MWAHA 93
Yesu Onnaalyiha Achu Ancipale
YOHEEREYA echu yawoopiha. Yohane Mpatisi ohiiphiwa. Herodiya, mwaara a mwene, haamuchuna yoowo. Nave owo aahiwerya weeriha wii mwenoowo alamulele othikiliwa wa muru wa Yohane.
Vavaa Yesu aasuwenliiye sa eyo, aahithanana vancipale. Aahirowa o nipuroni vamekhiye. Nyenya achwaawo yaahimuchara. Yesu vawoona muloko wa achu owo, aamorela yoowo ikharari. Va nthowa nla, aalocano sa omwene wa Muluku nave aahipenuxa awiicheliwaaya.
Oxekuwaaya, oohuseryawe yaahirwa wa yoowo nave yaahi: ‘Wohiilavo, nave nipuro nla ti na’takhwa. Leelani miloko eyo ya achu erowe, wii eye withumela mekhaaya yoolya, mmicecheni yawachamanano.’
‘Yaawo hiyaanono nthowa norowela,’ aahaakhula Yesu. ‘Avaheni nyuwo yaawo yoolya.’ Voorukunuwela wa Filipo, Yesu aahikoha: ‘Mano nni nthume woowi yoolya ntakhara a achu oothene ala?’
‘Onahaala ochuneleya ikhorowa sincipale, wii nthume yincipale yawii oothene ephwanye vakhaani,’ aahaakhula Filipo. Andreya aahi: ‘Mmiravo ola onatexa yolyaahu, orinono iphaawu thanu ni asihopa eeli, nyenya iha hisakwanelaru mano vakhaani wa achu ancipale awihiihaa.’
‘Akilathiheni achu awo va manaxi,’ aahi Yesu. Ovinyerya vavaa, aahimuthamala Muluku ntakhara a yoolya, nave aakawela mu inyenyeri. Vaavanto oohuseryaawo yaahivahererya ephaawu ni asihopa awo wa achu oothene awo. Yaarivo alopwana 5,000, ni athiyana ni anamwane masana masaneene. Oothene yaholya mwawaakhwanela. Nave vavaa oohuseryaawo yaakhumpaaya sohala, yaasarya makali khumi na meeli!
Yesu aahilamulanto oohuseryaawo ovolowa mmwaaceyani wii elapuwe Eniya ya Galileya. Ohiyu weene yoowo, wahikhalavo echeku etokotoko, nave machumuxa yaamumvonya mwaceyoowo oyano nno ni nno. Oohuseryaawo yahoova vancipale. Ovinyerya vavaa, ohiyu eriyari, yaahimoona muchu echaka vasulu va maahi. Yaakhuwela mwa woova, ntakhara hiyaasuwela wii yaari eheni.
‘Muhoove,’ aahi Yesu. ‘Ti miva!’ Awo hiyeemerenryeru. Petro aahiinto: ‘Apwiya, mwari ti nyuwo chiri, kemereryeni kirwe wa nyuwo va maahini.’ Yesu aahaakhula: ‘Rwa!’ Nave Petro aakhuruwa mmwaceyani nave aaheecha vasulu va maahi! Vanonto aahoova nave aahipacerya oneela, nyenya Yesu aahimvuluxa.
Vachuli vaya, Yesu aahaalyihatho achu masana masaneene. Mu ekwaha ela, eenreno ni iphaawu thanu napiili ni asihopa awi akavi. Nave, yaahaakhwanelatho oothene. Mano hiwari wotikiniha mummo Yesu aathokororyeliiye achu? Mu olamulelo awe, hinrwaru nthoiwa echu!
Mateyu 14:1-32; 15:29-38; Yohane 6:1-21.