MWAHA WA EKAAPA | ANAMOONA A YEHOVA TAANI?

Soororomela sa Anamoona a Yehova

Anamoona a Yehova annaroromela wi “Sorempwa sothene supululiwe ti Muluku, nave muteko aya ori ohusiha.” (2 Timóteo 3:16) Ninnampharihela Piipiliya ntoko yoohoolela yoororomeleya ya ohuserya sa Mpatuxa ni okhalano okumi waphaama.

Piipiliya onii: “Wi esuwele wi Nyenyuru, nsina nanyu mwa Yehova, Mwa Awirimurimu velaponi yothene ya vathi.” (Salmo 83:18, NN) Mwawiihiiha, nnamulapela pahiru Yehova Muluku, nave ntoko Anamoona awe, ninniilipixerya olokoha nsina nawe.​—Isaiya 43:10-12.

Ntoko Akiristu, ninneemererya wi Yesu, “Mwana a Muluku,”a aarwa veelaponi nave akhala Mesiya. (Yohani 1:34, 41; 4:25, 26) Amanle okhwa, aaviihiwa mookhwani ntakhara okumi wirimu. (1 Korinto 15:3, 4) Ohoolo waya aakhala Mwene a Omwene wa Muluku. (Wupulula 11:15) Omwene owo onahaala omuruuha Parataiso veelaponi yavathi. (Daniyeli 2:44) Piipiliya onii: “Atxhu awiyeviha anamukhalano muretxele, nave anampuha saphama sothene.”​—Salumu 37:11, 29.

Anamoona a Yehova anneemererya wi malakiheryo a Piipiliya ananwerya waakhaviherya achu mmahiku ahu. (Isaiya 48:17, 18) Nthowa na yeeyo, ninnachariha vakhivirukhiviru malakiheryo yaawo. Ntoko yootakiherya, woona wi Piipiliya onnanlopola osepa saweera inariipiha mwiili, hiyaano hinnamulya soona naari mirece. (2 Korinto 7:1) Ninnasepa tho saweera seiyo mooluluwanya inawatiihiwa Mpiipiliyani, ntoko ohapaliwa, ocapaheya, ni wiiya.​—1 Korinto 6:9-11.

[Nsu na vathi]

[Yooleeliherya va epaaxina 5]

“Vaavaa anamwaalakhanyaaya Piipiliya aneemererya wi Muluku tonaloca ni yaawo. Vaavaa anakumanaaya ni makacamiho a okumi, annaavya ohoolela wa Masu a Muluku. . . . Wa awo Masu a Muluku nlelo makumi.”​—Mutokweene a katoolika Benjamin Cherayath, Münsterländische Volkszeitung eyornali, Alemanya

[Ekaaxa va epaaxina 5]

Wi muhuserye vooloca sa soororomela sahu ni ntakhara heeni hannapaka makupa a mahiku a ochapela, naari weemererya nikhami, muye mu www.jw.org/pt, nave moone QUEM SOMOS > PERGUNTAS FREQUENTES.