MWAHA 25
Tiheeni Muluku Onachuneiye wa Hiyaano?
Piipiliya onneemererya wi wa achu, mahiku a okumi aya “tavakhaani ni awuukhuwa.” (Yobi 14:1) Apwanne okumi ene ti yoola Muluku onachuneiye wa hiyaano? Yaahiri yeeyo, tiivi eri yoochuna awe wa hiyaano? Apwanne yoochuna awe enahaala waakhwanela? Moone maakhulo oohakararya a Mpiipiliyani.
1. Okumi wa mukhalelo taani Yehova onachuneiye wa hiyaano?
Yehova onachuna wi nikhaleno okumi waphaamaxa. Vaavaa owo aapatunxeiye achu oopacerya, Atamu ni Eva, aahaakuha mu parataiso ooreera, emaca ya Eteni. “Muluku aahaareeliha ii: ‘Murelanesha, musareye elapo yavathi nave muhooleleke.’” (Maphatxuwelo 1:28) Yehova aachuna wi awo ekhaleno anamwane, epake elapo yoothene okhala Parataiso, ni waakhapelela axinama. Yoochuna awe yaari wi achu oothene epuhe ekumi yoophaameya ni okhala wookhala.
Naamwi ichu inananre,a yoochuna ya Muluku hetoroken’ye. (Isaiya 46:10, 11) Owo nlelo onachuna wi achu awiiwelela ekhale okhala wookhala mmikhalelo soophaameya.—Mwaalakhanye Wupulula 21:3, 4.
2. Nni niwerye hai opuha okumi woohakalaliha hiihaano?
Yehova onipatunse ni nchuno na ohooleliwa ni yoowo. Ti nthowa nene nryaahuno nchuno na omusuwela ni omulapela yoowo. (Mwaalakhanye Mateu 5:3-6.) Owo onachuna wi nikhaleno onthamwene wawaacameleya ni yoowo, ‘ochara iphiro sawe, omukhwela yoowo,’ ni omurumeela yoowo “ni murima [ahu] woothene.” (Malamulo 10:12; Salumu 25:14) Neerano hiiha, nnanwerya okhalano ohakalala weeparipari naamwi nrino makacamiho. Omulapa Yehova onnanivaha okumi woohakalaliha ni weeparipari, woona wi nnakhala mmukhalelo owo onachuneiye.
OHUSERYA MWAWIISEELA
Muhuserye osivela otokweene Yehova oonihenryeiye vaavaa aarehereryeiye elapo ntakhara hiyo ni yeeyo Masu awe anahusihaaya vooloca sa yoolakelela ya okumi.
3. Yehova onachuna wi achu ekhaleno okumi waphaamaxa
Moone EXILEMA, nave muthokororye nikoho nnacharela.
Ntakhara heeni Muluku opatunxeiye elapo ahu yooreera?
Mwaalakhanye Eklesiyaste 3:11, nave voocharela muthokororye nikoho nla:
Ela enoohusihaani eheeni vooloca sa Yehova?
4. Yoochuna ya Yehova hetoroken’ye
Mwaalakhanye Salumu 37:11, 29 ni Isaiya 55:11, nave voocharela muthokororye nikoho nla:
Nnasuwela hai wi yoochuna ya Yehova ntakhara hiyo hetoroken’ye?
Empa yeeyo enananre nave ehinathokororyiwa enanwerya orehereryiwa. Moolikana, elapo yavathi yeeyo ehinathokororyiwa ni achu, enahaala orehereryiwa ni Muluku ntakhara achu yaale anamusivela
5. Omulapela Yehova onnanivaha ekumi yeeparipari
Osuwela yoolakelela ya okumi enanwerya onruuhela ohakalala. Moone EXILEMA, nave muthokororye nikoho nnacharela.
Ti mwawiihai okumi wa Terumi waatoroken’yaaya amanle ohuserya yoolakelela ya okumi?
Mwaalakhanye Eklesiyaste 12:13, nave voocharela muthokororye nikoho nla:
Woona wi Yehova oopaka sincipale ntakhara hiyo, tiheeni nnaphwanelaahu weera wi nimukookiherye yoowo?
ACHU AKINA ANANWERYA OKOHA: “Tiivi eri yoolakelela ya okumi?”
Mwaahaala waakhula hai?
MUKWASU
Yehova onachuna wi nipuhe okumi mmikhalelo soophaameya veelaponi yeela yavathi. Vaavaa nnamulapaahu yoowo ni murima ahu woothene, okumi ahu onnakhalano yootaphulela yeeparipari—naamwi hiihaano.
Makoho awuuluulela
Tiheeni Yehova aachuneiye wa Atamu ni Eva?
Nnasuwela hai wi yookhwela ya Muluku ntakhara achu hetoroken’ye?
Muni mphwanye hai okumi orino yootaphulela yeeparipari?
OTHOLATHOLA
Muhuserye ntakhara heeni nnaroromelaahu wi emaca ya Eteni yaahikhala chiryene.
“O jardim do Éden—mito ou fato?” (A Sentinela, 1.º de janeiro de 2011)
Muhuserye ntakhara heeni nnaroromelaahu wi elapo yavathi enahaala wiikhalelaru okhala wookhala.
Muthokororye yeeyo Piipiliya onaloceiye vooloca sa ophwanya okumi waphaama.
Moone ti mwawiihai mulopwana mmoha uupuwela wi ookhalano ichu soothene aaphwannyeiye yeeyo yaamuhalela mookumini mwawe.
a Mmwaha onacharela, munahaala ohuserya tiheeni enananre.