MWAHA WA EKAAPA | MUNNIISOONA OKHALA AWAATAANA NI MULUKU?

Munneera Yeeyo Muluku Onavekeiye?

“Echu vyakala onachunaawe, okileele kinahaala weerano.” Nyuwaano akhweya mwaahaala woovelela oloca masu yaala wa muchu oohisuwanyeya naari wa musuweli vyakala. Nave himwaahaala woovelela oloca masu yaala wa nthamwene avamurimani. Asinthamwene awaataana annapakelana yeeyo eri yoochuneya.

Piipiliya onnooniherya wi Yehova moohihiyererya onneera yeeyo onooneiye wi enahaala waahakalaliha alapeli awe. Ntoko yootakiherya, Mwene Tavite yoowo aapunhe onthamwene ni Muluku, aaloca: “Yehova, Muluku aka, sotikiniha sanyu mwénranyu ti sinchipale, nave sawanyiherya sanyu sa va hiyo; . . . Sinnakáchela walakhanya.” (Salmo 40:5) Opwaha yeeyo, Yehova onneera yaphaama wa yaale tho ahimusuwenle, ‘asarihaka mirima aya ni sólya ni otheya.’​—Saweriwa Tarummwa 14:17.

Woona wi Yehova onnasiveliwa weera yeeyo enaahakalaliha akina, ti woophwanelela oweherya wi yaale anachuna okhala asinthamwene a Muluku yeereke ichu inahakalaliha “murima” awe. (Masiposipo 27:11, BNM) Nyenya tiheeni xaxaxa munaphwanelaanyu weera wi mmuhakalalihe Yehova? Piipiliya onnaakhula: “Muhichuwaleke werela sorera ni wakawela akina; ntakhara iphepa sawihiha Muluku tanahakalaliyeno.” (Ahebri 13:16) Enataphulela wi weera yaphaama wa akina echu eri yoothene yoochuneyaxa wi nimuhakalalihe Yehova?

Piipiliya onnaloca: “Vahikhanle’vo nroromelo hevanaweryeya omuhakalaliha” Muluku. (Ahebri 11:6) Yootikhiniha ti yawi Aaparahamu “áheriwa nthamwene a Muluku” amanle ‘omuroromela Muluku.’ (Yakobo 2:23) Yesu Kiristu tho aaceenyerya ochuneya waya ‘omuroromela Muluku’ naachunaka opuha mareeliho a Muluku. (Yohane 14:1) Vano munii nwerye hai okhalano nroromelo nenlo Muluku onaavyeiye wa yaale onaataaneiyeno? Mpacerye moorweela wa ohuserya moohihiyererya Masu a Muluku, Piipiliya. Mweerano yeeyo, munahaala “orórasha wa otchuna wawe” ni ohuserya mukhalelo wa “omutheiha” phaama. Voocharela, vaavaa munaaceereryaanyu masuwelelo eeparipari vooloca sa Yehova ni opharihela yeeyo muhusenryaanyu sa malamulo awe eekhaikhai, nroromelo nanyu wa yoowo nnahaala wunnuwa nave munahaala waataana ni yoowo.​—Akolose 1:9, 10.

[Eruku va epaaxina 6]

Ni murima woothene ninneera ichu wa yaale nnaasivelaahu ni nnaacicimihaahu