MWAHA WA EKAAPA | MUNNIISOONA OKHALA AWAATAANA NI MULUKU?

Munniisoona Okhala Awaataana ni Muluku?

“Waataana ni Muluku onnamweeriha muchu wiisoona okhala awaakiheya, awaakhwanela ni oolipiheya. Enakhala ntoko Muluku elukuluku yoothene onnathokororya soochuna sanyu.”​—KIRISTOVAU, MMIRAVO A KANA.

“Muluku onnawoonaani mmakacamiho anyu oothene, oosivelakaani nave oothokororyakaani opwaha munavekaanyu.”​—ANA A IYAAKHA 13 SA OYARIWA, ALASKA, EUA.

“Eyo echu yoochuneya ni yoolipiha muchu osuwela wi ohaataana ni Muluku!”​—XINA, MUTHIYANA A IYAAKHA SOOPHIYERYA 40 SA OYARIWA O XAMAIKA.

Kiristovau, Ana, ni Xina hari meekhaya. Achu ancipale orukurerya elapo aalekecheya wi Muluku onawoona awo ntoko asinthamwene awe. Hanka nyuwo? Munniisoona okhala awaataana ni Muluku? Naari munnachuna okhala nthamwene awe? Akhweya munanwerya wiikoha: ‘Ti wooweryeya chiryene muchu okhala awaataana ni Muluku a Ikuru Soothene? Wakhala wi ti hiiha, mwawiihai?’

WAATAANA NI MULUKU TI WOOWERYEYA

Mwa wiiwanana ni Piipiliya, ti wooweryeya muchu okhala nthamwene a Muluku. Piipiliya onnaloca wi Muluku aamwiichana Muhepri Aaparahamu ntoko “nthamwene aka.” (Yesaya 41:8, Bibiliya Nsu na Muluku) Moone tho nwopelo woolipiha onaphwanyeya mu Yakobo 4:8: “Mwachameleni Muluku, nave anarwa-awachamelani nyuwo.” Hiiha ori wawooneya wi waataana ni Muluku ti wooweryeya. Woona wi Muluku hanooneya, munahaala ‘omwachamela’ hai ni opuha onthamwene waphaama ni yoowo?

Wi naakhule nikoho nenno, muthokororye yeeyo eneereya ni onthamwene wa achu. Owo onapacerya ni achu apiili osuwela nsina na mukina ni mukhwaawe. Vaavaa analocihanaaya moohihiyererya, anuukaaya muupuwelo ni moonelo, onthamwene aya onnannuwa. Nave vaavaa aniilipixeryaaya okhaviheryana mukina ni mukhwaawe onthamwene aya onnalipa. Emohamoha enneereya ni opaka onthamwene ni Muluku. Hankooni noone ti mwawiihai eyo eneereyaaya.