MAKOHO A ALIPA WAALAKHANYA

Yesu aaloca ni Asatuki wi alipa ooviihiwa mookhwani “henathela nari otheliwa.” (Luka 20:34-36) Apwanne Yesu aaloca sa oviihiwa mookhwani wa veelaponi yavathi?

▪ Nikoho nla ti nookhweleya, xaxaxa wa yaale yaayeleenle oothelana aya oosiveliwa. Yaawo aakhalano munkhela wa okookela okhala vamoha ni oothelana aya ooviihiwa mookhwani mu elapo evyaani. Naamukhwele mmoha aaloca: “Miyaano ni mwaaraka hinaalakelenle omaliha othela wahu. Yookhwela ahu yaari okhala a waataana mmalapelo ntoko mwaara ni iya okhala wookhala. Moonelo aka yoola hotoroken’ye.” Mano aakhalawo mathowa a owehererya wi alipa ooviihiwa mookhwani anahaala othela? Mookwasa, naakhulo ti nawi hannasuwela.

Iyaakha sincipale, soolaleeryiwa sahu saanaloca wi masu a Yesu vooloca sa ovinya mookhwani ni othela yaaloca sa ovinya mookhwani wa veelaponi yavathi nave wi yaale yaahaala oviihiwa wa okumi mu elapo evyaani hiyi ethele.a (Mat. 22:29, 30; Mar. 12:24, 25; Luka 20:34-36) Naamwi nihiweryaka oloca moomalela, apwanne ti wooweryeya wi masu a Yesu yaaloca sa ovinya mookhwani wa okumi wirimu? Hankooni nthokororye yeeyo Yesu aalonceiye.

Muthokororye yaweereya. (Mwaalakhanye Luka 20:27-33.) Asatuki, hiyeemererya ovinya mookhwani, yaaheererya omphara Yesu nnikoho vooloca sa ovinya mookhwani ni othela wa omulamu.b Yesu aahaakhula: “Anamwane a elapo ya vathi vano ennathela ennatheliwa: nyenya yawo aweriwa óphwanela ophiyerya elapo yele, ni ovinya’tho wa okhwa, henathela nari otheliwa. Vawi hewerya okhwa’tho mahiku othene; vawi enaphwanaphwana ni angelo; nave ari anamwane a Muluku, ntakhara ennakhala anamwame a ovinya’tho.”​—Luka 20:34-36.

Ntakhara heeni soolaleeryiwa sahu saanaloca wi akhweya Yesu aaloca sa oviihiwa mookhwani wa veelaponi yavathi? Makuchuwelo yaala anathipeliwa mmathowa meeli. Noopacerya, ti yawooneya wi Asatuki yuupuwela ovinya mookhwani wa veelaponi yavathi nave Yesu aahaala owaakhula mwawiiwanana ni nikoho naya. Nanaawiili, Yesu aamaliha naakhulo nawe alocaka sa Aaparahamu, Isaaki, ni Yaakopo​—makholo oororomeleya yaawo anahaala oviihiwa wi ekhale ni okumi veelaponi yavathi.​—Luka 20:37, 38.

Nyenya, enooneya wi akhweya Yesu uupuwela sa ovinya mookhwani wa wirimu. Tiheeni enaneeriha wuupuwela hiiha? Hankooni nthokororye sooloca piili itokotoko.

“Yawo aweriwa óphwanelela . . . ni ovinya’tho wa okhwa.” Awoocihiwa oororomeleya ti ‘yálakhanyeriwe óphwanelela Omwene wa Muluku.’ (2 Ates. 1:5, 11) Awo aneeriwa eekhaikhai wa okumi mmathipelo a mukucho wa woopola, mwawiihiiha, awo hanakhwa ntoko anamacheka awuulumeliwa. (Arom. 5:1, 18; 8:1) Awo aniichaniwa “órela ni awéla” nave annaphwanelela oviihiwa mookhwani wa wirimu. (Yaw. 20:5, 6) Moohiyana, yaale anaviihiwa wa okumi veelapoi yavathi anahaala ophitaanyerya “óhikhala ékhaikhai.” (Saw. 24:15) Enanweryeya olociwa sa yaawo wi ‘taweriwa óphwanelela’ wa ovinya mookhwani?

“Hewerya okhwa’tho mahiku othene.” Yesu haalonce wi: “Awo herwa ekhwa.” Moohiyana, owo oriye: “Hewerya okhwa’tho mahiku othene.” Apiipiliya akina anataphulela yooloca yeela “awo hanavoloweliwa tho ni okhwa” nave “okhwa hiwaanono ikuru mwa yaawo.” Awoocihiwa anamaliha muteko aya veelaponi yavathi moororomeleya annaviihiwa wi eye wirimu nave annavahiwa okumi woohikhwa​—wawiikhalelaru, ni woohuuca. (1 Akor. 15:53, 54) Okhwa hiwaanonotho ikuru mwa yaala anaakhela oviihiwa mookhwani wa wirimu.c

Mwawiiwanana ni yeela elociwe, nnaphiyerya makuchuwelo taani? Ori wooweryeya wi masu a Yesu vooloca sa othela ni ovinya mookhwani enaphariheleya wa ovinya mookhwani wa wirimu. Wakhala wi tihiiha, masu awe anahaala onleela ichu sincipale vooloca sa yaawo arino eweheryeryo ya okumi wa wirimu. Awo hanathela, awo hanakhwa, nave awo ari ntoko ankeelo​—soopatuxiwa soomunepani inakhala wirimu. Ni makuchuwelo yaala, annakhumelela makoho mancipale.

Noopacerya, ntakhara heeni Yesu aaloca sa oviihiwa wa wirimu awaakhulaka Asatuki, yaawo akhweya yuupuwela sa ovinya mookhwani wa veelaponi yavathi? Yesu haawaakhula amwiicani awe elukuluku yoothene mwawiiwanana ni yeeyo awo yuupuwelaaya. Ntoko yootakiherya, wa Ayuuta yaawo yaanveka eneneeryo, Yesu aaloca: “Mwarani empa ya Muluku ela, nave mahiku mararu kinarwa-kivíha.” Yesu aanasuwela chiryene wi awo yuupuwela empa ya Muluku yoopakiwa, “nyenya . . . áloca sa empa ya Muluku ya mwíli awe.” (Yoh. 2: 18-21) Akhweya Yesu oona wi hiwaari woochuneya owaakhula Asatuki oowoka; yaawo yaheemererya ovinya mookhwani naari okhalawo wa ankeelo. (Masi. 23:9; Mat. 7:6; Saw. 23:8) Moohiyana, Yesu aachuna wuupulula iparipari vooloca sa oviihiwa mookhwani wa wirimu wa mphurelo wa oomuchara awe eeparipari, yaawo omwaahiyu yaahaala okhalano ekari ya opuha oviihiwa mookhwani iwo.

Nanaawiili, ntakhara heeni Yesu aamalinhe ovaanela wawe alocaka sa Aaparahamu, Isaaki, ni Yaakopo, yaawo anahaala oviihiwa wa okumi veelaponi yavathi? (Mwaalakhanye Mateyu 22:31, 32.) Moone wi Yesu aapacerinhe alocaka sa makholo yaawo ariki “nyenya sa ovinya wa okhwa.” Yooloca yeela enneemererya otorokeya yoolakelela. Voocharela, alocaka soorempwa sa Moose, seiho Asatuki yaalocaaya wi anneemererya, Yesu aapharihela masu a Yehova wa Moose va ephovo yoovarela wi ooniherye wi ovinya mookhwani​—wa veelaponi yavathi—​ti yookhwela ya Muluku.​—Muk. 3:1-6.

Naneeraru, wakhala wi masu a Yesu vooloca sa ovinya mookhwani ni othela anaphariheleya wa ovinya mookhwani wa wirimu, apwanne ela enataphulela wi yaale anahaala oviihiwa mookhwani wi ekhale veelaponi yavathi anahaala othela? Masu a Muluku hanavaha naakhulo nookwakwaleya vooloca sa nikoho nenla. Wakhala wi Yesu, chiryene, aaloca sa ovinya mookhwani wa wirimu, masu awe hanavaha ekamaama vooloca sa othela wa alipa ooviihiwa mookhwani veelaponi yavathi mu elapo evyaani.

Mwawiihiiha, noosuwela wi Masu a Muluku moomalela analoca wi okhwa onnamaliha othela. Vanonto, naamukhwele hanaphwanela wiisoona okhalano nthowa wakhala wi oolakelela othela naari otheliwa wanawiili. Eyo yoolakelela ya muchu mukhateiye, nave muchu hanaphwanela waakaahiwa alakelela othela naari otheliwa.​—Arom. 7:2, 3; 1 Akor. 7:39.

Mwawooneya, nookhalano makoho mancipale vooloca sa okumi mu elapo evyaani. Ohiya waanyiherya maakhulo a makoho yaawo, hiyaano nnaphwanela oweherya wi noone. Nyenya hiyaano ninnaroromela ela: Achu awiiwelela anahaala okhala oohakalala, ntakhara wi Yehova onahaala waakhwaniherya soochuna saya soothene mmukhalelo waphaamaxa.​—Sal. 145:16.

[Masu a vathi]