Onnaavakulela Achu Ancipale Moorweela wa Ipau ni Ihopa Vakhaani

Oomuchara 12 a Yesu yaatepa ohakalala nthowa na olaleerya mmiceche sa o Kalileya, nave yaamutharihela Yesu “sothene yahusin’haya ni yenraya.” Mweevelevelo awo yaatepa okoma, woona wi hiyaarino elukuluku ya wiichuuwa naari olya nthowa na achu ancipale yaarwa ni yaarowa. Mwawiihiiha Yesu onnaloca: “Murwe wiphini, nipuro nawipitheya ni mwitxhuwe vakhani.”—Marko 6:30, 31.

Awo annanwela mwaaceya, akhweya waacamela o Kafarnau, nave annacimula eyaaka makupa onakhumawo nsuwa a Muhice Yortano elapo ya Petisaita. Nyenya, achu ancipale annawoona epwahaka, nave akina annasuwela weiwo awo anayaayawo. Vanonto oothene annachimaka nave tanapacerya ophiya awo ehiphin’ye.

Ekhumaka mmwaaceyani, Yesu onnoona muloko wa achu yaawo ari ntoko ipucepuche sihirino mukukhuli. Nave owo onnapacerya “wahusiha itxhu sintxipale” vooloca sa Omwene. (Marko 6:34) Owo tho onnaapenuxa yaale “awitxeliwa.” (Luka 9:11) Vaava Yavimraaya elukuluku yincipale, oohuserya yaalocano: “Wenno homakiwewo nave onnila. Warowihe atxhu ala wi yithumele solya.”—Mateu 14:15.

Yesu aahaakhula: “Hanapwanela orowa. Mwavahe nyuwo yolya.” (Mateu 14:16) Naamwi Yesu asuwelaka yeeyo onahaaleiye weera, onnamweemererya Filipi nnikoho nla: “Nnaya okula wowi iphau wi atxhu othene ala elye?” Filipi tonaphwanela waakhula, woona wi ayariwe makupa yaale o Petisaita. Naamwi hiiha, othuma ipau hasinahaala waakhwaniwa. Ariwo alopwana 5.000. Nave wakhala wi ahaalakhanyeryiwa athiyana ni anamwane, nunturu nla akhweya nnahaala waaceereryeya ikwaha piili! Filipi onnaakhula: “Iphau sa idenáryo masana meli ti seni, [etenaariyu emoha yaari nlivelo na muteko wa nihiku nanteero] wi atxhu othene ala elye vakhani mano?”—Yohani 6:5-7.

Achunaka wooniherya wi hori wooweryeya waavakulela achu oothene, Antreya onnaaceererya: “Òkhalavo mmiravo orino iphau thanu ni ihopa pili; nto yeyo ti seni wa atxhu ala antxipale?”—Yohani 6:9.

Woona wi yaari elukuluku ya ephovo, ahaakumve Paskha mu 32 E.K., manaxi yaaphuwela ehuruwela echaya. Yesu ahaaruma oohuserya awe wi yaaleele achu wi ekilaathi, epake makhuuru a achu 50 naari 100. Owo onnakuxa ipau thanu vamoha ni ihopa piili nave amveka Muluku wi areelihe. Nave voocharela onnakawanya ipau vamoha ni ihopa. Yesu onnaannya oohuserya awe ipau ni ihopa ihe wi yaakawele achu. Mootikhiniha, achu oothene annalya ophiyerya ovona!

Emanle olya, Yesu onnaaleela oohuserya awe: “Mutxotxele mapatuso ahanle, wi ehikhale eni erimele.” (Yohani 6:12) Awo yaacocela soohalela ophiyerya saakhwana micanka khumi napiili!