Waataana Wanyu ni Yehova ti Weeparipari?

“Mwachameleni Muluku, nave anarwa-awachamelani nyuwo.”​—YAK. 4:8.

MWAHAALA WAAKHULA HAI?

Tiivi enaphwanela okhala yoolakelela anyu vaavaa munahuseryaanyu Masu a Muluku?

Tiheeni enoororomelihaani wi elukuluku yoothene Yehova onapaka yeeyo eri yawookololowa?

Ntakhara heeni ti yaphaama okhala ooluluwanya mmavekelo?

1. Ntakhara heeni ninnachuna wi waataana wahu ni Yehova okhale woolipa?

NYUWAANO mwa Namoona a Yehova awiiveleela ni oopatisiwa? Wakhala wi ti hiiha, mookhalano echu yasisapo​—waataana wanyu ni Yehova. Nyenya, waataana yoowo onnahipheliwa ohiya pahiru ni elapo ya Satana nyenya tho ni ohiphaameya wa mwiili ahu. Mukhalelo yoola woovila onnaavolowela Akiristu oothene. Mwawiihiiha, waataana wahu ni Yehova onaphwanela okhala woolipa.

2. (a) Waataana tiheeni? (Moone masu a vathi.) (b) Nnii nlipihe hai waataana wahu ni Yehova?

² Waataana wanyu ni Yehova ti weeparipari? Munnachuna olipiha? Yaakopo 4:8 onnoolelaani mukhalelo wa weerano: “Mwachameleni Muluku, nave anarwa-awachamelani nyuwo.” Moone wi arivo makhalelo meeli.a Vaavaa nnamwaacamelaahu Muluku, owo tho onnanaacamela. Mukhalelo yoola, wa wuuluulela, vakhaani vakhaani onnalipiha waataana wahu ni Yehova. Ntoko yookhumelela, waataana wuuwu onnakhala weeparipari wa hiyo. Ninnannuwiha nroromelo ntoko nenlo Yesu aareiyeno vaavaa aalonceiye: “Yowo ákirumme . . . ori éparipari. Miyo kinnamusuwela.” (Yoh. 7:28, 29) Xaxaxa, ichu taani munaphwanelaanyu opaka wi mmwaacamele Yehova?

3. Tiheeni eneeriha olocihana ni Yehova okhala weeparipari?

³ Olocihana woohihiyererya ni Yehova makupa ookhweleya a omwaacamela yoowo. Munii nwerye hai olocihana ni Muluku? Nyuwaano munalocihana hai ni nthamwene yoowo onakhala ocai wa nyuwo? Akhweya, munnarepelana ekaarata nave munnalocihana orweela telefone, akhweya ohiya elukuluku yoothene. Munnaloca ni Yehova moorweela wa ovekela wa yoowo moohihiyererya. (Mwaalakhanye Salmo 142:2.) Nave munneemererya wi Yehova aloce ni nyuwaano, vaavaa munaalakhanyaanyu Masu awe oorempwa moohihiyererya nave munuupuwelela. (Mwaalakhanye Yesaya 30:20, 21.) Hankooni vano nthokororye, ti mwawiihai makhalelo yaala meeli a olocihana analipihaaya waataana wahu ni Yehova, yeerihaka wi waataana wahu ni yoowo okhale weeparipari.

YEHOVA ONNALOCA NI NYUWO​—MOORWEELA WA OMUHUSERYA PIIPILIYA

4, 5. Yehova onaloca hai ni nyuwaano moorweela wa Masu awe oorempwa? Mvahe yootakiherya.

⁴ Moohikhwa minikwa munneemererya wi Piipiliya ookhalano michaka sa Muluku ntakhara achu oothene. Nyenya tho Piipiliya onnooniherya ti mwawiihai xaxaxa nyuwaano munahaalaanyu omwaacamela Yehova. Mwawiihai? Vaavaa munamwaalakhanyaanyu ni omuhuserya Piipiliya, muthokororye mukhalelo munaakhulelaanyu yeeyo Piipiliya onaloceiye oohusihakaani opharihela mmikhalelo sanyu; weerano hiiha munamweeriha Yehova wi aloce ni nyuwaano moorweela wa Masu awe. Eyo enahaala owaataanihaani ni yoowo.​—Ahe. 4:12; Yak. 1:23-25.

⁵ Ntoko yootakiherya, mwaalakhanye nave muupuwelele masu a Yesu awi “muhíthukumanyerye mekhinyu muhakhu va elaponi ya vathi.” Wakhala wi munnahela soothowa sa Omwene va nipuro noopacerya mu okumi anyu, munahaala woona othamalela wa Yehova. Mmukhalelo mukina wakhala wi mohoona wi munnaphwanela okhweiha okumi anyu wi muthokororye soothowa sa Omwene, Yehova onamoolopolaani makupa yaawo munaphwanelaanyu oreherya wi mmwaacamele.​—Mat. 6:19, 20.

6, 7. (a) Omuhuserya Piipiliya onavolowela hai omusivela wahu Yehova nave ni osivela wawe ntakhara hiyaano? (b) Tiivi enaphwanela okhala yoolakelelaahu vaavaa nnapakaahu yoohuserya ya muchu mukhateiye?

⁶ Ohuserya Soorempwa onnavirelela ohiya pahiru makupa yaawo oomunepani nnaphwanelaahu orehererya. Ohuserya tho onnannuwiha othamalela wahu iphiro sa Yehova, oneerihaka omusivela vancipale. Nave vaavaa omusivela wahu Muluku onannuwaaya, osivela wawe ntakhara hiyo onnaacereryeya, nlipihaka waataana wahu ni yoowo.​—Mwaalakhanye 1 Akorinto 8:3.

⁷ Wi nimwaacamele Yehova, ti wookhweleya ohuserya nrino yoolakelela yaphaama. Yohane 17:3 onnaloca: “Nyenya okumi wohimala ti ola, wi yasuwele Nyuwo Mulukuru éparipari, ni Yesu Kristu yowo mwámurummanyu.” Mwawiihiiha, yoolakelelaahu henaphwanela okhala pahiru okhalano nsuweliho nyenya ‘omusuwela’ phaama Yehova ntoko Muchu.​—Mwaalakhanye Mukwaha 33:13; Sal. 25:4.

8. (a) Muupuwelo taani onahaala okhumelela vooloca sa meerelo a Yehova ni Asariya, ntoko etharihiwaaya mu 2 Mamwene 15:1-5? (b) Nsuweliho nahu ntakhara Yehova nnamaliha hai minikwa vooloca sa meerelo awe?

⁸ Namusuwela phaama Yehova, hinirwa nikacamiheya wakhala wi yaweereya ya Mpiipiliyani ennaneeriha okhwa minikwa ntakhara heeni enreiye hiiha. Ntoko yootakiherya, munoona hai mukhalelo Yehova omulankeiye Mwene Asariya o Yuteya? (2 Mam. 15:1-5, BNM) Moone wi naamwi “atxhu yatitelenle oyawo, evahakawo mikutxho ni epahakawo manlela a miri awunkhela,” Asariya mukhateiye “ahetxela phama okhwela wa Apwiya.” Naamwi hiiha, “Apwiya yamuruhela Asariya eretxa ya nrapala areiyeno ophiyerya okhwa.” Nthowa heeni? Yaweereya henaloca. Apwanne enaphwanela onikacamiha naari oneeriha okhwa minikwa ntakhara heeni Yehova aamulankeiye Asariya ohirivo nthowa? Hooye wakhala wi noosuwela phaama iphiro sa Yehova. Eyo enaphitaanyerya osuwela wi wiiliwiili olaka wa Yehova ti ‘wophwanelela.’ (Yer. 30:11, BNM) Nsuweliho nenla ninnaniroromeliha wi naamwi nihisuwenle ntakhara heeni Yehova aamulankeiye Asariya, nnaphwanela ororomela wi othoriha Wawe ti weekhaikhai.

9. Tiheeni enooniherya wi Yehova aakhalano mathowa aphaama a omuruuhela Asariya mareca?

⁹ Nyenya, masu awaaceererya vooloca sa mwaha yoola annaphwanyeya mmakupa makina a Piipiliya. Mwene Asariya aasuweliwa tho ntoko Mwene Usiya. (2 Mam. 15:7, 32) Masu oolikana a 2 Matharihelo 26:3-5, 16-21, annanihusiha wi naamwi Usiya aapanke yeeyo yaari yaphaama vamiithoni va Yehova, moovira wa elukuluku mu okumi awe “àhikusererya ni àhipahula.” Mwa wiirumiha, aapaka muteko yoowo waari wa anamukucho muteko yoowo wahamphwanela opaka. Anamukucho 81 yaamuchara nave yaahiilipixerya wi emuhiihe. Usiya aakhulenle hai? Owo aahooniherya wiirumiha. Usiya “àtepa onanariwa” ni anamukucho. Hiwaavovo minikwa wi Yehova aamuruuhela mareca!

10. Ntakhara heeni elukuluku yoothene hisinachuneya sooleeliherya sawaaceererya, nave nnii nlipihe hai nroromelo nahu ni Yehova mu iphiro sawe seekhaikhai?

¹⁰ Nihicuwale mwaha ene. Hanka wakhala wi masu awaaceererya hanaphwanyeya Mpiipiliya, hiiha ntoko saweereya ikina sa mu Soorempwa? Munahaala ophwanyerya mathowa ekhaikhai ya Muluku? Naari munahaala wuupuwela wi Piipiliya ookhalano miselo sawaakhwanela wi nroromele wi Yehova elukuluku yoothene onapaka yeeyo eri yeekhaikhai nave wi ookhalano meecelo a yeeyo eri yaphaama ni yeeyo eri yoonanara? (Malam. 32:4) Namusuwela Yehova phaama ntoko Muchu, osivela ni othamalela iphiro sawe onahaala wunnuwa ophiyerya wi nihichune sooleeliherya sawaaceererya wa echu eri yoothene onapakeiye. Musuwele wi othamalela wuuwu onahaala wunnuwa mwawiiwanana ni wiilipixerya ohuserya ni wuupuwelela olocihana ni Muluku moorweela wa Masu awe oorempwa. (Sal. 77:12, 13) Eyo enahaala olipiha waataana wanyu ni Yehova, yeerihaka wi okhale weeparipari.

MUNNALOCA NI YEHOVA​—MOORWEELA WA MAVEKELO

11-13. Nnasuwela hai wi Yehova onnawiriyana mavekelo? (Moone eruku yoopacerya.)

¹¹ Mmavekelo ninnamwaacamela Yehova. Ninnamuhakalaliha, ninnamuthamala, nave ninnachariha ohoolela wawe. (Sal. 32:8) Nyenya waataana wanyu ni Yehova waariki okhale weeparipari, munaphwanela ororomela wi onnawiriyana mavekelo.

¹² Achu akina aneemererya wi ovekela ori ntoko pahiru yookhaviherya ya mmuupuweloni. Awo analoca wi munahaala woona waakhuliwa wa mavekelo anyu wakhala wi munnuupuwelela masu anyu ni mukhalelo wa ophwanya nikhaviheryo na nikacamiho nanyu. Ohiya yeeyo, munasuwela hai wi mavekelo anyu eeparipari annawiriyaniwa ni Yehova?

¹³ Muthokororye ela: Ahaakumve orwa veelaponi, Yesu aahoona Yehova aakhulaka mavekelo a akapuro Awe veelaponi. Voocharela, variyari va orummwa awe veelaponi yavathi, Yesu aapharihela mavekelo ntoko mukhalelo wa oloca ni Tiithi awe awirimu. Apwanne aamweerano hiiha​—omaliha ohiyu woothene avekelaka​—arino mmuupuwelo wi Yehova chiryene hanawiriyana? (Luka 6:12; 22:40-46) Anwerya waahusiha oomuchara awe ovekela aarino mmuupuwelo wi ovekela ori ntoko yookhaviherya ya mmuupuweloni? Mwawooneya, Yesu aasuwela wi ovekela ori olocihana weeparipari ni Yehova. Mu ekwaha emoha, Yesu aaloca: “Atithi, kinnathamala Nyuwo wi mwákiwa Miyo. Nyenya kosuwela Miyo wi munnakiwa Miyo mahiku othene.” Nnaphwanela ororomela wi Yehova ti “Awiwa nivekelo.”​—Yoh. 11:41, 42; Sal. 65:2.

14, 15. (a) Mphurelo taani nnakhalaahuno moorweela wa okhala ooluluwanya mmavekelo ahu? (b) Mavekelo yaamukhavihenrye hai murokora mmoha olipiha waataana wawe ni Yehova?

¹⁴ Wakhala wi munnaluluwanya mmavekelo, nwehererye wi Yehova onahaala waakhula, naamwi ohiri mmukhalelo wa wooneya. Naakhulo na mavekelo nnahaala weeriha wi Yehova akhale eeparipari wa nyuwaano. Mu waaceererya, vaavaa munamuleelaanyu Yehova makacamiho anyu, owo onahaala owaacamelani.

¹⁵ Muthokororye yaweereya ya Kathy.b Murokora ola hantonko osiveliwa ni orummwa wa mmacani, naamwi wiiliwiili aapaka makupa mu orummwa. Kathy onnathariha: “Nkaasiveliwa ni orummwa wa mmacani. Chiryene, miyaano nkaasiveliwa weerano. Vaavaa kaahin’yaaka muteko weelapo, mutokweene a muloko aahiloca wi vanihikuni kaamukhala piyoneero eelukuluku yoothene; aakinnya yooveka ya opiyoneero. Kaalakelela okhala piyoneero, nyenya tho kaanavekela mahiku oothene wi Yehova akikhaviherye osivela orummwa wa mmacani.” Apwanne Yehova aahaakhula mavekelo awe? Kathy onnaloca: “Ela eyaakha yaneeraru kiri piyoneero. Ntoko yookhumelela ya omaliha elukuluku yincipale mu orummwa ni waahusiha arokora akina, kinnasuwela phaama weerela onamoona. Olelo tahi wi kinamoona oya mu orummwa wa mmacani​—owo onnatepa okisivela. Opwaha yeeyo, waataana waka ni Yehova woohaaceereryeya opwaha khalai.” Chiryene, mavekelo aamukhaviherya Kathy weeriha waataana wawe ni Yehova okhala weeparipari.

OPAKA MAKUPA AHU

16, 17. (a) Tiheeni nnaphwanelaahu weera wi waataana wahu ni Yehova okhale weeparipari ni wawunnuwa? (b) Nikacamiho taani nnahaala othokororyiwa mmwaha onacharela?

¹⁶ Wunnuwiha waataana wahu ni Yehova mukhalelo wawiikhalelaru. Nnaphwanela weeravo echu wi nimwaacamele Muluku wakhala wi ninnachuna wi eerevo echu ntakhara hiyo. Mu ichu soothene, hankooni ntitelele olocihana moohihiyererya ni Muluku moorweela wa ohuserya ni ovekela. Ntoko yookhumelela, waataana wahu weeparipari ni Yehova onahaala onikhaviherya ovootha saweeha mwaphaama.

¹⁷ Nikacamiho vyakala nnahaala okhumelela, naari otitelela naamwi nipakaka mavekelo moohihiyererya. Mu ilukuluku seiyo, nroromelo nahu wa Yehova nnamuryirya. Nnampacerya okhwa minikwa waakhanle wi Yehova onnawiriyana mavekelo ahu naari wi haanono waataana ni hiyo. Nnii nivoothe hai mikhalelo seiyo ni nroromelo wi waataana wahu ni Muluku okhale weeparipari? Mwaha onacharela onahaala othokororya yeeyo.

[Masu a vathi]