Mutitelele Oweherya!

“Owehereryeke . . . elukuluku eyo enamphiya nave helekelà!”​—HAB. 2:3, BNM.

MACIPO: 128, 45

MWAAHAALA WAAKHULA HAI?

Mathowa taani nryaahuno a ororomela wi nnakhala mmahiku ookuchula?

Ntakhara heeni olekela wa elukuluku honaneeriha ohiya olipelela?

Nnii nooniherye hai wi ninnatitelela oweherya okuchuwa wa mukhalelo ola wa ichu?

1, 2. Mukhalelo taani alapeli a Yehova aryaayano opacerya khalai?

OVINYERYA khalai, alapeli a Yehova annakhala eweheryaka waakhwanela wa sooloherya sooveereliwa. Ntoko yootakiherya, Yeremiya aaloherya wi Ayuuta yaahaala otoloxiwa, nave ti yeeyo yeeren’ye mmatani mwa Apaapulu mu 607 E.E.K. (Yer. 25:8-11) Yesaya yoowo aalohenrye wi Yehova aahaala oruuha matorokelo, aaloca: “Itxhàle yole onàroromela Apwiya.” (Isa. 30:18, BNM) Mikeya yoowo sooloherya sawe saavolowela achu a Muluku, aalakelela ariki: “Miyano kinawehererya Apwiya Muluku aka.” (Mik. 7:7, BNM) Mu iyaakha masana ivirale, alapeli a Muluku yaanakhala tho eweheryaka waakhwanela wa yooloherya ya ophiya wa Mesiya naari Kiristu.​—Luka 3:15; 1 Pet. 1:10-12.a

² Alapeli a Muluku amutano annakhala tho eweheryaka sooloherya vooloca sa Mesiya seiyo nlelo sihikhwaanenle. Moorweela wa Omwene wa Mesiya, moohilekela Yehova onahaala omaliha ohooxeya wa achu moorweela wa omutoloxa oonanara owo ni owoopola achu mu elapo ela yoonanara enakona mmatani mwa Satana. (1 Yoh. 5:19) Mwawiihiiha, hankooni nikhale oolipelela ni wiikasopa ntakhara elapo yeela enachimakela omakuchuwelo.

3. Nikoho taani nnahaala okhumelela wakhala wi ninnawehererya makuchuwelo opacerya khalai?

³ Ntoko alapeli a Yehova ninnachuna woona vaavaa okhwela wa Muluku oneeraaya “wereye, ntoko Wirimu hihá vathi vano.” (Mat. 6:10) Emanle oweherya makuchuwelo a elapo ela yaawo anakhala ntoko annalekela, akina anniikoha: ‘Apwanne nlelo nnaphwanela otitelela oweherya?’ Hankooni noone.

NTAKHARA HEENI OTITELELA OWEHERYA?

4. Tinivi nikhanle nthowa ntokweene na okhala oolipelela?

⁴ Piipiliya onnathariha tuuvi onaphwanela okhala moonelo ahu vooloca sa otoloxiwa wa mukhalelo ola wa ichu. Yesu aahaaleela oomuchara awe okhala ‘olipelela’ ni ‘wiweherya.’ (Mat. 24:42; Luka 21:34-36) Woona wi Yesu onnanleela weerano emohamoha, nla nthowa noophwanelela na okhala oowehererya! Marehereryo a Yehova annavaha yootakiherya yaphaama mmwaha yoola. Moohihiyererya, soolaleeryiwa saya sinnanceenyerya ‘oweheryeryaka ni wakuvela orwa waya wa nihiku na Muluku’ ni otikitherya ewehereryo ahu mu elapo yahiihaano yeeyo Muluku olaihenryeiye.​—Mwaalakhanye 2 Petro 3:11-13.

5. Ntakhara heeni ti woochuneya okhala oolipelela xaxaxa mu elukuluku ahu?

⁵ Naamwi okhala oowehererya waari woochuneya wa Akiristu a iyaakha ivirale, ti woochuneya tho xaxaxa wa hiyo. Ntakhara heeni? Ntakhara nnakhala mweelukuluku ya ophiya wa Kiristu. Eneneeryo ya ophiya wawe ennooneya opacerya 1914. Nave ineneeryo sincipale, seiyo inaphitaanyerya waaceereryeya wa onanara ni olaleeriwa wa Omwene, sinnooniherya wi nnakhala “o makutchuwelo” wa mukhalelo ola wa ichu. (Mat. 24:3, 7-14) Woona wi Yesu haalonce olekela wa elukuluku eyo, ti woochuneya okhala ooweherya ni oolipelela.

6. Mathowa taani nryaahuno a oweherya wi elapo enahaala otepa onanara vaavaa makuchuwelo anaacamelaaya?

⁶ Akhweya nnahaala wiikoha: Apwanne “makutchuwelo” a mukhalelo ola wa ichu henaahiwa elukuluku ya omwaahiyu yeeyo elapo enahaalaaya otepa onanara? Piipiliya onnathariha wi onanara onahaala waaceereryeya “m’mahiku ókutchula.” (2 Tim. 3:1, 13; Mat. 24:21; Yaw. 12:12) Mwawiihiiha, ninnaweherya wi elapo enahaala otitelela onanara.

7. Mateyu 24:37-39 onathoonya eheeni vooloca sa mikhalelo sa elapo mmahiku ookuchula?

⁷ Nyuwaano munaweherya wi elapo enahaala onanara ophiyerya mweero taani ehaakumve “ekoi etokotoko”? (Yaw. 7:14, BNM) Ntoko yootakiherya, apwanne munaweherya wi inahaala okhalavo ikhoco mmapuro oothene, naari etala wa achu oothene ni ireca mu ichoko soothene? Mmikhalelo ntoko seiya, alipa oovaanya, yaahaala weemererya wi yooloherya ya Piipiliya ennaakhwanela. Nyenya Yesu aaloca wi achu ancipale heni ‘esuwele etchu’ sa ophiya wawe, yuukhuwaka ni miteko sa nihiku nnihiku. (Mwaalakhanye Mateyu 24:37-39.) Mwawiihiiha, Piipiliya onnooniherya wi mikhalelo sa elapo mmahiku ookuchula hasikhala sootepaxa onanara ophiyerya wi achu ekhale ookhinyereryeya weemererya wi makuchuwelo ari vakhiviru.​—Luka 17:20; 2 Pet. 3:3, 4.

8. Tiheeni eri yawooneya wa yaale anawiriyana ekano ya Yesu ya okhala ‘olipelela’?

⁸ Moohiyana, ineneeryo iho saahaala okhala sawooneya wi yaale aniiwelela ekano ya Yesu ewerye woona nave etitelele okhala ‘olipelela.’ (Mat. 24:27, 42) Nave ti yeeyo eneereya opacerya 1914. Ovinyerya elukuluku yeele oya ohoolo, ineneeryo iho sinnooneya. Vano nnakhala “omakuchuwelo wa mukhalelo ola wa ichu”​—elukuluku ya vakhaani yeeyo enakeriha wootoloxiwani wa mukhalelo ola woonanara.

9. Mathowa taani anaphwanela oneeriha owehererya makuchuwelo a mukhalelo ola?

⁹ Ntakhara heeni Akiristu olelo anaphwanelaaya okhala oowehererya? Nthowa na omwiiwelela Yesu Kiristu, ninnatitelela owehererya. Nave tho ninnoona eneneeryo ya ophiya wawe. Ewehereryo ahu henathipeleya mu nroromelo natheru, nyenya enathipeleya mu sawooniherya soorweela mu Soorepa seiyo sinanceenyerya okhala oowehererya ni oolipelela, aai, niweheryaka okuchuwa wa mukhalelo ola woonanara.

OPHIYERYA LIINI?

10, 11. (a) Yesu aarehenrye oohuserya awe wa yaweereya taani? (b) Yesu aalenle oomuchara awe wi yeereke eheeni wakhala wi annoona wi makuchuwelo annalekela opwaha vaavaa yaaweheryaaya? (Moone eruku yoopacerya.)

¹⁰ Ancipale a hiyo ninnakhala oowehererya omunepani opacerya khalai. Nyenya, niheemererye wi olekela wa elukuluku oceecheihe yoolakelela ahu ya okhala oowehererya. Ti woochuneya okhala oorehereya ntakhara ophiya wa Yesu wi atoloxe mukhalelo ola wa ichu. Muupuwele wi Yesu aahaaceenyerya oomuchara awe: “Weheryani, lipelelani, nave vekelani; vawi hamunasuwela elukuluku aya. Ntoko mutchu a va mukwahani, áchimula o’mpa wawe, ávaha akapuro awe olamulelo, wa othene awo miteko aya, alamulela a va milakoni wi alipelele. Ntakhara awe lipelelani, vawi hamunasuwela nyuwo elukuluku aya aniriye akóke mulipa-empa, akhweya oshekuwa, akhweya ohiyu eriyari, akhweya vawipa muthupi, akhweya woshishelo; wi aneremkóka motutusha, ophwanyeni murikimrupa. Nave yeyo kinalochaka wa nyuwo, kinalocha wa othene, Lipelelani.”​—Mar. 13:33-37.

¹¹ Vaavaa yaasuwenlaaya wi orwa wa Kiristu waapacenrye mu 1914, oomuchara a Yesu yaahiireherya ntakhara orwa wawe omakuchuwelo. Awo yaaheerano yeeyo moorweela wa waaceererya muteko aya wa olaleerya Omwene. Yesu aathoonya wi owo aahaala orwa “akhweya vawipa muthupi, akhweya woshishelo.” Woona wi eyo enahaala weereya, tiheeni oomuchara awe anaphwanelaaya weera? Owo aaloca: “Lipelelani.” Mwawiihiiha olekela wa elukuluku henavaha nthowa na ohiya okhala oolipelela naari ohiya ewehereryo aya moomalela.

12. Tiheeni Hapakukhi aamukonheiye Yehova, nave aakhunle hai?

¹² Mmuthokororye mulipa a miririmu Hapakukhi yoowo aarummwe oloherya otoloxiwa wa Yerusalemu. Ovinyerya elukuluku aapacenryeiye muteko awe, soolopola vooloca sa otoloxiwa wa epooma saari sawunlaana. Mikhalelo saatepa onanara ophiyerya wi achu oonanara yaanaarukurerya achu eekhaikhai nave malamulo yaananarihiwa. Mwawiihiiha tahi yootikhiniha wi Hapakukhi aakoha: “Ophiyerya lini, Pwiya, kineraka kovekeni nikhaviheryo?” Ohiyana wi aakhule nikoho nenlo mookwakwaleya, Yehova aamuroromeliha Hapakukhi wi “helekelà” ophiya elukuluku ya otoloxiwa. Muluku aaloca wa Hapakukhi wi ‘awehereryeke.’​—Mwaalakhanye Habakukhi 1:1-4; 2:3, BNM.

13. Muupuwelo taani Hapakukhi aahaaleiye okhalano, nave ntakhara heeni hiyaahaala okhala ya miruku?

¹³ Mwaanyiherye waakhanle wi Hapakukhi aaceecheya nave uupuwela: ‘Kipacenrye wiiwa ovinyerya khalai sa otoloxiwa wa Yerusalemu. Akhweya ennahala elukuluku yincipale. Hori woophwanelela otitelela olokoha wi epooma enahaala otoloxiwa moohilekela. Kinahaala waahiyera akina muteko yoola.’ Waakhanle wi Hapakukhi aahunnuwiha muupuwelo yoola, aahaala oyeleela weemereryiwa ti Yehova ophitaanyerya okumi awe vaavaa Apaapulu yaamutolonxaaya Yerusalemu!

14. Ntakhara heeni ninnaroromela wi okhala oowehererya tahi wasiiyo?

¹⁴ Mu elapo evyaani, nnahaala ohakalala wuupuwela waakhwanela wa sooloherya soothene vooloca sa makuchuwelo a mukhalelo wa ichu. Wuupuwelela mukhalelo ichu seeren’yaaya enahaala waaceererya omuroromela wahu Yehova ni soororomeliha sawe nlelo sihikhwaanenle. (Mwaalakhanye Yosuwa 23:14.) Moohikhwa minikwa nnahaala omuthamalela Muluku yoowo, otikithenrye ilukuluku mu olamulelo awe, ni onanceenyerya oweherya wi “makutchuwelo a itchu sothe sene ari vakhiviru.”​—Saw. 1:7; 1 Pet. 4:7.

OWEHERERYA ONATAPHULELA OPHARA MUTEKO!

15, 16. Ntakhara heeni waaceererya muteko wa olaleerya echu yoochuneyaxa mu elukuluku yeela nnakhalaahu?

¹⁵ Moohikhwa minikwa marehereryo a Yehova anahaala otitelela onceenyerya omurumeela Muluku mwa mvai. Sooleeliherya seiya sinnavahiwa ohiya pahiru wi nikhale ooweiwa mmuteko wa Muluku nyenya tho wi inikhaviherye okhala oolipelela ni woona eneneeryo ya ophiya wa Kiristu. Tiheeni nnaphwanelaahu weera mweelukuluku yeela nnakhalaahu? Ti woochuneya opacerya waavya Omwene wa Muluku ni ekhaikhai awe moorweela wa olaleerya michaka yaphaama mwa mvai!​—Mat. 6:33; Mar. 13:10.

¹⁶ Murokora mmoha aaloca: “Orweela wa olaleerya michaka yaphaama ya Omwene wa Muluku, . . . ninnawoopola achu mu okhwa variyari va otoloxa weelapo yoothene onoorwa owo.” Murokora ola oosuwela tiheeni enataphulela ovuluwa woona wi owo ni iyawe yaavuluwa mu oneela wa mwaaceya mutokweene weeren’ye mu 1945. Naamwi variyari va epahu ntoko yeela, muchu onanwerya okhalano moonelo woonanara vooloca sa yeeyo eri yoochuneya. Murokora ola onnuupuwela wi muthiyana mmoha aatitelela wiikhupanyiha ariki: “Maani mirupa saka! Maani maphuta aka. Soothene soomorela mmaahini. Kooyeleela soothene!” Moohiyana, achu ancipale yaachuna okhaviherya yaahiiveleela olapa mwakuru wi yaakhaviherye achu yaamorenle mmaahini. Moolikana ni achu yaale awiiveleela, ninniilipixerya waakhaviherya achu. Ninnasuwela wi muteko wa olaleerya ti wawaakuveya, mwawiihiiha ninnaakhaviherya akina wi evuluwe mu epahu etokweene ya elapo yoothene.

17. Mathowa taani nryaahuno a ororomela wi makuchuwelo anahaala ophiya mu elukuluku aya?

¹⁷ Saweereya sa mweelapo sinnooniherya wi yooloherya ya Piipiliya ennaakhwanela nave wi makuchuwelo a mukhalelo ola wa ichu ari vakhiviru. Mwawiihiiha, hannaphwanela wuupuwela wi ennahala elukuluku yincipale yeeyo “manyaka khumi” ni ‘enama’ iromoliwe mu Yawupulula 17:16 inahaalaaya omwiica Paapulu Mutokotoko, marehereryo eelapo yoothene a malapelo atheru. Nuupuwele wi Muluku onarwa ahela “m’murima mwaya” wi yeereno yoochuna awe​—nave eyo enahaala weereya mwawaakuveya ni mweelukuluku aya! (Yaw. 17:17) Makuchuwelo a mukhalelo ola wa ichu hari ocai. Ni mathowa aphaama, n’naphwanela ochariha olopola wa Yesu: “Mwiweherye mekhinyu, wi akhweya mirimanyu enirimvelihiwa ni olyólya ni ohapaliwa, ni sothokororya sa okumi yola, nave wi nihiku nlo nnirimophiyeryani tuthu ntoko murákho.” (Luka 21:34, 35; Yaw. 16:15) Haya nikhale oolakelela omurumeela Yehova mwa mvai, nsuwelaka wi ‘onnakhaviherya atxhu yale anera otxhuna wawe.’​—Isa. 64:4, BNM.

18. Nikoho taani nnahaala othokororyiwa mmwaha onacharela?

¹⁸ Vaavaa nnaweheryaahu makuchuwelo a mukhalelo ola wa ichu, hankooni niiwelela masu ooveereliwa a murummwa Yuta: “Nyenya nyuwo, ósiveliwa, munitchukelelanyu mekhinyu va nroromelo nanyu nawélasha, ni ovekela mwa Munepa Wawéla, mwikhapelele mkhatinyu musivela wa Muluku, ni oweherya ikharari sa Apwiyahu Yesu Kristu, ophiyerya okumi wohimala.” (Yuda 20, 21) Vano, nnii nooniherye hai wi nnakhala niweheryaka elapo yahiihaano yeeyo Muluku ororomelinheiye? Ela enahaala othokororyiwa mmwaha onacharela.

[Nsu na vathi]