Mwaahaala Ophura wa Okhalano Ekulucu ya Muchu Mukhateiye?

1. Ekulucu ya muchu mukhateiye tiheeni?

¹ Ekulucu ya muchu mukhateiye tiheeni? Eyo eri mu miloko irino ekulucu yawunnuwa, ti ekulucu, akhweya waacamela weiwo munakhalaanyuwo. Liivuru Organizado, epaaxina 103 onnataphulela: “Okhalano ekulucu ya muchu mukhateiye eri vanipuro noophwanelela enahaala wookhaviheryaani omaliha elukuluku yincipale mmuteko wa mmacani. Nyuwano tho poti onwopa mulaleeryi mukina wi mulapeno vamoha mu ekulucu anyu.”

2. Ekulucu ya muchu mukhateiye enii ephariheliwe hai wi okhaviheryiwe olaleerya wa nikhuuru?

² Okhaviherya Olaleerya wa Nikhuuru: Wakhala wi mookhalano ekulucu anyu waacamela omutekoni wanyu, nyuwano poti olaleerya elukuluku ya wiichuuwa nari muhaakumve okookela owaani, akhweya ni mulaleeryi mukina yoowo onalapa vakhiviru. Wakhala wi mookhalano ekulucu waacamela vaate vanyu, nyuwo ni echoko anyu poti opharihela eyo olaleerya ohiyu. Wakhala wi hamunaya o muthukumano wa muteko wa mmacani, ti woophwanelela ovekela mvekaka ohoolela wa Yehova muhaakumve opacerya olaleerya. (Afil. 4:6) Mu waaceererya, munaphwanela ophimelela elukuluku munamalihaanyu mu ekulucu ya muchu mukhateiye ni elukuluku munamalihaanyu mukhaviheryaka marehereryo a muloko a olaleerya wa nikhuuru. Xaxaxa omala wa esumana, vaavaa ancipale anayaaya o muthukumano wa muteko wa mmacani, ti waphaama okhaviherya muteko wa mmacani wa nikhuuru nanyu.

3. Mphurelo taani wa okhalano ekulucu ya muchu mukhateiye?

³ Mphurelo: Wakhala wi mookhalano ekulucu ya muchu mukhateiye, mookhalano nipuro na olaleeryawo eprograma anyu yeemererya. Nyuwo poti omaliha elukuluku yincipale mulaleeryaka nave omaliha elukuluku vakhaani mweecaka. Waakuveya iwo onneeriha wi akina ekhala mapiyoneero ookhaviherya nari a elukuluku yoothene. Woona wi anamakhala yaawo anooniherya ochuna ari vakhiviru vanyu, enahaala okhala yookhweya opaka irevista ni weeciha soohuserya sa Piipiliya. Ancipale annoona wi olaleerya mu ekulucu ya muchu mukhateiye ennaakhaviherya waakhovelela anamakhala ni wunnuwiha ororomela waya, xaxaxa wakhala wi ekulucu poti olapiwa opwaha etila emoha ehaakumve okookihiwa wi akina eveke. Olapa mu ekulucu ya muchu mukhateiye yaahaala wookhaviheryaani ni echoko anyu okhwaaniherya phaama orummwa wanyu?​—2 Tim. 4:5.