MWAHA WA EKAAPA | OLAMULELO WOOHIKHALANO MAKHWANKWA

Omwene wa Muluku​—Olamulelo Woohikhalano Makhwankwa

“Omakuchuwelo wa nihiku, anamuteko anakhala achu vyakala nave oothene ahu ninnapaka makupa a nloko.” Ela elociwe ni mutokweene Nicaragua vaavaa aathariheiye ntakhara heeni ooneiye wi ori woovila omaliha olamulelo wa makhwankwa.

Hamuneemererya wi nloko na achu ti noohiroromeleya, yeerihaka wi olamulelo okhale wa makhwankwa? Wakhala wi ti hiiha, olamulelo wa makhwankwa honaphwanela orweela mwa achu. Piipiliya onnathariha olamulelo yoowo ntoko​—Omwene wa Muluku, olamulelo yoowo Yesu aahusinheiye oomuchara awe ovekela.​—Mateyu 6:9, 10.

Omwene wa Muluku olamulelo weeparipari wa wirimu yoowo onalamula. Owo onahaala oraceela olamulelo woothene wa achu. (Salmo 2:8, 9; Yawupulula 16:14; 19:19-21) Variyari va mareeliho yaawo Omwene onahaalaaya oruuha wa achu onnaphitaanyerya omalihiwa wa olamulelo wa makhwankwa. Muthokororye mikhalelo mithanu nammoha sa Omwene seiyo inaroromeliha yeela.

1. IKURU

NIKACAMIHO: Olamulelo wa achu onatikitheryeya mu anamurala aya ikwaha sincipale moorweela wa soolivela ni misokho. Waacereryeya yoola wa ikhorowa onnaweeriha anamuteko akina wiiya, akina anneemererya makhwankwa wa yoowo onachuna okukuceliwa misokho sawe naari soolivela ikina seiyo olamulelo onaphwanelaaya. Eyo ennakhala yookhovelela​—olamulelo onnaaceererya misokho wi elivele sooyeleela, nave eyo ennaaceererya makhwankwa. Mmukhalelo ntoko yoowo, achu aphaama annahooxeya vancipale.

OMALIHA: Omwene wa Muluku onaakhela ikuru moorweela wa Muluku oowerya woothene, Yehova.a (Yawupulula 11:15) Hokhala woochuneya olivela misokho wi Omwene owo olamulele. Nyenya, ‘owerya wothene’ wa Muluku ni ikharari sawe onnaroromeliha wi Omwene onahaala waakhwaniherya soochuna sa anamurala oothene.​—Isaiya 40:26, Bibiliya Nsu na Muluku, BNM; Salmo 145:16.

2. OLAMULELO

NIKACAMIHO: Susan Rose-Ackerman oromoliwe mmwaha ovinre, ooloca wi wiilipixerya omaliha makhwankwa, “onaphwanela opacerya wa anamuteko a vasulu.” Olamulelo wa achu onnayeleela ncicimiho vaavaa awo aneereryaaya omaliha makhwankwa variyari va mapilisa nave yeemererya variyari wa anamuteko a vasulu. Ophiyerya tho olamulelo waphaama wa achu onnavoloweliwa ni makhwankwa. Ntoko Piipiliya onaloceiye, “mw’elaponi hamo mutxhu awokololowa, onera ya phama ahintonko otxheka.”​—Eklesiyaste 7:20, BNM.

OMALIHA: Moohiyana ni achu oohiphaameya, Yesu Kiristu, yoowo Muluku omuthanlileiye wi akhale Mwene a Omwene, hapaka yoonanara. Yesu aahooneiya yeela moorweela wa okhooca makhwankwa matokweene a ​—“ilapo sothe sene sa elapo ya vathi, ni nchichimiho naya.” Yesu aaroromelihiwa yeela waakhanle wi oomvaha mathamalelo atheru mulamuleli a elapo, Musaserya. (Mateyu 4:8-10; Yohane 14:30) Naamwi vaavaa Yesu aahooxiweiye ophiyerya okhwa, owo aatitelela okhapelela ororomeleya wawe ophiyerya akhooca yoowurya yeeyo yaahaala okukuca wiicela wawe nyenya emweerihaka ohiwerya olipelela mikhalelo sawe. (Mateyu 27:34) Vano ooviihiwa ni Muluku wa okumi wirimu, Yesu onnooniherya wi onnaphwanela olamulela mu Omwene.​—Afilipi 2:8-11.

3. OTIKITHERYEYA

NIKACAMIHO: Ilapo sincipale namuthanle onneereya wiiliwiili, weiwo achu anaathanlaaya anamuteko ohiroromeleya okhwipi wa ekupweete. Eparipari ti yawi, mikipici ni namuthanle ti soosareya makhwankwa, naamwi mu ilapo sooreela. Moorweela wa mukipici wa sooveleela, muhakhu onanwerya waavolowela alamulele ahiihaano ni oomwaahiyu.

Justice John Paul Stevens, a Nikhuuru na Etripunali Etokweene ya EUA, oorepa wi ovolowela yoowo onnoopopiha “ohiya pahiru ophaameya ni ophwanelela wa Olamulelo nyenya tho nroromelo na achu wa yene.” Hiwaavo minikwa wi achu ancipale orukurerya elapo anoona ipartitu sa epoliitika okhala sa makhwankwa opwaha mareheryo oothene.

OMALIHA: Hori woochuneya Omwene wa Muluku opaka mukipici naari namuthanle a makhwankwa ntakhara olamulelo owo ti wootikitheryeya ni woohimala. (Taniyeli 7:13, 14) Woona wi Mwene aya othanliwe ni Muluku, Omwene owo honatikitheryeya mu namuthanle nave horwa okuchuwa. Otikitheryeya waya onnaroromeliha wi ichu soothene oneeraaya ti saphaama mu mphurelo wa achu.

4. MALAMULO

NIKACAMIHO: Akhweya munanwerya wuupuwela, wi waacererya malamulo mavyaani enahaala orehererya ichu. Nyenya, anamahuserya ahoona wi ikwaha sincipale, waaceererya malamulo onnaaceererya makhwankwa. Mwawaacererya, malamulo yaawo apakeliwe okukuca makhwankwa toovila otikitherya nave haniiweleliwa.

OMALIHA: Malamulo a Omwene wa Muluku ta vasuluxa opwaha a olamulelo wa achu. Ntoko yootakiherya, ohiya otikitherya yoochariha yoorakama wa ichu soophwanela weera ni soohiphwanela weera, Yesu oovaha yeeyo eniichaniwa Nlamulo na Mphimo Woolikana. Owo aaloca: “Itchu sothene mwatchunaka wi atchu yerele nyuwo, nyuwo’tho muwerele yawo sawihiha.” (Mateyu 7:12) Echu yoochuneyaxa ti yawi, malamulo a Omwene annamaliha mathowa ni saweera. Yesu aaloca: “Onarwa-osivela mukhwá ntoko onirá wisivela mwanene mekhá.” (Mateyu 22:39) Moohikhwa minikwa, Muluku yoowo onawerya waalikhela murima, tonaphwanela otikitherya malamulo yaala.​—1 Samuwele 16:7.

5. MATHOWA

NIKACAMIHO: Echu enaaceererya makhwankwa nri nrima ni ochuna wiiphwanyerya. Anamuteko a olamulelo ni anamurala wiiliwiili awo annooniherya mikhalelo seiho soonanara. Mu okumuwa wa elooxa o Seoul oromoliwe mmwaha ovinre, anamuteko yaahaakhela makhwankwa a alipa ooteka yaawo yaasuwela wi waahaala okhala wookhweya ovaha makhwankwa ohiya opharihela soophwanela otekano.

Wi emale makhwankwa, achu anaphwanela ohusihiwa mukhalelo wa ovootha mathowa ntoko nrima ni ochuna wiiphwanyerya. Olamulelo wa achu hiwaano nchuno ni owerya otikitherya mareheryo yaala a ohusiha.

OMALIHA: Omwene wa Muluku onnawaniha makhwankwa ovinyerya vathi moorweela wa waahusiha achu mukhalelo wa ovootha mathowa anatannya makhwankwa.b Ovyakiha yoola onnaakhaviherya ‘okhala ahihano m’munepani wa murima aya.’ (Aefeso 4: 23) Awo anahuserya ohiya nrima ni wiiphwanyerya ni okhala oohakalalela ni waapwacha akina.​—Afilipi 2:4; 1 Timoteo 6:6.

6. ANAMURALA

NIKACAMIHO: Naamwi mmukhalelo waphaama ni ohusiheya mmeecelo, achu akina anahaala othanla okhala oohiiwelela ni ohiroromeleya. Anamahuserya anneemererya wi ti nthowa nene olamulelo wa achu honawerya omaliha makhwankwa. Echu enawehereryiwa pahiru ori ovukuwa sookhumelela sa makhwankwa.

OMALIHA: Muthukumano wa Owaniha Makhwankwa wa Maloko Awiiwanana, onnaloca wi yaariki emale makhwankwa, olamulelo onaphwanela ovuwiha “ororomeleya ni ekhaikhai.” Ela yoolakelela yaphaama, nave Omwene wa Muluku onneerano sincipale ohiya pahiru ovuwiha makhalelo yaala​—owo onnaalamulela anamurala a Omwene yoowo. Piipiliya onnaloca wi “ókhalela nrima” ni “awákha” hevolowa mu Omwene.​—1 Akorinto 6:9-11; Yawupulula 21:8.

Achu ananwerya ohuserya wiiwelela malamulo a meecelo a vasulu, ntoko Akiristu oopacerya yenraaya. Ntoko yootakiherya, vaavaa oohuserya iichaniwa Simoni eerenryeiye waaliva arummwa wi akhaleno owerya woomunepani, awo yaakhooca makhwankwa nave yaamuleela: “Tcharuwa yonanara ela” ya murima. Simoni aahoona yawoopiha ya yoochuna awe yoonanara, aahaaveka wi evekele wa yoowo wi awerye ovootha yoochuna awe.​—Saweriwa Tarummwa 8:18-24.

MUKHALELO WA OKHALA NAMURALA A OMWENE

Moohipwacha nloko nanyu, mookhalano ekari ya okhala namurala a Omwene wa Muluku. (Saweriwa Tarummwa 10:34, 35) Marehereryo a ohusiha yoowo Omwene onavahaaya​—yaawo hiihaano anaphwanyeya orukurerya elapo​—anahaala owooniheryaani mukhalelo wa okhala namurala a Omwene. Anamoona a Yehova anahaala ohakalala wooneiha marehereryo a yoohuserya ya Piipiliya mahaleene, yeeyo enapaka aminutu vakhaani va esumana. Variyari va ichu ikina, munahaala ohuserya sincipale vooloca sa “Mitchaka Yaphama ya Omwene wa Muluku,” ophitaanyerya ti mwawiihai onahaalaaya omaliha olamulelo wa makhwankwa. (Luka 4:43) Ninnoowopani wi muloce ni Anamoona a nipuro nanyu naari mpharihele site ahu, jw.org.