Yesu Aareeliha Yoolya

Ahaakumve Paskha a 32 E.K., nihiku nimoha arummwa echikaka mmuteko wa olaleerya yaatepa ovelavela. Mwawiihiiha, Yesu aahaaleela wi enwele mwaaceya wi yiichuuwe o Petisaita. Yaacamelaka ophiya okhopela, Yesu aawoona achu ancipale emucharaka. Naamwi Yesu achunaka wiichuuwa ni arummwa awe, owo aawaakhela phaama achu. Aahaapenuxa areca aya nave aapacerya waahusiha. Yesu aamaliha nihiku nanteero aahusihaka Omwene wa Muluku. Wiilalaayavo, arummwa yaarwa wa yoowo eloca: ‘Wenno homakiwewo. Mwaarowihe achu ala wi yiithumele soolya.’

Yesu aahi: ‘Hanaphwanela orowa. Mwaavahe nyuwaano yoolya.’ Arummwa yaamukoha: ‘Munachuna wi nakule yoolya wi naavahe?’ Murummwa Filipi aahi: ‘Hinaano ikhorowa sincipale wi saakhwane wa achu oothene yaala.’

Yesu aahaakoha: ‘Tiheeni muryaanyuno?’ Antreya aahaakhula: ‘Nrino pahi iphaawu thanu ni ihopa piili, nto henaakhwana echu.’ Yesu aahi: “Ruhani!” Aahaaleela achu wi ekiraathe va manaxi mmakhuuru a achu 100 naari 50. Yesu aakuxa iphaawu ni ihopa, aaweha wirimu ni aavekela. Voocharela aahaakawela arummwa nave arummwa yaahaakawela achu oothene. Alopwanaru 5.000 vamoha ni athiyana ni anamwane yaalya evona. Yaamanlaaya, arummwa yaathukumanya yoolya yaahalenle wi ehiyeleele echu. Soohalela iho saasareya micanka 12! Eyo yaari echu yootikhiniha, tahi yeeyo?

Achu yaatepa otikhina ophiyerya enachuna omweera Yesu mwene. Nyenya Yesu aanasuwela wi hiyaaphiyale elukuluku wi Yehova amweere mwene. Aahaarowiha achu nave aahaaleela arummwa awe wi eye makupa makina a Eniya ya Kalileya. Awo yaavolowa mmwaaceya nto Yesu aakele o mwaako mukhateiye. Ntakhara heeni? Owo achuna ovekela wa Tiithi awe. Naamwi akhalaka ooweiwa, Yesu anaavya elukuluku wi avekele.