Ntakhara Heeni Nnaphwanela Okhala Aweela

“Mukhale awèla.”​—ONAM. 11:45, BNM.

MWAHAALA WAAKHULA HAI?

Ntakhara heeni weela wa Aaroni ni anamwane awe wookhalano yootaphulela etokweene wa achu oothene a Yehova?

Wiiwelela wahu oniiwanana hai ni okhala aweela?

Teevi enaphwanela okhala yoolakelela ahu vooloca sa nlamulo na Yehova vooloca sa nikhami?

1. Liivuru a Onamukucho onahaala onikhaviherya hai?

WEELA, onnalociwa ikwaha sincipale mu liivuru a Onamukucho opwaha aliivuru akina a Mpiipiliyani. Woona wi mukhalelo ola ti woochuneya wa alapeli eparipari oothene a Yehova, omwiiwexexa ni ompharihela Onamukucho enahaala onikhaviherya okhala aweela.

2. Makhalelo taani liivuru a Onamukucho oreiyeno?

² Liivuru a Onamukucho, orempwe ni Moose, makupa a “sorempwa sothene” seiyo sinaphwanyerya echu va ohusiha. (2 Tim. 3:16) Nsina na Yehova ninnaphwanyeya opwaha ikwaha khumi mu ekapitulu eri yoothene ya liivuru yoola. Osuwela mwaha wa Onamukucho enahaala onceenyerya osepa weera echu enahaala onyemuliha nsina na Muluku. (Onam. 22:32) Ophariheliwa masu “Miyo ka Apwiya [Yehova]” mu liivuru ola ennanuupuxerya omwiiwelela Muluku. Mmwaha yoola ni onacharela, nnahaala ophwanya muhakhu wasisapo onaphwanyeya mu Onamukucho, yamahala ya Muluku yeeyo enanikhaviherya opaka makupa a malapelo aweela.

WEELA ONACHUNEYA

3, 4. Weelihiwa wa Aaroni ni anamwane waasiphela eheeni? (Moone eruku yoopacerya.)

³ Mwaalakhanye Onamukucho 8:5, 6. Yehova aamuthanla Aaroni wi arumeele ntoko mulipa eephepa a Isarayeli, nave anamwane awe yaarumeela ntoko anamukucho a nloko. Aaroni onamweemelela Yesu Kiristu nave anamwane awe anaweemelela arummwa oothanliwa a Yesu. Apwanne wiirapiha wa Aaroni onataphulela weelihiwa wa Yesu? Hooye, Yesu haarino yoocheka nave aari “óhikhalano murala,” mwawiihiiha hiwaari woochuneya weelihiwa. (Ahe. 7:26; 9:14) Nyenya, mukhalelo waweela wa Aaroni onasiphela mukhalelo waweela ni weekhaikhai wa Yesu. Vano, weelihiwa wa anamwane a Aaroni onasiphela eheeni?

⁴ Weelihiwa wa anamwane a Aaroni waasiphela weela wa yaale oothanliwa wi epake makupa a onamukucho wirimu. Apwanne opatisiwa wa oothanliwa onasiphela weelihiwa wa anamwane a Aaroni? Hooye, opatiso honeeliha soocheka; opwaha yeeyo, opatiso onooniherya wi muchu ohiiveleela wa Yehova Muluku. Weelihiwa wa oothanliwa oneereya moorweela wa “masu,” nave enachuneya wi awo epharihele mookumini mwaya mahusiheryo a Kiristu ni murima woothene. (Aef. 5:25-27) Mwawiihiiha awo ari oorapihiwa ni aweelihiwa. Nyenya hanka vooloca sa “ipuchepuche sikina”?​—Yoh. 10:16.

5. Ntakhara heeni enanwerya olociwa wi ipucepuche sikina sinneelihiwa orweela wa Masu a Muluku?

⁵ Anamwane a Aaroni hiyaasiphela “muloko mtokotoko” wa ipucepuche sikina sa Yesu. (Yaw. 7:9) Vano apwanne achu yaala oopatisiwa yeelihiwe tho moorweela wa Masu a Muluku? Aai! Vaavaa yaale arino ewehereryo ya veelaponi yavathi anaalakhanyaaya yeeyo Piipiliya onaloceiye sa esisapo ya nikhami na Yesu, awo annakuha nroromelo mmasu yaawo nave “tanamurumélaya yowo othana ni ohiyu.” (Yaw. 7:13-15) Sookhumelela sa weela wooya vahoolo wa oothanliwa ni ipucepuche sikina ti sawooneya vaavaa awo anakhapelelaaya ‘mecelo órera.’ (1 Pet. 2:12) Yehova onnatepa ohakalala vaavaa onooneiye weela ni wiiwanana wa oothanliwa ni ipucepuche sikina, yaawo ananwiriyana ni omuchara moororomeleya Mukukhuli aya, Yesu!

6. Wiisaalikhela taani onahaala okhala wa mphurelo?

⁶ Nlamulo nawi anamukucho a Isarayeli ekhaleke aweela omwiilini nookhalano yootaphulela etokweene wa achu a Yehova olelo. Yaale anamuhuserya Piipiliya ni hiyaano wiiliwiili annoona wi mapuro ahu a malapelo ni mawarelo ahu taweela. Mwawiihiiha, weela wa onamukucho onnanikhaviherya osuwela wi muchu yoowo onwela va mwaako woorakama wa malapelo a Yehova onaphwanela okhala “éparipari murima.” (Mwaalakhanye Salmo 24:3, 4; Yes. 2:2, 3.) Muteko ahu wa Muluku onaphwanela weeriwano ni muupuwelo, murima, ni mwiili waweela. Ela enooniherya ochuneya waya wiisaalikhela, wi nsuwele makupa anakhweleya otoroka wi nikhale aweela. (2 Akor. 13:5) Ntoko yootakiherya, muchu oopatisiwa yoowo onoona epwitikiri mwaayiini onaphwanela wiikoha, ‘Kinnooniherya wi kiri aweela?’ Voocharela onaphwanela waavya nikhaviheryo wi amalihe yookhovelela yeeyo.​—Yak. 5:14.

MOONIHERYE OKHALA AWEELA MOORWEELA WA WIIWELELA

7. Mwawiiwanana ni Onamukucho 8:22-24, yootakiherya taani Yesu otikithenryeiye?

⁷ Vaavaa onamukucho wa Isarayeli waatikitheryiwaaya, nikhami na nakhoro naanaconyiheryiwa va naaru noolopwana, va ekatha etokotoko ya ntata noolopwana ni ya mu inaani sa Mulipa Eephepa Aaroni ni anamwane awe. (Mwaalakhanye Onamukucho 8:22-24.) Ophariheliwa wuuwu wa nikhami waataphulela wi anamukucho yahaala owetha wi yaakhwaniherye mirici saya moororomeleya. Moolikana, Mulipa Eephepa Yesu ootikitherya yootakiherya yaphaama wa oothanliwa ni ipucepuche sikina. Ewaru awe yaanawiriyana ohoolela wa Muluku. Mata a Yesu yaaphariheliwa mu weerano yookhwela ya Yehova, nave inaani sawe hasitonko opheruwa mu ephiro yaweela.​—Yoh. 4:31-34.

8. Tiheeni alapeli oothene a Yehova anaphwanelaaya weera?

⁸ Akiristu oothanliwa ni ipucepuche sikina sa Yesu anaphwanela ochara ororomeleya wa Mulipa Eephepa aya. Alapeli oothene a Yehova anaphwanela wiiwelela ohoolela onaphwanyeya Mmasu a Muluku ni osepa othananiha munepa awe. (Aef. 4:30) Awo anaphwanela ‘owereryanya arampha awokowa mummo muni enechamo manani aya.’​—Ahe. 12:13.

9. Anna araru yaawo yaarumeenle vakhiviru khiviru ni anna a Nikhuuru Noolamulela alonce hai, nave masu aya anookhaviheryaani hai otitelela okhala aweela?

⁹ Muthokororye masu oolucuwa a anna araru yaawo arino ewehereryo ya veelaponi yavathi nave mu iyaakha sincipale anarumeela vakhiviru khiviru ni anna a Nikhuuru Noolamulela. Mmoha aaloca: “Vaavaa ela eraaya ekari yavameekhaaya ya muteko, onthamwene wawaacamelana moovira wa elukuluku onnooniherya wi, naamwi ari oothanliwa ni munepa, anna yaala toohiphaameya. Naamwi hiiha, yoolakelela aka ovinyerya khalai ori owiiwelela yaale anahoolela.” Munna anaawiili aaloca: “Soorepa ntoko 2 Akorinto 10:5, vooloca sa ‘omwiwelela Kristu,’ sinnanikhaviherya wiiwelela ni wiiwanana ni yaale anahoolela. Ola wiiwelela wa murima woothene.” Munna aneeraru aaloca: “Osivela yeeyo Yehova onasiveleiye ni othanya yeeyo onathanyeiye, ni waavya moohihiyererya ohoolela wawe ni weerano yeeyo enamuhakalaliha, enataphulela wiiwelela marehereryo awe ni yaale onaaphariheleiye wi eyeno vahoolo yookhwela awe ntakhara elapo yavathi.” Munna ola aasuwela wi Nathan Knorr, yoowo aari mmoha a Nikhuuru Noolamulela, aaheemererya mwaha wa Mulipeleli a 1925 “Oyariwa wa Nloko” naamwi akina yaakanhe mwaha owo. Wiiwelela wawe yoowo waamutikhiniha munna. Wuupuwelela masu a alopwana yaala araru aromoliwe enahaala wookhaviheryaani wooniherya okhala aweela moorweela wa wiiwelela.

WIIWELELA WAWEELA NLAMULO NA MULUKU VOOLOCA SA NIKHAMI

10. Ntakhara heeni ti woochuneya wiiwelela nlamulo na Muluku vooloca sa nikhami?

¹⁰ Mwaalakhanye Onamukucho 17:10, (BNM). Yehova aahaalamulela Aisarayeli wi ehilyeke “ephome”. Wuumaala nikhami—na mwaaxinama naari na muchu—nlamulo Neekiristu. (Saw. 15:28, 29) Hiyaano ninnoova wi Muluku ‘haniweha ni orèra murima’ ni onikumiha mmulokoni mwawe. Hiyaano ninnamusivela nave ninnachuna omwiiwelela. Naamwi mmukhalelo wa woopopiha okumi, nri oolakelela ohimorela mmiraakho ni okhinyererya wa yaale ahimusuwenle Yehova nave ahinachuna omwiiwelela. Aai, ninnaweherya onyemuliwa nthowa na wuumaala nikhami, nyenya ninnathanla omwiiwelela Muluku. (Yuuta 17, 18) Moonelo taani mmwaha yoola onahaala onilipiha ‘osepa’ ohilya nikhami naari waakhela nikhami mmwiilini?​—Malam. 12:23, BNM.

11. Ntakhara heeni nnanwerya oloca wi Nihiku na Okhurumuweliwa nenlo neereya va eyaakha hiyaari meerelo oohikhalano mphurelo?

¹¹ Ophariheliwa wa nikhami na mwaaxinama ti mulipa eephepa a Isarayeli va Nihiku na Okhurumuweliwa neereya va eyaakha, ennanikhaviherya wiiwexexa moonelo wa Muluku vooloca sa nikhami. Nikhami naanakhapeleliwa wi niphariheliwe mmukhalelo wavameekhaaya. Naanaphariheliwa wi sikhurumuweliwe soocheka sa yaale yaachuna ikharari sa Yehova. Nikhami na emope ni epuri naanacikicheliwa ekaaxa ya nlakano. (Onam. 16:14, 15, 19) Yaweera ela yaaneeriha wi Yehova akhurumuwele soocheka sa Aisarayeli. Mwawaacererya, Yehova aaloca wi wakhala wi muchu oomwiipha mwaaxinama wi apake yoolya, owo aaphwanela oyeeha nikhami nawe ni wuuheelela ni echaya, woona wi “ekumi ya enama enakhala mu nikhamini.” (Onam. 17:11-14, BNM.) Apwanne yaari meerelo oohikhalano mpurelo? Hooye. Ophariheliwa wa nikhami mu Nihiku na Okhurumuweliwa, ni nlamulo na oyeeherya nikhami vachayani, sinniiwanana ni nlamulo nakhalai na Yehova wa Noowa ni anamwane awe vooloca sa nikhami. (Map. 9:3-6) Yehova Muluku oowatiiha olya nikhami wi ekhapeleliwe ekumi. Ela enataphulela eheeni wa Akiristu?

12. Ekaarata ya Paulo wa Akiristu Ahepri enalikanyiha hai nikhami ni okhurumuweliwa?

¹² Vaavaa murummwa Paulo aarepenleiye Akiristu Ahepri vooloca sa owerya weeliha wa nikhami, owo aathariha: “Ntoko mwa malamulo sinahala itchu vakhani sohélihiwa n’nikhami, nave vahikhanle’vo ochonyiha nikhami otaphuwatho hiwavovo.” (Ahe. 9:22) Paulo aaloca tho wi mukucho wa mwaaxinama, naamwi waarino esisapo vakhaani, pahiru waawuupuxerya Aisarayeli wi yaari anamacheka nave wi yaanachuna echu ekina wi iviihiwevo khuluwi soocheka. Aai, Nlamulo naari “muruli wa itchu sorera sinorwa iho, óhikhala yophwaniheryasha ya itchu iho.” (Ahe. 10:1-4) Okhurumuweliwa wa soocheka waahaala oweryeya mwawiihai?

13. Munoona hai vooloca sa Yesu otheteya wawe esisapo ya nikhami nawe wa Yehova?

¹³ Mwaalakhanye Aefeso 1:7. Okhwa wa Yesu Kiristu ntoko mukucho, yoowo ni murima woothene ‘ivelenle mekhiye ntakhara a hiyo,’ wookhalano yootaphulela etokweene wa oothene yaale anamusivela owo ni Tiithi awe. (Akal. 2:20) Nyenya, echu Yesu enreiye amanle okhwa ni ovinya ti yeeyo enitaphunle chiryene, yeerihaka wi okhale wooweryeya okhurumuweliwa soocheka sahu. Yesu aahaakhwaniherya yeeyo yaasipheliwe mu Nlamulo na Moose mu Nihiku na Okhurumuweliwa. Mu nihiku nenlo, mulipa eephepa aanakuxa nikhami na axinama a mukucho ni ovolowano mu Nipuro Naweelaxa mu tapernaakulu, ohoolo waya mu empa ya Muluku ya Soolomoni, ni otheteya nlo wa Muluku, ntoko vamiithoni vawe. (Onam. 16:11-15) Moolikana, Yesu aavolowa wirimu ni esisapo ya nikhami nawe na omuchu nave atheteya nlo wa Yehova. (Ahe. 9:6, 7, 11-14, 24-28) Ninnathamalela okhurumuweliwa soocheka sahu ni weelihiwa yawuupuxerya-ya-murima ahu nthowa nawi nohooniherya nroromelo mu nikhami na Yesu!

14, 15. Ntakhara heeni ti woochuneya wiiwexexa ni wiiwelela nlamulo na Yehova vooloca sa nikhami?

¹⁴ Vano nyuwaano munnawerya wiiwexexa phaama nthowa nene Yehova onanilamuleleiye wi nihilyeke “ephome?” (Onam. 17:10, BNM.) Munnawerya woona nthowa taani Muluku onooneiye nikhami okhala naweela? Owo onoona nikhami okhala okumi. (Map. 9:4) Munneemererya wi nnaphwanela ochariha moonelo wa Muluku vooloca sa nikhami ni wiiwelela nlamulo nawe na wuumaala nikhami? Mukhalelo mmoha wa okhala mmurecele ni Muluku ori okhalano nroromelo mu yamahala ya mukucho wa Yesu nave osuwela wi nikhami nookhalano esisapo etokweene wa Mpatuxa ahu.​—Akol. 1:19, 20.

¹⁵ Muchu ti muchu a hiyo akhweya mootutuxa onahaala okumana ni mwaha wa nikhami. Naari muchu a emusi naari nthamwene ahu onamukumana ni mwaha wa weemererya naari okhooca waakhela nikhami. Variyari va makacamiho yaawo, onachuneya tho opaka soothanla vooloca sa makupa a nikhami ni meerelo a oloola. Mwawiihiiha, ti woochuneya vancipale otholathola ni wiirehererya ntakhara epahu. Wiirehererya wiiwo vamoha ni mavekelo, onahaala onikhaviherya okhala aweemeleleya ni omusepa namvutuka mmwaha yoola. Chiryene hinnachuna othananiha murima wa Yehova moorweela wa weemererya echu Masu awe anakhwatiihaaya! Alipa eekumi ni akina annavuwiha waakhela nikhami yaaceenyeryaka achu wi evahe nikhami wi ivuluxiwe ikumi. Nyenya, achu aweela a Yehova annasuwela wi Mpatuxa ookhalano ophwanelela wa oloca mukhalelo wa ophariheliwa nikhami. Wa yoowo “ephome” yoothene ti yaweela. Nnaphwanela okhala oolakelela wiiwelela nlamulo nawe vooloca sa nikhami. Moorweela wa meecelo ahu aweela, ninnooniherya wa yoowo wi ninnathamalela ikuru soovuluxa okumi sa nikhami na Yesu​—nikhami nenlo nneeriha wi okhale wooweryeya okhurumuweliwa yoocheka ni okumi woohimala.​—Yoh. 3:16.

NTAKHARA HEENI YEHOVA ONAWEHERYA WI NIKHALE AWEELA

16. Ntakhara heeni achu a Yehova anaphwanela okhala aweela?

¹⁶ Vaavaa Muluku aawooponleiye Aisarayeli wookapuroni o Yiikuputu, awo yaaleeliwa: “Miyo kiri Apwiya [Yehova] kovihaleni elapo ya w’Egipitu wi kikhale Muluku anyu. Mukhale awèla ntakhara miyo kiri awèla.” (Onam. 11:45, BNM.) Yaanaweheryiwa wi nloko na Isarayeli nikhale naweela ntakhara Yehova taweela. Ntoko Anamoona a Yehova, hiyaano tho nnaphwanela okhala aweela. Liivuru a Onamukucho hanavaha minikwa vooloca sa yeeyo.

17. Vano munoona hai vooloca sa liivuru a Mpiipiliyani a Onamukucho?

¹⁷ Othokororya wahu makupa a Onamukucho chiryene ti wa mphurelo. Nave tho, yoohuserya ela yohaacererya omuthamalela wanyu liivuru yoola ooveereliwa a Mpiipiliyani. Wuupuwelela sooleeliherya seiya sa esisapo moohikhwa minikwa wohaacererya wiiwexexa wanyu mathowa taani nnaphwanelaahu okhala aweela. Nyenya, muhakhu taani mukina woomunepani onaniweherya mmakupa yaala a Masu ooveereliwa a Muluku? Tiheeni ekina nnaweryaahu ohuserya orweela wa mwaha mutokweene wa Onamukucho wa omvaha Yehova muteko waweela? Nnahaala othokororya makoho yaala mmwaha onacharela.

[Eruku va epaaxina 15]

Nyuwaano muri oolakelela wiiwelela nlamulo na Yehova vooloca sa nikhami? (Moone iparakrafo 14, 15)