Ntakhara Heeni Wiikariwa Mmulokoni Marehereryo Oosivela

“VAAVAA kiiwalaaka yoolokoha wi mwanaka mwaamulopwana ohiikariwa mmulokoni, elapo yaakiyevela,” onnaloca Xuliano. “Owo aari mwanaka oopacerya, nave naatepa waataana; naanapaka ichu sincipale vamoha. Aari mwaana a ntakiheryo naphaama, nave mootutuxa aapacerya okhalano meecelo ooheemereryeya. Ikwaha sincipale mwaaraka aananla, nave nkaasuwela mukhalelo wa omuhakararya. Ikwaha soothene naaniikoha waakhanle wi naahesa ntoko asitiithi.”

Ntakhara heeni enalociwaaya wi wiikariwa mmulokoni marehereryo a osivela eniiha etannyaka wiicela otokweene? Taavi ari mathowa a mu Soorempwa a opaka yoolakelela yeela? Nave tiheeni chiryene enamweeriha muchu wiikariwa mmulokoni?

ICHU PIILI INEERIHA WIIKARIWA

Yoopacerya, Namoona apaka yoocheka etokotoko. Yanaawiili, wakhala wi hanacharuwa yoocheka awe. Ichu seiya piili sinnakumiherya wiikariwa wa Namoona a Yehova.

Naamwi Yehova ahinivekaka okhala oophaameya, owo ookhalano meecelo aweela onaweheryeiye wi alapeli awe echariheke. Ntoko yootakiherya, Yehova onnaloca moonyesererya wi nsepe soocheka itokweene ntoko mararuwo, othamalela soophwaniherya, wiiya, wiipha ni onamulosiwe.​—1 Akor. 6:9, 10; Yaw. 21:8.

Hamuneemererya wi meecelo aweela a Yehova toophwanelela nave wi annanaakiha? Taani ohinasiveliwa okhala mmureceleni, ni achu aphaama yaawo anaroromeleya? Ninnaphwanya mikhalelo seiya variyari va anna ni arokora oomunepani, yaawo anathamalela yoolaiherya nnapakaahu mu elukuluku ya wiiveleela wahu wa Muluku wi nikhaleke mwawiiwanana ni ohoolela onaphwanyeya Mmasu awe.

Hanka wakhala wi Mukiristu oopatisiwa oopaka yoocheka etokotoko nthowa na oceecheya woomuchu? Akapuro oororomeleya akhalai yaapaka soocheka ntoko seiyo, nyenya Muluku haanyanyanle moomalela. Mwene Tavite mmoha a yaawo. Tavite aapaka mararuwo ni wiipha; naamwi hiiha mulipa a miririmu Natani aamuleela: “Apwiya aholevelela.”​—2 Sam. 12:13, BNM.

Muluku aalevelela yoocheka ya Tavite nthowa nawi aaheemererya yoocheka awe. (Sal. 32:1-5) Mwawiihiiha, kapuro a Yehova onahaala wiikariwa pahiru wakhala wi hacharunwe naari onnatitelela opaka yoonanara. (Saw. 3:19; 26:20) Wakhala wi mulipa oocheka hoonihenrye ocharuwa weeparipari atokweene a muloko anarumeela mu nikhuuru noothoriha, anahaala omwiikara muchu owo.

Woopaceryani, akhweya nnahaala woona wi yoolakelela epakiwe ya omwiikara namacheka tahi yoophwanelela, xaxaxa wakhala wi naakhalano onthamwene ni yoowo. Elukuluku eri yoothene, Masu a Yehova annanivaha mathowa oophwanelela wi neemererye wi yoolakelela eyo ti yoosivela.

WIIKARIWA ONNAAKHAVIHERYA OOTHENE AVOLOWELIWE

Yesu ohooniherya wi “miruku eneriwa yekhaikhai ni miteko aya.” (Mat. 11:19) Yoolakelela yamiruku ya omwiikara namacheka oohicharuwa ennakumiherya mphurelo waphaama. Muthokororye sookhumelela chaaru:

Omwiikara namacheka ennacicimiha nsina na Yehova. Woona wi ninneerela onamoona nsina na Yehova, meecelo ahu oonanara annavolowela nsina nawe. (Yes. 43:10) Hiiha ntoko meecelo a mwaana anaruuhaaya ncicimiho naari munyemu wa asitiithi awe, achu anahaala omucicimiha naari omunyemula Yehova moorweela wa sootakiherya saphaama naari soonanara seiyo anoonaaya mwa achu yaawo aneerela onamoona nsina nawe. Nsina naphaama na Muluku nnahaala ocicimihiwa wakhala wi achu yaawo aneerela onamoona nsina nenlo annachariha meecelo a Yehova. Mukhalelo yoola onnalikana ni elukuluku ya Esekiyeli vaavaa maloko awaacamela yaaphitaanyeryaaya nsina na Yehova ni Ayuuta.​—Esek. 36:19-23.

Nnahaala oruuhela munyemu nsina naweela na Muluku wakhala wi ninnacapaheya. Murummwa Petro aahaalopola Akiristu: “Ntoko anamwane awiwelela muhíphwaniheryetho ni minkhela yakhalai, mwéranyu muhisuwelelaka; nyenya ntoko Yowo anawitchanani nyuwo oríye awéla murima nyuwotho khalani awéla murima m’makhalelo anyu othene, ntakhara turempwaya, Khalani awéla murima, ntakhara Miyo ka awéla murima.” (1 Pet. 1:14-16) Meecelo aweela annaruuha ncicimiho wa nsina na Muluku.

Wakhala wi Namoona a Yehova oopaka yoonanara, moohikhwa minikwa asinthamwene ni amwaacamani anahaala osuwela. Meerelo a wiikara annooniherya wi Yehova ookhalano achu aweela yaawo anahooleliwa ni Soorempwa wi yiikhaleleru aweela. Muchu yoowo ahaari namoona aaruule mmithukumano mu Empa ya Omwene o Suisa aaloca wi aachuna opaka makupa a muloko. Murokora awe aarimwiikariwa nthowa na mararuwo. Muchu owo aahiloca wi achuna akhala mmarehereryo yaawo “ahineemererya meecelo oonanara.”

Wiikara onnakhapelela weela wa muloko Weekiristu. Murummwa Paulo aahaalopola Akiristu ntakhara yawoopiha ya weemererya wi mulipa oocheka atitelele mu nikhuuru naya. Paulo aalikanyiha ovolowela woonanara wa achu yaawo, ni ovolowela wa yooruruvaliha. Owo aaloca: “Yoruruvaliha vakhani ennaruruvaliha mvikiri wothene.” Voocharela aahaalopola: “Mvihemvoni onanara owo véri va nyuwo mekhinyu.”​—1 Akor. 5:6, 11-13.

Akhweya, “onanara owo” olociwe ni Paulo aapaka ocapaheya moohicharuwa. Nave achu akina a muloko yaapacerya weemererya meecelo awe. (1 Akor. 5:1, 2) Waakhanle wi yoocheka yeela yooleveleliwa, Akiristu akina yaahaala ocharihaka sookhovelela soonanara sa ocapaheya seiyo saapakiwa mu epooma yeeyo yaakhalaayawo. Ohipwacha yoocheka yaweeriwa mwaayiini yaahaala oceenyerya moonelo woonanara ohiniiwanana ni meecelo oomuluku. (Ekle. 8:11) Opwaha yeeyo, namacheka oohicharuwa aahaala okhala ntoko “maluku oovitheya mmahini” nave aahaala opahula nroromelo na akina mmulokoni.​—Yuta 4, 12, Tradução do Novo Mundo, NM.

Wiikariwa onnamweeriha namacheka ocharuwa. Ekwaha emoha Yesu aaloca sa mmiravo yoowo aakhumme vachokoni va asitiithi awe nave ayeleela muhakhu awe ntakhara meecelo oonanara. Mmiravo oorimeela aahuserya mmukhalelo woovila wi okumi ocai wa echoko ya asitiithi waari watheru ni woothananiha. Vookuchula mmiravo aahiisuupuwelela, acharuwa, nave apaka marehereryo a okookela emusi awe. (Luka 15:11-24) Mukhalelo Yesu omutharinheiye tiithi oosivela yoowo onahakalala vaavaa mwanawe onarukunuxeiye murima onnanikhaviherya wiiwexexa moonelo wa Yehova. Owo onnanroromeliha: “Honakisevelaru mano omona mutxhu ònanara murima akhwaka nto kinatxhuna omona ahin’ye mukhalelo awe wonanara ni akhanle.”​—Ezek. 33:11, BNM.

Moolikana, yaale yiikariwe ahinapaka makupa a muloko Weekiristu​—emusi aya yoomunepani​—anahaala woona wi aarimeela. Sookhumelela soowaawa sa yoocheka aya, vamoha ni wuupuwelela mahiku oohakalaliha vaavaa yaapuhaaya onthamwene waphaama ni Yehova ni achu awe, enahaala oweeriha ocharuwa.

Osivela ni olipa murima ti sookhweleya wi ekhalevo yookhumelela yaphaama. Namarepa a salmo Tavite ooloca: “Akimana mutchu ékhaikhai kini kere ikharari; Akisamela, kini kere makhurwa a va [muruni vaka].” (Sal. 141:5) Wi nooniherye: Nkaanyiheryani mulipa aweeca ni meco ohinapwacha yawoopiha ya weeca mu nihiku nooriirya. Onnapacerya ohooxeya ni oriirya, nave onnatuthela. Wakhala wi ookona mu nakhutu, owo onahaala okhwa. Vaavaa onaweheryeiye nikhuuru na woopola, nthamwene awe vakhaani vakhaani onnammana wiithoni wi ahikone. Omaniwa onniicela, nyenya onahaala ovuluxa okumi awe. Moolikana, Tavite aasuwela wi muchu eekhaikhai aanaphwanela omulaka wi akhale phaama.

Mu ikwaha sincipale, wiikariwa onnavaha olaka yoowo mulipa oocheka onachuneiye. Ivinre iyaakha khumi, mwaana a Xuliano, oromoliwe woopaceryani, aaheeliha okumi awe, akookela mmulokoni, nave vano onarumeela ntoko mutokweene a muloko. Owo onnaloca: “Wiikariwa waakooniha sookhumelela sa yoocheka aka. Mukhalelo yoole wa olaka waanachuneya wa miyaano.”​—Ahe. 12:7-11.

MUKHALELO WOOSIVELA WA WAAKHALIHA AWIIKARIWA

Mweeparipari, wiikariwa epahu yoomunepani, nyenya tahi wi eyo henareheryeya. Oothene nookhalano murici wi neerihe wiikariwa okhwaaniherye yoolakelela aya.

Atokweene yaawo arino murici wa olokoha yoolakelela ya wiikariwa anniilipixerya wooniherya osivela wa Yehova. Vaavaa anamuleelaaya muchu yoolakelelaaya, mweepewe ni mookwakwaleya annamuleela ichu onaphwaneleiye weera wi akookele mmulokoni. Ni yoolakelela ya owuupuxerya awiikariwa mukhalelo wa omukookela Yehova, atokweene anaphwanela waaxekurya yaale anooniherya otoroka meecelo aya.a

Achu a emusi annooniherya osivela waya muloko ni mulipa oocheka moorweela wa ocicimiha yoolakelela ya wiikariwa. Xuliano onnaloca: “Owo nlelo aari mwanaka, nyenya mukhalelo awe wookumi waapaka munlaano ni hiyo.”

Oothene mmulokoni annooniherya osivela moorweela wa osepa oloca ni ovaanela ni mulipa awiikariwa. (1 Akor. 5:11; 2 Yoh. 10, 11) Weerano hiiha analipiherya olaka Yehova ovanheiye orweela wa atokweene. Opwaha yeeyo, anahaala wooniherya osivela ni ovaha nikhaviheryo emusi ya mulipa awiikariwa, yeeyo enahooxeya vancipale wi ehuupuwele wi hanapaka makupa a akhwaaya a mu nroromelo.​—Arom. 12:13, 15.

Xuliano onnakuchula: “Wiikariwa marehereryo oochuneya wa hiyo, annanikhaviherya okhala mwawiiwanana ni meecelo a Yehova. Naamwi okumiheryaka ohooxeya moovira wa elukuluku onnaruuha sookhumelela saphaama. Waakhanle wi kaaheemererya meecelo oonanara a mwanaka, owo haahaala otoroka.”

[Nsu na vathi]