MWAHA WA EKAAPA | MWAAMUSIVELIWA OMUHUSERYA PIIPILIYA?
Marehereryo A Omuhuserya Piipiliya Wa Oothene
Anamoona a Yehova aasuweliwa phaama nthowa na olaleerya vanlakani. Apwanne nyuwaano moosuwela wi ninneeciha tho marehereryo a omuhuserya Piipiliya?
Mu 2014, Anamoona a Yehova oopwaha 8.000.000 mu ilapo 240 yaaheeciha soohuserya sa Piipiliya soophiyerya 9.500.000 mweeri ti mweeri.a Mweeparipari, waaca wa achu anamuhuserya Piipiliya ni hiyaano annapwaha waaca wa achu a ilapo 140!
Wi yaakhwanihe muteko yoola wa ohusiha, Anamoona a Yehova annaapaka Apiipiliya, aliivuru, irevista ni ikaruma ikina sa omuhuserya Piipiliya macikhwi macikhweene eyaakha ti eyaakha—mu ilocelo 700! Wiilipixerya wuuwu onnaakhaviherya achu omuhuserya Piipiliya mu elocelo aya.
MAAKHULO A MAKOHO AWUNLAANA VOOLOCA SA MAREHERERYO A OMUHUSERYA PIIPILIYA
Yoohuserya eyo eneeriwano hai?
Ninnathanla miyaha soohiyanahiyana sa Mpiipiliyani nave ninnaalikhela soorepa siniiwanana ni miyaha seiyo. Ntoko yootakiherya, Piipiliya onnaakhula makoho ntoko ala: Muluku taani? Owo ta mukhalelo taani? Ookhalano nsina? Owo onakhala woowi? Ti wooweryeya waataanano? Echu yoovila ori osuwela makupa taani a Piipiliya arino maakhulo.
Wi naakhaviherye achu ophwanya maakhulo, ikwaha sincipale nnampharihela liivuru Piipiliya Onahusiha Eheeni Chiryene?b Liivuru ola opakiwe wi aakhaviherye achu wiiwexexa mahusiheryo oochuneya a Piipiliya. Owo ookhalano soohuserya vooloca sa Muluku, Yesu, ohooxeya wa achu, ovinya mookhwani, mavekelo mi miyaha mikina.
Yoohuserya eyo eneeriwano liini nave woowi?
Yoohuserya eneeriwano mu elukuluku nnipuro nri noophwanelela wa nyuwaano.
Enamaliha elukuluku hai?
Achu ancipale annamaliha ewora emoha va esumana wi emuhuserye Piipiliya. Nyenya olekela wa ohuserya iwo onnatorokeya. Nnahaala otoroka wi niiwananihe ni mukhalelo anyu. Akina anahuserya pahiru aminutu 10 naari 15 va esumana.
Yoohuserya eyo enaliveliwa kavi?
Ohuserya ni ikaruma sa ohuseryano hasinaliveliwa. Ela enniiwanana ni masu a Yesu wa oomuchara awe: “Mwáhákhela siyo ene, vahani siyo ene.”—Mateyu 10:8.
Ohuserya woothene onamaliha elukuluku hai?
Olekela naari waakuveya wa yoohuserya onii okhale mwa nyuwo. Liivuru Piipiliya Onahusiha Eheeni Chiryene? orino miyaha 19. Nyuwo munahaala ohuserya miyaha seiya mwawiiwanana ni elukuluku anyu.
Apwanne kinaphwanela okhala Namoona a Yehova?
Hooye. Hiyaano ninnasuwela wi muchu ti muchu onnaphwanela olakelela yeeyo onahaaleiye weemererya. Nyenya achu yaawo arino masuwelelo oochuneya a Piipiliya, anahaala owerya opaka yoolakelela yaphaama.
Ti woowi kinahaalaaka ophwanyawo sooleeliherya sawaaceererya?
Site jw.org/ngl onnavaha sooleeliherya seeparipari vooloca sa soororomela ni miteko sa Anamoona a Yehova.
Kinii kiveke hai yoohuserya ya Piipiliya?
● Murepe yooveka anyu mu interneti mu www.jw.org/ngl.
● Murepele nipuro nimoha nawaacamela nnaphwanyeya va epaaxina 2 ya erevista yeela.
● Muloce ni Anamoona a Yehova a muceche anyu.
[Masu a vathi]
a Yoohuserya ya Piipiliya eneeriwano ni muchu mmoha naari nikhuuru na achu.
b Olaleeryiwe ni Anamoona a Yehova. Annapakiwa aliivuru macikhwi macikhweene oopwaha 230 mu ilocelo soophiyerya 260.
[Ekaaxa va epaaxina 5]
“Miyaano nkaasiveliwa ohuserya oxikola, nyenya yoohuserya ela yaari yoohakalaliha. Ichu kihusenryaaka ti soolipiha vancipale!”—Katleko, Afrika Oohico.
“Yoohuserya eyo yaahaakhula makoho aka oothene ni ichu ikina.”—Perta, Mexiko.
“Yoohuserya ya Piipiliya yeeriwano owaani mu elukuluku yoophwanelela wa miyaano. Ti yeela kaachunaaka chiryene!”—Esekiyeli, Prasili.
“Ohuserya iwo waamaliha aminuutu 15 naari 30—vakina vaya waanalekela—mwawiiwanana ni mukhalelo aka.”—Viniana, Australiya.
“Ohuserya waari wa mahaleene—waari wootikhiniha!”—Aime, Penin.
“Muhusiha aka a Piipiliya aari oopixa murima ni eepewe. Hiyaano naahaataana.—Karen, Irlanta Oomoko.
“Achu ancipale annamuhuserya Piipiliya ehikhanle Anamoona.”—Tenton, Inklatera.
[Ekaaxa va epaaxina 7]
NIKHAVIHERYO WA ICHOKO
“Vaavaa mwaaraka aapacenryeiye omuhuserya Piipiliya, kaahoona matorokelo awe. Okumi wa echoko ahu waareheryeya. Kichunaka osuwela yeeyo owo aahuseryeiye, kaaveka tho ohuserya. Yeeyo kihusenryaaka yookeeriha okhala muchu aphaama. Omuhuserya Piipiliya woheeriha wi echoko ahu ekhale yawiiwanana.”—Esekiyeli.
“Vaavaa kaapacenryaaka omuhuserya Piipiliya, kaacharuwa opharihela mirece, ohapaliwa, nave kaahuserya ovareryela owali aka. Empa aka ti yoophwaneliwa ni yooreheryeya. Kinnacicimiha vancipale emusi aka nave kinnasiveliwa oweerela ichu inaahakalaliha. Vano kiri oohakalala.”—Karen.
“Achu akina yaahaakaaha nthowa na omuhuserya waka Piipiliya. Nyenya aiyaka yaakhaviherya yoolakelela aka eriki: ‘Nkinapwacha yeeyo achu analocaaya. Echu eri yoochuneya wa miyaano—ori woona matorokelo aa aphaama. Otitelele weera yeeyo oneeraawe.’ Okumi wa echoko ahu hiwantonko okhala waphaamaxa opwaha hiihaano!”—Viniana.