo vakhaani?’

Yesu ni Petro yaawela mmwaaceyani nave echeku yaamaala. Arummwa akina yoonne hai? Awo yaahi: “Epariparyene we wa Mwana a Muluku.”

Yesu aapaka yootikhiniha yoolikana ni yeela mweelukuluku ekina. Ekwaha emoha Yesu ni arummwa awe elapuwaka eniya, Yesu aaya okona oculi wa mwaaceya. Akonaka, yaapacerya woopa echeku yakuru. Macumuxa yaanammana mwaaceya, nave maahi yaasareya mmwaaceya. Arummwa yaamviiha Yesu ekhuwelaka: ‘Muhusiha hamunoona wi ninnarimeela? Munivuluxe!’ Yesu aavinya ni aalamulela eniya ariki: ‘Omaale, okhurumuwe.’ Mwawaakuveya, echeku ni macumuxa yaamaala. Yesu aahaakoha arummwa: ‘Nivano hamunaroromela?’ Yaaloca yaawo-yaawo eriki: ‘Taani ola oniiweleliwa ti echeku ni ephareya ene?’ Arummwa yaahuserya wi wakhala wi annamuroromela Yesu moomalela, hiyaaphwanela woova echu.