WAAPAKA OOHUSERYA
YOOHUSERYA 10
Okhala Oolakelela
Nlakiheryo: “Naalakelela ohiya pahiru wooleelaani michaka saphaama sa Muluku, nyenya tho wiivaha hiyo aneene wa nyuwo ntakhara naatepa woosivelaani.”—1 Ate. 2:8.
Tiheeni Yesu Opankeiye?
1. Moone EXILEMA, naari mwaalakhanye Yohani 3:1, 2. Voocharela, mwaakhule makoho anacharela:
Ntakhara heeni Nikotemu aathanlileiye wi Yesu amuxekurye ohiyu?—Mmoone Yohani 12:42, 43.
Yesu aahivaanela ni Nikotemu ohiyu. Ti mwawiihai eyo enooniheryaaya wi aari oolakelela ntakhara muteko wa waapaka oohuserya?
Tiheeni Nnahuseryaahu Orweela wa Yesu?
2. Ninnooniherya osivela wa achu vaavaa nnakhalaahu oolakelela waakhaviherya yaawo okhala oohuserya.
Mmutakiherye Yesu
3. Mweeciheke yoohuserya va nipuro ni elukuluku eni ekhale yoophwanelela wa oohuserya. Owo akhweya onamulakelela ohuserya mu nihiku ni elukuluku vyakala. Ti woowi onahaaleiye wiisoona okhala ootaphuwa wi ahuserye: Omutekoni, vaate vawe, naari mmapuro makina a vanlakani? Mwawaakuveya, mpake matorokelo a yoochariha anyu wi mwiikhovelelihe ni soothowa sa oohuserya.
4. Muhuseryeke moohihiyererya. Wakhala wi munahaala opwahavo, muhikwatelele yoohuserya. Ohiya yeeyo, muupuwele ela:
Apwanne mwanwerya weeciha yoohuserya eyo nihiku nikina na esumana yeeyo?
Apwanne mwanwerya weeciha yoohuserya eyo mumpharihelaka telefoni naari videoconferência?
Apwanne mwanwerya omveka mulaleeryi mukina wi eecihe yoohuserya?
5. Mvekele mvekaka wi mukhaleno moonelo woophwanelela. Mumveke Yehova wi muhivelavele ni oohuserya anyu naamwi owo ahihuseryaka moohihiyererya, naari wakhala wi onnalekela opharihela yeeyo onahuseryeiye. (Afi. 2:13) Ti yawooneya wi oohuserya anyu ookhalano mikhalelo mincipale saphaama. Mvekele wa Yehova wi ookhaviheryeeni otikitheryeya wa mikhalelo seiyo saphaama oreiyeno.