MWAHA WA EKAAPA | MUNNIISOONA OKHALA AWAATAANA NI MULUKU?

Munnaloca ni Muluku?

Moorweela wa telefone, e-mail, eviitiyu, ekaarata naari vakhiviru khiviru asinthamwene awaataana annalocihana ikwaha sincipale mwawiiwanana ni mikhalelo saya. Wi naataane ni Muluku, nnaphwanela olocaka ni yoowo moohihiyererya. Eyo eneereya mwawiihai?

Nnawerya oloca ni Yehova moorweela wa nivekelo. Nivekelo wa Muluku, hori ntoko ochekula woohilakelela ni musuweli ahu. Nnaphwanela osuwela wi vaavaa nnavekelaahu, nnaloca ni Mpatuxa ahu, Mutokweene a elapo yoothene. Eyo enaphwanela oneeriha ovekela ni ncicimiho ntokweene. Wi mavekelo ahu yeemereryiwe ni Muluku, nnaphwanela tho ochariha malakiheryo. Annacharela mararu a yaawo.

Noopacerya, mavekelo anaphwanela opakiwaka pahiru wa Yehova Muluku​—ohiya wa Yesu, “aweela,” naari eruku. (Mukwaha 20:4, 5) Piipiliya mookwakwaleya onnaloca: “Nyenya mu sothe sene n’nivekelo, ni ochichimiha, vamoha ni othamala, hiho munavekanyu sisuweliwe ti Muluku.” (Afilipi 4:6) Nanaawiili, mavekelo anaphwanela opakiwa mu nsina na Mwaana a Muluku, Yesu Kiristu. Yesu aathariha: “Havovo mutchu anarwa wa Atithi, nyenya mwa Miyo.” (Yohane 14:6) Naneeraru, mavekelo ahu anaphwanela wiiwanana ni yoochuna ya Muluku. Piipiliya onnaloca: “Wi navekaru etchu ntoko ni okhwela wawe, ananíwa.”a​—1 Yohane 5:14.

Mweeparipari, onthamwene holekela wakhala wi muchu mmoha tanaloca. Hiiha ntoko asinthamwene anapuhaaya wakhala wi oopiili annalocihana, nnaphwanela weemererya wi Muluku aloce ni hiyo ni onwiriyana vaavaa onaloceiye. Moosuwela ti mwawiihai Muluku onaloceiye ni hiyo?

Olelo, Muluku “onnaloca” ni hiyo moorweela wa Masu awe oorempwa, Piipiliya. (2 Timoteo 3:16, 17) Ntakhara heeni nnalocaahu hiiha? Wi niphwanaphwanihe: Nkaanyiheryani wi mwaakhenle ekaarata enarweela wa nthamwene. Mmanle waalakhanya, munanwerya oloca ni akina, “miyo chiryene kimwiiwale nthamwene aka!” Nyenya, olocihana iwo hiwaari wa masu, waari mmukhalelo woorempwa. Moolikana, moorweela wa omwaalakhanya Piipiliya, nyuwaano munneemererya wi Yehova aloce ni nyuwo. Xina oromoliwe mmwaha woopacerya onnaloca: “Kinuupuwela wi kaachunaka wi Yehova anakoona ntoko nthamwene, kinaphwanela waalakhanya ‘ekaarata’ awe wa hiyo​—Piipiliya.” Owo onnaaceererya: “Omwaalakhanya Piipiliya mahiku oothene ennakaataaniha ni Muluku.” Munneemererya wi Yehova aloce ni nyuwaano moorweela wa waalakhanya Masu awe, Piipiliya, mahiku oothene? Weerano yeeyo enahaala wookhaviheryaani wiisoona okhala awaataana ni Muluku.

[Nsu na vathi]

[Eruku va epaaxina 5]

Asinthamwene annapuha wakhala wi oopiili annalocihana mwawiiwanana ni mikhalelo saya