MWAHA WA EKAAPA | NTAKHARA HEENI OKHALA OOROROMELEYA?

Ororomeleya Woovireliwa?

Hitoshi aalapa mu ekupweete ya waalakhanyerya ikhorowa o Xapau. Elukuluku yaavareryaaya ikonta ni mutokweene awe, aaleeliwa wi apake erelatooriyu yatheru. Hitoshi aathariha wi yawuupuxerya-ya-murima awe hiyaamweemererya opaka muteko onooniherya ohiroromeleya. Ntoko yookhumelela, Hitoshi aakhalihiwa moonanara nave wookuchulani waya aayeleela muteko awe.

Miyeeri ohoolo waya, Hitoshi aakhulumuwa nthowa na oyeleela muteko awe waphaama. Vaavaa aaphwannyeiye muteko muvyaani, Hitoshi aaloca wi haachuna muteko waahaala omweeriha okhala oohiroromeleya. Mutokweene a muteko owo aahaakhula: “Mukhalelo aa wa wuupuwela tahi wawunlaana!” Amusi ni asinthamwene a Hitoshi yaamulipiha wi atitelele okhala oororomeleya, vaavaa aapacenryeiye okhalano minikwa. Ntoko yookhumelela, owo aaloca: “Otitelela okhala oororomeleya nthowa na nroromelo naka yaari echu yaphaama.”

Yaweereya ya Hitoshi ennooniherya wi, tahi wi achu oothene annacicimiherya ororomeleya. Mweeparipari, akina anoona ororomeleya ntoko echu yoohiphwanelela xaxaxa mmapuro a nakoso. Muthiyana mmoha aalapa o Afrika Oohico aaloca: “Kaarukureryiwe ni achu oohiroromeleya nave wiiliwiili kaanakhinyereryiwa wi kikhale oohiroromeleya.”

Mukhalelo mmoha wa ohiroromeleya ori wawunlaana olelo, wootha. Iyaakha oculi, alipa ootholathola a University of Massachusetts Amherst psychologist Robert S. Feldman, aahoona wi achu atokweene 60 porsento yaanootha ekwaha emoha variyari wa ovaanela wa aminutu khumi. Feldman aaloca: “Ela yaari echu etokotokoxa. Hiyaano hinaawehererya wi wootha waahaala opaka makupa mu okumi wa nihiku nnihiku.” Apwanne opaka makupa mu sawootha ikhaani sawunlaana tahi wootha?

Ntakhara heeni wootha, wiiya, ni mikhalelo mikina inooniherya ohiroromeleya ti sa wunlaana olelo? Ohiroromeleya onavolowela hai elapo yoothene? Voopwahaxa, nnii niwerye hai osepa omorela mmeerelo yaala oohiroromeleya?