Mapakeliwo Ooreera a Itrataato Ivyaani!
1. Ikaruma taani sa orummwa irino mapakeliwo mavyaani ooreera?
1 Itrataato ivyaani thanu soovonyiwa o Muthukumano wa Muceche 2013 ‘Masu a Muluku Ti Eparipari!’ Mwawaacererya, Michaka ya Omwene No. 38, oni “Alipa Ookhwa Anamukookela Okhala Akumi Chiryene?” yoophitaanyeryiwa mu nikhuuru na itrataato. Soothene iha thanu nammoha sookhalano mapakeliwo mavyaani ooreera. Ntakhara heeni mapakeliwo mavyaani? Naakawaka empa ni empa, nnii nipharihele hai phaama mapakeliwo aya?
2. Tiivi eri yoolakelela ya mapakeliwo mavyaani?
2 Ntakhara Heeni Mapakeliwo Mavyaani?: Operekha waphaama empa ni empa wiiliwiili onaphitaanyerya makhalelo ala maxexe: (1) Opaka nikoho na moonelo wi nipaceryihe ovaanela. (2) Wuuka muupuwelo wa mu Soorempwa. (3) Omvaha namakhala yoolaleeryiwa wi aalakhanye. (4) Ohiya nikoho wi naakhule ekwaha ekina, ni opaka marehereryo a okooka. Mapakeliwo mavyaani a itrataato iha annanikhaviherya mookhweya ochara makhalelo yaala maxexe.
3. Nnaphwanela ovaha hai itrataato ivyaani mu orummwa?
3 Moota wa Opharihela: (1) Mwamala olocela, mmoonihe namakhala nikoho na maakhulo oothanla ohoolo wa etrataato, nave mmukohe moonelo awe. (2) Muhule etrataato, nave muthokororye “Piipiliya Oni.” Mwaalakhanye yoorepa Mpiipiliyani wakhala wooweryeya. Wakhala wi namakhala ookhalano elukuluku, muthokororye “Eyo Enataphulela Eheeni wa Nyuwo.” (3) Mumvahe etrataato, nave mmuceenyerye wi ahala aalakhanye makupa oohalela. (4) Muhaakumve opwahavo, mmoonihe nikoho nri oculi vathi va “Wi Muupuwele” nave mpake marehereryo wi muthokororye naakhulo na Piipiliya ekwaha ekina.
4. Nnii nipharihele hai itrataato ivyaani mu ekwaha yooxekurya?
4 Ekwaha yooxekurya tho ti yookhweya. Pahiru mpharihele soorepa oculi wa etrataato wi mwaakhule nikoho mwaapankaanyu ekwaha yookuchula. Muhaakumve opwahavo, mmoonihe eruku ya eproxura Michaka Yaphaama, mmoonihe namakhala owo eproxura ni yoohuserya erino sooleeliherya sawaaceererya sa mwaha yoowo, nave mumvahe eproxura eyo. Wakhala wi oheemererya, mpake marehereryo wi muthokororye eproxura eyo ekwaha ekina. Hiiha moopaceryiha yoohuserya ya Piipiliya! Ohiya omvaha eproxura, nyuwaano poti omvaha etrataato ekina nave murehererye okooka wi muthokororye eyo ni namakhala.
5. Esisapo taani itrataato iryaayano mu orummwa ahu?
5 Itrataato sinnaphariheliwa mu orummwa ahu opwaha iyaakha 130. Naamwi wunnuwa waya ni mapakeliwo aya toohiyana, ovinyerya khalai ekaruma yaphaama ya ovaha onamoona. Nnaphwanela opharihela phaama mapakeliwo yaala mavyaani wi ntitelele omwaramwaxa nsuweliho na Piipiliya orukurerya elapo.—Masi. 15:7a.