Mmuthamalele Yehova Nave Khalani Ooreelihiwa

“Thamalani Yehova, ntakhara Yowo taphama.”​—SAL. 106:1.

MWAHAALA WAAKHULA HAI?

Tiheeni nnahuseryaahu orweela wa murummwa Paulo vooloca sa othamalela?

Ti mwawiihai wuupuwelela ni ovekela onakhaviheryaaya otitelela okhala oothamalela?

Wuupuwelela mareeliho ahu ananikhaviherya hai ovirelela makacamiho oovila?

1. Ntakhara heeni Yehova tonaphwanela othamalela wahu?

YEHOVA, Namavaha a “yamahala yaphama, ni phatamari óphameya,” tonaphwanela othamalela wahu. (Yak. 1:17) Ntoko Mukukhula ahu oosivela, owo onnakhapelela soochuna sahu soomwiilini ni soomunepani. (Sal. 23:1-3) Owo onnooniherya okhala “votchawela’vo vahu ni ikuru sahu”​—xaxaxa mu ilukuluku sa makacamiho! (Sal. 46:1) Chiryene nookhalano mathowa mancipale a weemererya ni murima woothene yeeyo namarepa a salmo orempeiye: “Thamalani Yehova, ntakhara Yowo taphama; Ntakhara ikharari sawe hasinakutchuwaru.”​—Sal. 106:1.

2, 3. (a) Yawoopiha taani erivovo wuupuwela wi mareeliho ahu ari ookhala ene? (b) Makoho taani nnahaalaahu othokororya mu yoohuserya yeela?

² Ntakhara heeni ori woochuneya wa hiyaano othokororya mwaha yoola wa othamalela? Ntoko eloheryiwaaya, achu a mahiku yaala okuchula hanathamalela. (2 Tim. 3:2) Ancipale anuupuwela wi mareeliho ari ookhala ene. Evoloweliwaka ni elapo ya nakoso ni soovuwiha saya, macikhwi a achu anniilipixerya wiithukumanyerya sincipale, ohiya ohakalala ni yeeyo aryaayano. Hiyaano tho nnanwerya ovoloweliwa ni munepa yoowo woohithamalela. Ntoko Aisarayeli akhalai, nnanwerya oyeleela othamalela onthamwene ahu ni Yehova ni mareeliho yaawo nnaakhelaahu wa yoowo.​—Sal. 106:7, 11-13.

³ Vano, nnahaala othokororya tho tiheeni enahaala weereya vaavaa nnakumanaahu ni makacamiho. Mu ilukuluku seiho, ti wookhweya ovoothiwa ni oyeleela moonelo wa mareeliho ahu. (Sal. 116:3) Nnii niwerye hai okhalano murima woothamalela ni okhapelela yoowo? Nave tiheeni enahaala onikhaviherya okhapelela moonelo waphaama naamwi nikumanaka ni makacamiho oohiyanahiyana? Hankooni noone.

“YEHOVA, MULUKU AKA, SOTIKINIHA SANYU MWÉNRANYU TI SINCHIPALE”

4. Nnahaala okhapelela hai murima woothamalela?

⁴ Wi niwerye okhalano murima woothamalela ni okhapelela yoowo, nnaphwanela osuwela ni wuupuwelela moothamalela mareeliho ahu anarweela wa Yehova ni othokororya saweera sawe soosivela. Vaavaa namarepa a salmo enreiye yeeyo, owo aatikiniheya ni ichu sincipale seiho Yehova aapankeiye.​—Mwaalakhanye Salmo 40:5; 107:43.

5. Tiheeni nnaweryaahu ohuserya orweela wa murummwa Paulo vooloca wa othamalela?

⁵ Nnanwerya ohuserya sincipale orweela wa murummwa Paulo vooloca wa othamalela. Mwawooneya, owo aanuupuwelela mareeliho awe, nave aanathamalela moohihiyererya. Paulo aanasuwela phaama wi aari muchu “òpwalu, ni òhochahocha, ni elomwe.” Hiiha, owo aathamalela naamwi khalai aarino meecelo oonanara, Muluku ni Kiristu yaammorela ikharari nave aavahiwa muteko wa orummwa. (Mwaalakhanye 1 Timoteo 1:12-14.) Paulo tho aanaasivela asinthamwene awe Eekiristu nave wiiliwiili aanamuthamalela Yehova ntakhara mikhalelo saya saphaama ni mvai mu orummwa. (Afil. 1:3-5, 7; 1 Ates. 1:2, 3) Nave vaavaa Paulo aakumaneiye ni makacamiho, owo aanaakuvela omuthamalela Yehova nthowa na nikhaviheryo aakhenleiye orweela wa anna awe oomunepani. (Saw 28:15; 2 Akor. 7:5-7) Tahi yootikiniha wi, masu a Paulo annaceenyerya Akiristu: “Khalani óthamala. . . . olemeihana anene mekhinyu ni masalumo ni mathamalelo ni matchipo a munepa.”​—Akol. 3:15-17.

WUUPUWELELA NI OVEKELA​—SOOHULELA SA OKHAPELELA OTHAMALELA

6. Tiheeni munathamalelaanyu wa Yehova?

⁶ Nnii niwerye hai ochariha yootakiherya ya Paulo ya okhalano ni wooniherya othamalela? Ntoko Paulo, nnaphwanela wuupuwelela yeeyo Yehova opankeiye wa muchu ti muchu a hiyo. (Sal. 116:12) Waakhanle wi mookohiwa, ‘Mareeliho taani a Yehova munathamalelaanyu?’ mwaahaala waakhula hai? Mwaahaala oromola onthamwene anyu ni Yehova? Naari okhurumuweliwa mwaakhenlaanyu nthowa na ororomela mukucho wa Kiristu? Mwaahaala oromola masina anna ni arokora yaawo yookhavihenryeni variyari va makacamiho anyu? Hamooceela omuromola oothela anyu naari aniinyu. Wiivaha elukuluku wi muupuwelele mareeliho anarweela wa Tiithi anyu oosivela, Yehova, enamookhaviheryani okhalano murima woothamalela nave tho enahaala wookhaviheryaani othamalela mahiku oothene.​—Mwaalakhanye Salmo 92:1, 2.

7. (a) Ntakhara heeni nnaphwanelaahu opaka mavekelo a othamalela? (b) Munahaala okhalano mphurelo mwawiihai mu wooneiha othamalela mmavekelo anyu?

⁷ Vaavaa mareeliho ahu anakhalaaya otikitheryeya mmuupuwelo ni mmurima, nnakhala ooreheryeya wi nivekele wa Yehova ni omuthamalela. (Sal. 95:2; 100:4, 5) Ancipale anoona nivekelo pahiru ntoko mukhalelo wa omveka Muluku ichu. Nyenya hiyaano, noosuwela wi Yehova onnahakalala vaavaa nnathamalelaahu yeeyo nryaahuno. Piipiliya ookhalano mavekelo mancipale a vathi va murima a othamalela, ophitaanyerya yaawo apakiwe ni Ana ni Esekiya. (1 Sam. 2:1-10; Yes. 38:9-20) Mwawiihiiha naatakiherye akapuro yaale oororomela yoonihenrye othamalela. Aai, mmuthamalele Yehova mu nivekelo wa mareeliho yaawo muryaanyuno. (1 Ates. 5:17, 18) Mu weerano hiiha munahaala okhalano mareeliho oohaalakhanyeya. Munepa anyu onahaala ohakalala ni osivela wanyu wa Yehova onahaala wunnuwa nave munahaala waataana ni yoowo.​—Yak. 4:8.

8. Tiheeni enahaala oniyeleeliha othamalela soothene Yehova opankeiye wa hiyaano?

⁸ Ntakhara heni nnaphwanelaahu okhalano ephoole wi nihiyeleele othamalela wahu epewe ya Yehova? Nthowa nawi noorava mathitimanelo oohithamalela. Muthokororye: Asitiithi ahu oopacerya, Aatamu ni Haava, yaari mu emaca ya parataiso, soochuna saya soothene saanahakalalihiwa, nave awo yaakhalano ewehereryo ya wiikhaleleru mmurecele. (Map. 1:28) Nave hiyaathamalenle mareeliho aya. Awo yaakhalano soochuna sincipale. Ntoko yookhumelela, yaayeleela soothene. (Map. 3:6, 7, 17-19) Nrukureryiwaka ni elapo yoohithamalela, ti wookhweya hiyaano tho oyeleela moonelo wa soothene seiho Yehova onaneereleiye. Nnanwerya opacerya woona onthamwene ahu ni yoowo ohikhala echu. Nnanwerya oyeleela othamalela ekari nryaahuno ya opaka makupa a onna wa elapo yoothene. Nnanwerya okhala awuukhuwa ni ichu sa elapo yeela enahaala ovira moohilekela. (1 Yoh 2:15-17) Wi nsepe sookhumelela seiho soonanara, nnaphwanela wuupuwelaka mareeliho ahu ni omuthamalela Yehova elukuluku yoothene ni ekari nryaahuno ya okhala achu awe.​—Mwaalakhanye Salmo 27:4.

VAAVAA NNAKUMANAAHU NI MAKACAMIHO

9. Vaavaa nnakumanaahu ni makacamiho, ntakhara heeni nnaphwanelaahu wuupuwelela mareeliho ahu?

⁹ Okhalano murima woothamalela onahaala onikhaviherya ovilela makacamiho ovila. Hiyaano ninnuukhuwa wakhala wi mootutuxa nookumana ni makacamiho a otoroka okumi, ntoko ohiroromela wa othelana ahu, ireca, okhwa wa osiveliwa ahu naari ipahu sa maphacuwelo. Mu ilukuluku seiho, nnahaala okhala oolipihiwa vaavaa nnuupuwelelaahu sa mareeliho ahu. Muthokororye saweereya seeparipari inacharela.

10. Irina aphunre hai moorweela wa wuupuwelela mareeliho awe?

¹⁰ Irinaa, piyoneera a elukuluku yoothene a Amerika Oomoko, atheliwe ni mutokweene a mmuloko yoowo ooneihale ohiroromeleya nave aamuhiya owo ni anamwane aya. Tiheeni yaamukhavihenrye Irina otitelela omulapela Yehova moororomeleya? Owo onnaloca: “Kinnamuthamalela Yehova okithokororya ntoko muchu. Moorweela wa wuupuwelela mareeliho aka nihiku nnihiku, kinnawerya woona ekari ya osuweliwa ni osiveliwa ni Tiithi ahu ookhapelela a wirimu. Koosuwela wi owo harwa akihiya.” Naamwi Irina aakumana ni makacamiho mancipale mu okumi awe, ohakalala wawe onnamukhapelela, nave ehime ya ohakararya wa akina.

11. Tiheeni yaamukhavihenrye Kyung-sook ovilela ni ereca yawoopiha?

¹¹ Kyung-sook, yoowo onakhala o Asiya, aarumeela ntoko piyoneero ni iyawe opwaha iyaakha 20. Mootutuxa, yaakhumelela ereca yoohipenuxeya nave aaleeliwa wi onahaala okhalano okumi miyeeri miraru naari mithanu nammoha. Naamwi yene ni iyawe yaakumanne ni makacamiho mancipale, makhaani ni matokweene, awo wiiliwiili yaniisoona okhala oororomela vooloca wa okumi aya. Owo aaloca: “Mukhalelo wa okumi aka waakithananiha. Kaanoona wi kaayeleela ichu soothene, nave kaatepa oceecheya.” Tiheeni yaamukhavihenrye ovilela? Kyung-sook onnaloca: “Ohiyu woothene kihaakumve okona, kaanavekela mmasu oovuwa vooloca wa ichu thanu sa nihiku kaathamalelaaka. Nyenya kaaniisoona okhala oomaaleleya nave kaanooniherya osivela waka wa Yehova.” Kyung-sook aphunre hai orweela wa mavekelo yaawo? Owo onnaloca: “Kaaphiyerya woona wi Yehova onnanikhaviherya mmakacamiho nave wi ninnakhalano mareeliho mancipale opwaha makacamiho.”

12. Jason aphwannye hai olipiheya amanle omuyeleela mwaariye?

¹² Jason, yoowo onarumeela o Efiliyale ya Afrika, ori mmuteko wa elukuluku yoothene opwaha iyaakha 30. Owo onnaloca: “Iyaakha thanu napiili ivirale, koomuyeleela mwaaraka mu okhwa, nave wiicela ti wookhulumula. Wuupuwela yeeyo yeeren’ye ni mwaaraka variyari va ereca awe enakhala yookhulumula.” Tiheeni yaamukhavihenrye ovilela? Owo onnaloca: “Vakina vaya kaanuupuwela elukuluku yoohakalaliha miyaano ni mwaaraka naamalihaahu vamoha, nave kaanamuthamalela Yehova mu nivekelo ntakhara yeeyo. Kaanoona okhala ootaphuwa nave kaanamuthamalela Yehova wiiliwiili ntakhara saweereya. Othamalela woopaka ohiyana otokweene mmoonelo aka. Nivano kinnoona wiicela wa oyeleela, nyenya omuthamalela Yehova nthowa na okhalano othela waphaama ni ekari ya omurumeela ni muchu yoowo aamusivela Muluku ennatoroka moonelo aka.”

13. Tiheeni yaamukhavihenrye Sheryl ovilela waayeleela amusi awe?

¹³ Vaavaa Echeku Etokweene yaakhumelenlaaya o Filipina aveeri mu 2013, Sheryl, yoowo aarino miyakha 13 sooyariwa, aayeleela ichu soothene. Owo aaloca: “Kooyeleela empa aka, ni amusi aka ancipale.” Amannya, atiithi awe ni anna awe araru yaakhwa mu epahu. Tiheeni enamukhaviherya Sheryl ovilela nikacamiho ahiceechen’ye? Owo ookhalano murima woothamalela nave onnatitelela wuupuwela mareeliho nlelo oreiyeno. “Kaahoona soothene anna ni arokora yaapankaaya wi yaakhaviherye ni waalipiha yaale yaachuna nikhaviheryo. Kaasuwela wi anna orukurerya elapo yaanavekela wa miyo.” Owo onnaaceererya: “Kinnathamalela vancipale nthowa na Yehova okhala Muluku aka. Wiiliwiili onnanivaha ichu nnachunaahu.” Aai, wuupuwela mareeliho ahu murece wi nihivoothiwe ni othanana. Murima woothamalela onnanikhaviherya oya vahoolo moohipwacha makacamiho nnakumanaahuno.​—Aef. 5:20; mwaalakhanye Afilipi 4:6, 7.

“NTO MIYANO OHAKALALA WAKA KINAPHWANYA W’APWIYA”

14. Yoororomeliha taani yoohakalaliha nnaweheryaahu? (Moone eruku yoopacerya.)

¹⁴ Ovinyerya khalai, achu a Yehova annahakalala ni mareeliho aya. Ntoko yootakiherya, emanle woopoliwa wa Farawo, ni anakhoco awe mu Eniya Yooxeerya, Aisarayeli yaahooniherya ohakalala waya mu wiipa macipo oothamalela. (Muk. 15:1-21) Olelo, mareeliho ahu anaphitaanyerya ewehereryo ya woopoliwa mu ichu soothene sinatannya wiicela. (Sal 37:9-11; Yes. 25:8; 33:24) Nkaanyiheryani mukhalelo nnahaalaahu okhala Yehova aatoloxa amwiicani awe oothene ni onivoliiha mu elapo evyaani ya murecele ni ekhaikhai. Nihiku nlo nnahaala okhala noothamalela!​—Yaw. 20:1-3; 21:3, 4.

15. Tiheeni mulakelenlaanyu weera mu eyaakha ya 2015?

¹⁵ Ninnaweherya waakhela mareeliho oohaalakhanyeya oomunepani oorweela wa Yehova variyari va eyaakha ya 2015. Nyenya, nnahaala okumana ni makacamiho. Moohipwacha yeeyo enii yeereye, noosuwela wi Yehova harwa anihiya. (Malam. 31:8; Sal. 9:9, 10) Owo onahaala otitelela onivaha ichu soothene nnachunaahu wi nimurumeele moororomeleya. Mwawiihiiha hankooni nikhale oolakelela okhalano muupuwelo ntoko wa mulipa miririmo Hapakukhi, yoowo aalonce: “Mukukhu horwatho omela, mpesa harwatho avaha sawima, miri sovaha makhurwa inamuhiya ovaha sawima. Imatxa inamuhiya ovaha sohepha, mihuwo inamurimelamo munikholani mwaya, imope mmakholani mwaya. Nto miyano ohakalala waka kinaphwanya w’Apwiya, murima wòkhela ntakhara Muluku ti nvulusa aka.” (Hab. 3:17, 18, BNM.) Aai, variyari va eyaakha ya 2015, hankooni nuupuwele mareeliho ni ochariha yoorepa ahu ya eyaakha 2015: “Thamalani Yehova, ntakhara Yowo taphama.”​—Sal. 106:1.

[Nsu na vathi]

[Yooleeliherya va epaaxina 7]

Yoorepa ahu ya eyaakha 2015: “Thamalani Yehova, ntakhara Yowo taphama.”​—Salmo 106:1

[Yooleeliherya va epaaxina 11]

“Kinnathamalela vancipale nthowa na Yehova okhala Muluku aka.”​—Sheryl