Mpharihele Masu a Muluku Awo Makumi!

“Masu a Muluku ari makumi, ni awupa.”​—AHE. 4:12.

TIHEENI MUNUUPUWELAANYU?

Tiheeni enahaala ocicimiherya sooloca sahu mu orummwa?

Itrataato sahu inaniwopa hai wi nimpharihele Piipiliya va ochekula woopacerya ni mu sooxekurya?

Nnii ntakiherye hai moonelo wa Paulo vaavaa nnarehereryaahu orummwa?

1, 2. Muteko taani Yehova aamvanheiye Moose, nave yoororomeliha taani Owo aavanheiye?

MUNNAWERYA waanyiherya moonelo anyu waakhanle wi muri vamiithoni va mulamuleli akuruxa veelaponi yavathi wi muloceno sa owaakiha achu a Yehova? Akhweya mwahaala wuukhuwa, wiisoona okhala oohiphwanelela, ni awoova. Mwahaala orehererya hai sooloca sanyu? Tiheeni mwaahaalaanyu weera wi mucicimiherye masu anyu ntoko murummwa a Muluku akuru?

² Chiri Moose aari mmukhalelo yoola. Yehova aaloca wi, “àri awiyeviha wapwaha atxhu othene yàri mw’elapo ya vathi,” vano aahirummwa wi aye wa Farawo wi awoopole achu a Muluku mu ohooxiwani ni okapuro mu Yiikuputu. (Namarepela 12:3, BNM.) Saweereya saahaala wooniherya wi Farawo aari mulopwana oohikala ncicimiho ni awiirumiha. (Muk. 5:1, 2) Nyenya, Yehova aachuna wi Moose amuleele Farawo wi aahiye akapuro awe macikhweene ekhume mu elapo awe! Mwawiiweya, Moose aamukoha Yehova: “Miyano kàni wi kiye wa mwene Farawo, w’Egipitu ni wi kàvìhewo atxhu a nloko na Isarayele?” Moose iisoona okhala oohiphwanelela. Nyenya Muluku aamuroromeliha wi Moose hi akhale meekheiye. Yehova aahi: “Miyano kinamukhala ni weyano!”​—Muk. 3:9-12, BNM.

3, 4. (a) Tiheeni Moose ooveiye? (b) Mmukhalelo taani nyuwo mwaahaalaanyu wiilikanyiha ni nikacamiho Moose aakumanneiyeno?

³ Tiheeni Moose ooveiye? Mwawooneya, Moose aanoova wi Farawo hi amwaakhele naari onwiriyana murummwa a Yehova Muluku. Moose aanoova tho wi achu awe hiyi yeemererye wi Yehova aamuthanla wi aahoolele yaawo okhuma o Yiikuputu. Mwawiihiiha, Moose aaloca ni Yehova: “Atxhu a Isarayele hekemereryà hekiwiriyanà; ntakhara anaya wi: ‘Tahi eparipari wi [Yehova] àhìsòneiha wa weyano.’”​—Muk. 3:15-18; 4:1, BNM.

⁴ Naakhulo na Yehova wa Moose ni saweereya saya sinnawerya onihusiha oothene ahu echu yawuupa. Mweeparipari, nyuwo akhweya hamurwa mukhala vamiithoni va mulamuleli a vasulu. Apwanne montoko woona okhala woovila oloca sa Muluku ni Omwene awe wa achu pure, munaaphwanyaanyu nihiku nnihiku? Wakhala wi aai, muthokororye yeeyo munaweryaanyu ohuserya moorweela wa yaweereya ya Moose.

“TI SENI ORYAWENO MMATANI?”

5. Tiheeni Yehova aahenleiye mmatani mwa Moose, nave eyo yaavoonthe hai woova wawe? (Moone eruku yoopacerya.)

⁵ Vaavaa Moose oonihenreiye woova wawe wi masu awe hiyi eroromeliwe, Muluku aamureherya owo ovootha sa muhoolo. Mwaha ori mu Mukwaha onnaloca: “Apwiya yàlotxa [ni Mose]: ‘Ti seni oryaweno mmatani?’ Mose àhàkhula: ‘Ekopo.’ Apwiya yàmulamula: ‘Orihele vathi ekopo eyo!’ Mose àrihela vathi, nave ekopo yàthatuwa enowa: vanonto Mose àtxhawa òtuthuwa ene. Nto Apwiya yàmulamula wiliwìli, eriki: ‘Wòkole ntata ni ophare yeyo mwìla!’ Mose àhokola ntata ni àphara enowa ele: mmatani mwawe enowa yathatuwa ekopo. Nave Apwiya yàlotxa ni Mose: ‘Hiha anamwèmererya wi Apwiya . . . , àhìsòneiha wa weyano.’” (Muk. 4:2-5, BNM.) Aai, Muluku aahela mmatani mwa Moose echu yaahaala wooniherya wi muchaka awe waarweela wa Yehova. Yeeyo yooneya ni akina ntoko ekopo pahiru yaathatuwa ekhalano okumi moorweela wa ikuru sa Muluku! Chiri yootikhiniha yeela yaahaala ocicimiherya masu a Moose, yooniheryaka moomalela wi Moose aakhalano nikhaviheryo na Yehova! Nto, Yehova aamuleela Moose: “Okuse ekopo à; ekopo yeyo muteko aya onaya okhala werano ineneryo sòtikhiniha.” (Muk. 4:17, BNM.) Ni yawooniherya yeela ya olamulelo wa Muluku mmatani mwawe, Moose aanwerya ocimula ni ororomela wi aamweemelela Muluku eeparipari vamiithoni va achu awe ni vamiithoni va Farawo.​—Muk. 4:29-31; 7:8-13.

6. (a) Tiheeni enaphwanela okhala mmatani mwahu naalaleeryaka, nave ntakhara heeni? (b) Tharihani mummo ‘masu a Muluku aryaaya makumi ni awupa.’

⁶ Hiyaano nnawerya opakeliwa nikoho nimohamoha vaavaa nnayaahu wuuka muchaka wa Piipiliya ni akina: “Ti seni oryaweno mmatani?” Ikwaha sincipale, Piipiliya onahaala okhala mmatani mwahu, wi nimpharihele muteko. Naamwi akina anamoona Piipiliya ntoko liivuru pahiru, Yehova onnaloca ni hiyo moorweela wa Masu awe ooveereliwa oorempwa. (2 Pet. 1:21) Awo aakhalano soororomeliha sa Muluku vooloca sa ichu seiho inahaala weereya mu olamulela wa Omwene awe. Ti nthowa nene murummwa Paulo aawerya orepa: “Masu a Muluku ari makumi, ni awupa.” (Mwaalakhanye Ahebri 4:12.) Soororomeliha soothene sa Yehova ti sawuupa, ohiya soomaala, ntakhara owo onnatitelela weeravo echu wi seereye. (Yes. 46:10; 55:11) Muchu asuwela yeela vooloca sa Masu a Yehova, yeeyo onaalakhanyeiye Mpiipiliyani ennawerya ovolowela okumi awe mwawuupa.

7. Nnii niwerye hai ‘oluluwano phaama masu éparipari’?

⁷ Aai, Yehova oohela mmatani mwahu Masu awe makumi oorempwa yaawo nnaweryaahu wooniherya wi muchaka ahu ti woororomeleya ni onarweela wa Muluku. Hinnakhwa minikwa wi, amanle waarepela Aheepiri, Paulo aamuceenyerya mmiravo awe oomunepani Timoteo wi ‘akhaleno mvai wi aluluwelano phama masu éparipari.’ (2 Tim. 2:15) Nnii niwerye hai opharihela ekano ya Paulo? Moorweela wa waalakhanya moovuwa soorempwa ithanliwe phaama seiyo inahaala otannya mirima sa alipa oowiriyana ahu. Itrataato ivonyiwe mu 2013 ipakiwe wi inikhaviherye weerano yeeyo.

MWAALAKHANYE SOOREMPWA ITHANLIWE PHAAMA!

8. Tiheeni ooweherya mmoha aalonceiye sa itrataato?

⁸ Itrataato soothene ivyaani irino mapakeliwo mamohamoha. Mwawiihiiha nasuwela opharihela emoha, nnanwerya opharihela soothene. Apwanne iho ti sookhweya opharihela? Ooweherya mmoha o Hawaii, E.U.A., oorepa: “Hinaasuwela wi ikaruma seiya ivyaani sahaala okhala sa mphurelo mmuteko wa empa ni empa ni onamoona wa vanlakani.” Owo aahoona wi mukhalelo wa itrataato iha onnaweeriha achu waakuvela waakhulela, nave wiiliwiili sinnakhaviherya ovaanela. Owo onoona wi eneereya hiihaa nthowa na nikoho ni maakhulo oothanla yaawo ari ohoolo wa itrataato. Namakhala hanoovelela ovaha naakhulo nooheseya.

9, 10. (a) Itrataato sahu inaniwopa hai ompharihela Piipiliya? (b) Itrataato taani munapharihelaanyu ni mphurelo waphaamaxa, nave ntakhara heeni?

⁹ Etrataato eri yoothene ennaniwopa waalakhanya yoorempwa ethanliwe phaama. Ntoko yootakiherya, mvarerye etrataato Makacamiho Anahaala Omala? Moohipwacha wakhala wi namakhala othanlile “aayi,” “hooye,” naari “akhweya” aakhulaka nikoho nenlo, mukhunule mpuwa nave muhaaceererye echu ekina, muloce, “Moone, Piipiliya oni.” Mwamala mwaalakhanye Yawupulula 21:3, 4.

¹⁰ Moolikana, vaavaa munapharihelaanyu etrataato Munamoona Hai Piipiliya? moohipwacha naakhulo namakhala onahaaleiye othanla, mukhunule mpuwa nave muloce, “Piipiliya oni ‘sorempwa sothene sávereliwe ti Muluku.’” Nyuwo munanwerya waaceererya, “Chiri, nikupa nenlo ninnaloca sincipale.” Voocharela mmuhule Piipiliya anyu, nave mwaalakhanye 2 Timoteo 3:16, 17.

11, 12. (a) Ohakalala taani munapuhaanyu mu orummwa? (b) Itrataato inawerya wookhaviheryaani hai orehererya sooxekurya?

¹¹ Waakhulela wa namakhala onahaala wooniherya ophiyerya woowi munahaalaanyu waalakhanya ni othokororya itrataato. Mmukhalelo ori woothene, ohiya ohela itrataato mmatani mwa achu, munahaala ohakalala waalakhanya Masu a Muluku ni yaawo​—naamwi mwaalakhannye everso emoha naari piili va ochekula woopacerya. Ohoolo, munahaala otitelela othokororya.

¹² Oculi wa etrataato eri yoothene nookhalawo nikoho vathi va muru “Wi Muupuwele” ni soorempwa seiyo sinaphwanela othokororyiwa va yooxekurya. Mu etrataato Munoona Hai Omwaahiyu? nikoho na oxekurya onacharela ti “Muluku onahaala otoroka hai elapo ahu wi ekhale phaama?” Mateyu 6:9, 10 ni Taniyeli 2:44 sooromoliwa. Wa etrataato Alipa Ookhwa Anamukookela Okhala Akumi Chiryene? nikoho ti: “Ntakhara heeni nnuuluvalaahu ni okhwa?” Mapacereryo 3:17-19 ni Aroma 5:12 sooromoliwa.

13. Tharihani mukhalelo wa opharihela itrataato wi nipaceryihe soohuserya sa Piipiliya.

¹³ Mpharihele itrataato ntoko nikhaviheryo na opaceryiha soohuserya sa Piipiliya. Vaavaa muchu onaphariheleiye ekootiku QR oculi wa etrataato, owo onahaala ohooleliwa echu mu Site ahu enahaala omulipiha wi amuhuserye Piipiliya. Itrataato sinnavuwiha tho eproxura Michaka Yaphaama Yoorweela wa Muluku! nave ennathoonyerya yoohuserya aya. Ntoko ntakiheryo, etrataato Taani Onachonka Elapo Chiryene? enathoonyerya yoohuserya 5 ya eproxura yeela. Etrataato Tiivi Eri Yoohulela ya Okumi wa Echoko Yoohakalala? enathoonyerya yoohuserya 9. Moorweela wa opharihela itrataato mmukhalelo yoola, nyuwo munahaala ochara yookhovelela yaphaama ya ompharihela Piipiliya va ochekula woopacerya ni mu sooxekurya. Ela enahaala okhaviherya opaceryiha soohuserya sincipale. Echu taani ekina munaweryaanyu weera wi mpharihele phaama Masu a Muluku mu orummwa wanyu?

MUTHOKORORYE MWAHA ONAWUUKHULA ACHU

14, 15. Munii nwerye hai otakiherya moonelo wa Paulo mu orummwa?

¹⁴ Paulo aakhalano nchuno na waaleela achu ancipale yaweereya mu orummwa. (Mwaalakhanye 1 Akorinto 9:19-23.) Moone wi Paulo aaweherya ‘waphwanya aYuda . . . , waphwanya yawo eniwelela malamulo . . . , waphwanya yawo ahinono nlamulo . . . , waphwanya alipa-ochétcheya.’ Aai, owo aachuna waaphiyerya ‘atchu othene, wi vothe vene [owo] avulushe akina.’ (Saw. 20:21) Nnii niwerye hai otakiherya moonelo wa Paulo vaavaa nniirehereryaahu wi nuuke eparipari ni “achu othene” mu orummwa wahu?​—1 Tim. 2:3, 4.

¹⁵ Miruku sa mapaceryiho sinnaphwanyeya mu Orummwa Wahu wa Omwene mweeri ti mweeri. Mweererye seiyo. Nyenya wakhala wi miyaha mikina sinnawuukhula achu mu ekulucu anyu, mpake mapaceryiho ooreera aniiwanana ni soothowa seiyo. Muupuwele mukhalelo wa weiwo munakhalaanyuwo, vooloca sa achu akina anakhala weiwo, ni yeeyo enawuukhula vancipale. Voocharela, muupuwele yoorempwa eniiwanana ni soothowa saya. Ooweherya a ekulucu mmoha onnaloca mukhalelo owo ni mwaariye anampharihelaaya Piipiliya: “Anamakhala ancipale anahaala oneemererya waalakhanya everso emoha wakhala wi ninnaakuveya nave mookwakwaleya. Namala olocela nrino Apiipiliya ahu oohuleyeene mmatani, ninnaalakhanya yoorempwa.” Muthokororye sootakiherya seereryiwe mmacani sa miyaha, makoho, ni soorempwa seiyo munaphwanelaanyu weererya mu ekulucu anyu.

16. Tharihani mukhalelo wa opharihela Yesaya 14:7 mu orummwa.

¹⁶ Wakhala wi munakhala mu ekulucu ohiriwo murecele, nyuwo munanwerya omukoha muchu: “Montoko wuupuwela muchaka wa nihiku okhala ntoko ola: ‘Vano ilapo sothene sinnakhala ni muretxele, nave atxhu annipa ni ohakalala’? Ti yeeyo Piipiliya onaloceiye mu Yesaya 14:7. Chiri, Piipiliya ookhalano soororomeliha sincipale sa Muluku vooloca sa ilukuluku sa murecele sinoorwa omwaahiyu.” Voocharela mwiivahe wi mwaalakhanye yoororomeliha emoha Mpiipiliyani.

17. Munii nwerye hai opaceryiha Mateyu 5:3 mu ovaanela?

¹⁷ Mano ti woovila wa alopwana ancipale mu ekulucu anyu okhalano ikhorowa? Wakhala wi aai, munanwerya opaceryiha ovaanela moorweela wa okoha: “Mulopwana onaphwanela okhalano ikhorowa kavi wi ahakalalihe echoko awe?” Mucharihe naakhulo na muchu ni: “Alopwana ancipale annakhalano ikhorowa sincipale opwaha seiho, nyenya ichoko saya nlelo hasinahakalala. Mano tiheeni enakhweleya chiryene?” Voocharela mwaalakhanye Mateyu 5:3 nave mvahe yoohuserya ya Piipiliya.

18. Wi mwaahakararye akina, munii nwerye hai opharihela Yeremiya 29:11?

¹⁸ Achu mu ekulucu anyu annahooxeya ni epahu ephacunwe hiihaanoru? Mpaceryihe mulocaka: “Kirwenle woohakararyaani vaate vanyu. (Mwaalakhanye Yeremiya 29:11.) Muhoona ichu chaaru Muluku onachuneiye onivaha hiyo? ‘Murecele,’ ‘omwaahiyu,’ ni ‘ewehereryo.’ Tahi yooreera osuwela wi Muluku onachuna wi nikhaleno okumi waphaama? Nyenya enii eweryeye hai yeeyo?” Voocharela mmoonihe yoohuserya yoophwanelela mu eproxura Michaka Yaphaama.

19. Tharihani mukhalelo wa opharihela Yawupulula 14:6, 7 nlocaka ni achu a malapelo.

¹⁹ Munakhala mu ekulucu weiwo achu anasiveliwaaya ni malapelo? Waakhala wi aai, Mwanwerya opaceryiha moorweela wa okoha: “Waakhanle wi munkeelo onachuna oloca ni nyuwo, mwanwiriyana yeeyo onachuneiye oloca? (Mwaalakhanye Yawupulula 14:6, 7.) Woona wi munkeelo ola onaloca wi ‘ovani Muluku,’ tahi wookhweleya omusuwela Muluku taani yoowo onamwaaheiye? Munkeelo onnanikhaviherya vaavaa onaloceiye wi ti ‘Yowo ápachunshe erimu ni moko.’ Taani yoowo?’’ Voocharela mmwaalakhanye Salmo 124:8, onnii: “Okhaviherya wahu ori mu nsina na Yehova, Ópachusha wirimu ni elapo ya vathi.” Mvahe yoolaleeryiwa wi mutharihe sincipale vooloca sa Yehova Muluku.

20. (a) Masiposipo 30:4 enii ephariheliwe hai wi nimuhusihe muchu nsina na Muluku? (b) Mookhalano yoorepa yookwakwaleya munapharihelaanyu ni yookhumelela yaphaama?

²⁰ Nyuwo munanwerya opaceryiha ovaanela ni mmiravo moorweela wa oloca: “Kinchuna waalakhanya yoorepa enapaka nikoho nookhweleya. (Mwaalakhanye Masiposipo 30:4.) Haavovo muchu onaphwanela olociwa hiihaa, chiri ela enamuloca Mpatuxa.a Nnii niwerye hai osuwela nsina nawe? Kaamusiveliwa owooniha nsina nlo Mpiipiliyani.”

MUHIYE MASU A MULUKU ELIPIHE ORUMMWA WANYU

21, 22. (a) Yoorempwa yoothanliwa phaama enawerya hai otoroka okumi wa muchu? (b) Tiheeni mulakelenlaanyu weera vaavaa munakhwaaniheryaanyu orummwa wanyu?

²¹ Nyuwo hamunasuwela mukhalelo achu anahaalaaya waakhulela yoorempwa ethanliwe phaama. Ntoko yootakiherya, Anamoona eeli o Australiya yaamana nsele na namwali mmoha. Mmoha a yaawo aamukoha, “Moosuwela nsina na Muluku?” nave voocharela aahaalakhanya yoorempwa emoha​—Salmo 83:18. “Miyaano kaatikhiniheya!” namwali owo onnaloca. “Emanle orowa, miyaano kaaheeciha ekaaro ikilomeeturu 56 kiyaaka olooxa wi kawaalikhele Apiipiliya akina nave kaavarerya nsina nlo mu tisionario. Kimanle olekecheya mukhataaka wi nsina na Muluku ti Yehova, kaaniikoha ichu ikina kahaasuwelaaka.” Moohilekela, namwali owo ni iyawe oomwaahiyu yaapacerya omuhuserya Piipiliya, nave muhoolo yaapatisiwa.

²² Masu a Muluku annatoroka ikumi sa yaale anaalakhanya yaawo ni oteka nroromelo mu soororomeliha seeparipari sa Yehova. (Mwaalakhanye 1 Atesalonika 2:13.) Muchaka wa Piipiliya ti wawuupa opwaha echu eri yoothene nnaweryaahu oloca wi neererye otannya murima wa muchu mukina. Ti nthowa nene, wakhala wooweryeya va ekari eri yoothene, nnaphwanela opharihela Masu a Muluku. Awo makumi!

[Nsu na vathi]