Meerelo a Olaleerya Michaka Saphaama

NTOKO namalaleya a michaka saphaama, Yesu ootikitherya yootakiherya yaphaama wa oomuchara awe. Owo aanaya wa achu, alocaka ni ahusihaka mmavaate mwa achu ni mmapuro awaaciwamo. (Mat. 9:35; 13:36; Luka 8:1) Yesu aanaloca wa muchu ti muchu, aanahusiha oohuserya awe weephiini nave aanaloca nnikhuuru na achu ancipale. (Mar. 4:10-13; 6:35-44; Yoh. 3:2-21) Owo aanapharihela ekari yoothene wi aloce masu oolipiha ni a ewehereryo. (Luka 4:16-19) Naamwi achunaka wiichuuwa, owo aanapharihela ekari eri yoothene wi avahe onamoona. (Mar. 6:30-34; Yoh. 4:4-34) Vaavaa nnaalakhanyaahu saweereya sooveereliwa sa muteko wa Yesu, apwanne henanceenyerya ochariha? Chiryene ennanceenyerya, hiihaa ntoko arummwa yoonnaaya.—Mat. 4:19, 20; Luka 5:27, 28; Yoh. 1:43-45.

² Muthokororye ikari seiyo Akristu mmahiku ahu anakhalaayano wi ekhaviherye muteko yoowo Yesu Kristu aapaceryinheiye waacamela iyaakha 2.000 ivirale.

OLALEERYA EMPA NI EMPA

³ Ntoko Anamoona a Yehova, ninnasuwela ochuneya waya olaleerya michaka saphaama sa Omwene mooreheryeya empa ni empa. Ninnapharihela meerelo yaawo oochuneyaxa arempwale ntakhara hiyo. Miruku inaphariheliwa mmeerelo yaala wi ephwanyiwe amilyawu aachu mu elukuluku ya vakhaani ti yawooneya moorweela wa sookhumelela soohakalaliha. (Mat. 11:19; 24:14) Olaleerya empa ni empa ennooniherya mukhalelo waphaama wa omusivela wahu Yehova ni amwaacamane ahu.—Mat. 22:34-40.

⁴ Olaleerya empa ni empa tahi echu yeeleco wa Anamoona a Yehova. Murummwa Paulo aanahusiha mmavaate mwa achu. Ooniheryaka murici awe wa asitokweene o Efeso, owo aaloca: “Opacerya nihiku nenle kivolonwaaka mu Aasiya. . . . Nkaahiyale woolaleeryaani soothene saari sookhweleya, . . . kihusihaka mmithukumanoni kihusihaka tho echoko ni echoko.” Mmikhalelo seiya ni mikina, Paulo ‘aaheerela onamoona aalaleeryaka Ayuuta ni Akereku sa orukunuwela wa Muluku, yaaroromenle Apwiyaahu Yeesu Kristu.’ (Saw. 20:18, 20, 21) Mu elukuluku yeele, olamulelo wa Aroma waanaaceenyerya achu olapela soophwaniherya, nave ancipale a weiwe ‘yaanalapa amuluku.’ Waari wawaakuveya wi achu emwaavye “Muluku opatunshe elapo yavathi ni soothene sookhala mwemmo,” Mmoha yoowo “onnaalamulela achu oothene a mmapuro oothene, wi erukunuwe murima.”—Saw. 17:22-31.

⁵ Olelo, ochuneya waya waaphwanyiha achu michaka yaphaama ti wawaakuveyaxa. Makuchuwelo a elapo yeela yoonanara annaacamela mwawaakuveya. Woona othowa yoola, ennanceenyerya waacererya owetha wahu. Hiwaavo mukhalelo mukina ophwanyiwe voohikhala elukuluku ya owaavya achu empa ni empa yaale arino etala ntakhara eparipari. Meerelo ala tamphurelo hiiha ntoko yaaryaaya mmahiku a Yesu ni arummwa.—Mar. 13:10.

⁶ Apwanne muri ooreheryeya opaka makupa a olaleerya empa ni empa? Yaari hiiha, munnaroromela wi Yehova onnahakalala ni nyuwo. (Ezek. 9:11; Saw. 20:35) Olaleerya empa ni empa akhweya tahi wookhweya wa nyuwo. Akhweya mookhalano makacamiho mweekumini, naari wi munalaleerya ekulucu yeeyo ancipale ahinachunaaya owiriyana. Akhweya alamuleli annawatiiha muteko ahu. Akhweya munnuuliwa muru, nave munoona okhala woovilaxa opaceryiha ochekula ni achu nihaasuwenlaahu. Naamwi hiihaa, vaavaa munayaanyu olaleerya empa ni empa, munnavootha wuukhuwa. Muhicecheye. (Muk. 4:10-12) Mikhalelo sanyu tahi soohiyana ni sa anninyu mmapuro mancipale.

⁷ Yesu aahaalaiherya amuhuserya awe: “Chiri, miyo kiri ni nyuwo mahiku oothene ophiyerya makuchuwelo a ilukuluku.” (Mat. 28:20) Yoororomeliha yeela ennanilipiha mmuteko wa waapaka oohuserya. Ninnoona ntoko murummwa Paulo, yoowo aalonce: “Kinnawerya soothene mwa yoowo onakilipiha.” (Fil. 4:13) Mphwanye mphurelo wincipale wa marehereryo a muloko a olaleerya empa ni empa. Moorweela wa olapa ni akina, munamwaakhela nlipiho nnikhaviheryo. Mvekele ntakhara nikhaviheryo wi mvoothe makacamiho vyakala munakumanaanyuno, nave mwiilipiserye ntoko mulaleeryi a michaka saphaama.—1 Yoh. 5:14.

⁸ Vaavaa munaaleelaanyu akina michaka saphaama, munamukhalano ikari sa waavaha “nthowa na oweheryerya wiwo ori mwa nyuwo.” (1 Ped. 3:15 NN) Munahaala osuwela phaama ohiyana variyari wa yaale arino ewehereryo ya Omwene ni yaale ahirino. (Isa. 65:13, 14) Munamukhalano ohakalala voosuwela wi moohiiwelela nlamulo na Yesu na weeriha wi “omwaleela wanyu waaryeke,” ni okhalano ekari ya waakhaviherya akina omusuwela Yehova ni eparipari yeeyo enahoolela wookumini yoohimala.—Mat. 5:16; Yoh. 17:3; 1 Tim. 4:16.

⁹ Annapakiwa marehereryo a olaleerya empa ni empa omakuchuwelo wa isumana naari tho variyari va esumana. Mmapuro yaawo ori woovila waaphwanya achu vaate elukuluku ya othana, miloko mikina sinnapaka marehereryo a olaleerya oxekuwa. Akhweya achu ancipale anasiveliwa owaakhela aleco elukuluku ya othana naari oxekuwa ohiya wooxixelo.

OWAAVYA OOPHWANELELA

¹⁰ Yesu aahaahusiha oomuchara awe ‘waakoherera’ oophwanelela. (Mat. 10:11) Owaavya wawe yaale ari oophwanelela hiweereya pahiru mu olaleerya empa ni empa. Opwaha yeeyo, owo aanavaha onamoona mu elukuluku vyakala yoophwanelela, moohilakelela naari hooye. (Luka 8:1; Yoh. 4:7-15) Arummwa tho yaanavaha onamoona mmapuro oohiyanahiyana.—Saw. 17:17; 28:16, 23, 30, 31.

¹¹ Moolikana tho olelo, yoolakelelaahu ori waaphwanyiha achu oothene michaka sa Omwene. Ela enataphulela omuchariha Yesu ni arummwa awe mmuteko aya wa waapaka oohuserya ntoko otorokeya wa ilukuluku ni ohiyana wa mikhalelo sa achu mu ekulucu ahu. (1 Kor. 7:31) Ntoko yootakiherya, alaleeryi annakhumelela phaama orweela wa oloca ni achu mmapuro a nakoso. Onamoona wa vanlakani onnakhalano sookhumelela saphaama mu ilapo sincipale, ntoko onamoona wa mapuro onemexiwamo ikaaro, mmapuro awaaciwamo, naari ori woothene onaphwanyeyawo achu. Miloko mikina sinnapharihela meesa naari ikhankoonya mu ekulucu aya. Mwawaaceererya, efiliyale ennarehererya mukipici wa vameekhaaya wa onamoona wa vanlakani mmapuro awaaciwamo a epooma, ephariheliwaka alaleeryi a miloko soohiyanahiyana. Ntoko yookhumelela, achu yaawo ahinakhala vaate vaavaa alaleeryi analaleeryaaya, akhweya onanweryeya waaphwanyiha michaka saphaama.

¹² Vaavaa nnaphwanyaahu achu mmapuro a vanlakani yaawo anooniherya nchuno michaka sa Piipiliya, nnanwerya waavaha yoolaleeryiwa yoophwanelela. Wi mwaaceererye nchuno, munanwerya omvahererya sooleeliherya sanyu muchu yoowo nave mpake marehereryo a osekurya, omuthoonyerya jw.org naari omvahererya yooleeliherya vooloca sa nipuro mithukumano va muloko wawaacamela. Nnawerya opaka marehereryo wi naaphwanye mmavaate mwaya. Akhweya munnawerya waalaleerya achu mmapuro awaaciwamo mmukhalelo woohakalaliha wi mwaaceererye muteko anyu.

¹³ Nto, olaleya michaka saphaama tahi yeeyoru enavolowela muteko wa Akristu olelo. Wakhala wi munnakhumelela phaama mu waakhaviherya akina osuwela eparipari enahoolela wookumini, munahaala ochunaka waaxekuryaka achu arino nchuno wi ewerye oya vahoolo ni okhala Akristu awiichwelavo.

OPAKA OXEKURYA

¹⁴ Yesu aaloca wa oomuchara awe: “Munamukeerela onamoona . . . ophiyerya weiwo elapo ekontayawo.” (Saw. 1:8) Nyenya tho owo aahaaleela: “Haweni wa achu a maloko oothene, mwaapakeke oohuserya aka, . . . munaahusiha ochariha soothene koorummaakaani.” (Mat. 28:19, 20) Opaka oxekurya onanwerya okhala ehime ya ohakalala mmuteko wa Yehova. Achu yaawo yoonihenrye nchuno wa michaka saphaama vaavaa mwaaloncaanyuno mu ekwaha yoopacerya anamukhala oohakalala owoonaani muchinke. Moorweela wa wuuka miselo sawaacererya sa Piipiliya ni yaawo, munanwerya olipiha nroromelo naya wa Muluku ni waakhaviherya osuwela soothowa saya soomunepani. (Mat. 5:3) Mwiirehererya phaama ni opaka marehereryo a oxekurya mu elukuluku yoophwanelela wa yaawo, munanwerya opaceryiha yoohuserya ya Piipiliya. Weerano hiiha enahaala okhala yamphurelo mwaapakaka oxekurya. Tahi wi nnamoona pahiru waala mmiso wa eparipari nyenyatho ninnahela maahi.—1 Kor. 3:6.

¹⁵ Opaka sooxekurya akhweya nnamukhala nikacamiho wa akina. Akhweya mookhalano mavyakelo a opaceryiha ovaanela mookhweya vooloca sa michaka saphaama nave munnasiveliwa ni meerelo yaala mu orummwa. Nto, vaavaa munuupuwelaanyu sa okookelawo wi mmuthokororye Piipiliya, nnamukhala nikacamiho ntokweene. Wiirehererya phaama onahaala waaceererya nroromelo nanyu. Mpharihele sooleeliherya soophara muteko inavahereryiwa mmuthukumano wa veeri va esumana. Munanwerya tho waawopa alaleeryi arino mavyakelo wi yoohooleeni.

WEECIHA SOOHUSERYA SA PIIPILIYA

¹⁶ Vaavaa aaloceiye ni Muyuta yoowo aalakhanya masu a Muluku, namichaka Filipi aamukoha: “Munniiwavo phaama yeeyo munaalakhanyaanyu?” Mulopwana aahaakhula: “Kini kiiwe hai, ahikhanlevo ookileeliha?” Yaweereya ya Piipiliya mu Saweriwa T’arummwa ekapitulu ya 8 ennanleela wi apacerihaka nikupa na mu Soorempwa mulopwana aalakhanyeiye, Filipi “aamuleeliha michaka yaphaama ya Yesu.” (Saw. 8:26-36) Hinnasuwela ilukuluku kavi Filipi aamalinheiye ni mulopwana yoole, nyenya Filipi aamwiiwexexiha michaka saphaama apacerya ororomela nave aveka opatisiwa. Owo aahikhala oohuserya a Yesu Kristu.

¹⁷ Achu ancipale olelo hamusuwenle Piipiliya, mwawiihiiha onamukhala woochuneya opakaka oxekurya mwawuuluulela ni ohuserya variyari va esumana, miyeeri naari ophiyerya eyaakha emoha ehipacenrye oteka nroromelo naya ni ophwanelela wi epatisiwe. Nyenya omukhaviherya moosivela ni moopixa murima yoole onachuna okhala oohuserya onnaruuha mareeliho, hiihaa ntoko Yesu aalonceiye: “Wookhalavo ohakalala wawaaca mu ovaha opwaha mu waakhela.”—Saw. 20:35, TNM.

¹⁸ Chiryene nyuwaano munamuchuna weeciha yoohuserya ya Piipiliya mpharihelaka yoolaleeryiwa erehereryiwe ntakhara yeeyo. Vaavaa munapharihelaanyu sooleeliherya inavahereryiwa mmuthukumano wa veeri va esumana ni olapa ni ahusiha arino mavyakelo mmulokoni, munanwerya weeciha soohuserya soophwanelela, waakhaviherya akina okhala oohuserya a Yesu Kristu.

¹⁹ Wakhala wi munnachuna nikhaviheryo wi mpaceryihe ni weeciha yoohuserya ya Piipiliya, mukhale ootaphuwa oloca ni mutokweene naari Namoona a Yehova yoowo onakhumelela phaama mmuteko wa weeciha yoohuserya ya Piipiliya. Sooleeliherya inaphwanyeya mu Okumi ni Muteko Ahu Yoochariha ya Mithukumano ni sawooniherya ineeriwa mmithukumano sinanwerya wookhaviheryaani. Mmuroromele Yehova, nave muloce yoolakelela anyu mmavekelo. (1 Yoh. 3:22) Vano, wakhala wooweryeya, mutikitherye yoolakelela ya okhalano yoohuserya ya Piipiliya ekina, mwawaaceererya ni yoohuserya vyakala muneecihaanyu ni aveechokoni vanyu. Moorweela wa weeciha soohuserya sa Piipiliya, munahaala waacererya ohakalala wanyu mmuteko woolaleerya.

WAHOOLELA ACHU ARINO NCHUNO OYA MMAREHERERYO A YEHOVA

²⁰ Vaavaa nnaakhaviheryaahu achu omusuwela Yehova Muluku ni okhala oohuserya a Yesu Kristu, awo annapaka makupa a muloko. Oohuserya a Piipiliya anahaala oya vahoolo omunepani ni wiichwelavo wakhala wi aasuwela ni okhaviherya marehereryo a Yehova. Waahusiha mukhalelo wa weerano echu yoochuneyaxa. Ixilema ni eproxura Taani Aneera Yookhwela ya Yehova Olelo? sirehereryiwe wa yoolakelela ene yeeyo. Sooleeliherya ikina mu Mwaha 4 wa liivuru yoola inamukhala sookhaviherya.

²¹ Ovinyerya omapacereryo wa omuthokororya wanyu Piipiliya, mmukhaviherye oohuserya woona wi Yehova onapharihela marehereryo wi muteko woolaleerya waakhwanele veelaponi ya vathi. Muloce esisapo ya ikaruma sa omuhuseryano Piipiliya, nave mutharihe mukhalelo iho inapakiwaaya ni okaiwa veelaponi yoothene moorweela wa anna ni arokora awiivaha yaawo iivelenle wa Muluku. Munwope oohuserya anyu a Piipiliya wi muye vamoha mmithukumano mu Empa ya Omwene. Mmutharihele mukhalelo mithukumano ineeriwaayano nave mmusuwelihe anna a weiwo. Munahaala ochunatho omukhaviherya waasuwela Anamoona akina omithukumano sa ekulucu ni sa muceche. Mu ilukuluku seiya ni ikina, mweerihe wi oohuserya oone mukhalelo achu a Yehova anooniheryaaya osivela, eri eneneeryo ya Akristu eeparipari. (Yoh. 13:35) Wakhala wi yoole orino nchuno onnaya vahoolo ooniheryaka othamalela marehereryo a Yehova, owo onahaala omwaacamela Yehova.

SOOLALEERYIWA SA PIIPILIYA

²² Akristu oopacerya yaari alaleeryi amvai a Masu a Muluku. Awo yaanakopiyaara Soorempwa wi ephariheleke mu yoohuserya ya muchu mukhateiye ni mmulokoni. Awo yaanaarumihela akina masu a eparipari ya Muluku. Ikoopiya saya saakhala savakhaani ni sasisapo. (Kol. 4:16; 2 Tim. 2:15; 3:14-17; 4:13; 1 Ped 1:1) Olelo, Anamoona a Yehova annapharihela meerelo a mutano a wimprimiri wi yaakumihe a Piipiliya ni ikaruma soomuhuseryano macikhwi macikhweene. Iho inaphitaanyerya itrataato, iproxura, aliivuru ni irevista mu ilocelo sincipale.

²³ Vaavaa munalaleeryaanyu michaka saphaama wa akina, mphariheleke ikaruma sa Piipiliya seiyo inarehereryiwa ni marehereryo a Yehova. Osuwela mukhalelo mphunryaanyu mu waalakhanya ni ohuserya soolaleeryiwa sa Anamoona a Yehova enahaala wooceenyeryaani waaleela akina.—Ahe. 13:15, 16.

²⁴ Wiiliwiili achu annapharihela interneti wi esuwele ehime ya sooleeliherya. Mwawiihiiha, ohiya pahiru soolaleeryiwa sa Mpiipiliyani, esaiti ahu, jw.org, ekaruma enakhumelela phaama mu omwaramwaxa michaka saphaama. Achu oothene orukurerya elapo ananwerya ompharihela komputatore wi yaalakhanye ni owiriyana waalakhanyiwa wa Piipiliya ni soolaleeryiwa sa Piipiliya mu ilocelo masaneene. Yaale anoovelela ovaanela ni hiyo naari yaale ari mmapuro yaawo Anamoona a Yehova ahinaacelaaya ophiyawo ananwerya otholathola soororomela sahu moorweela wa ompharihela jw.org owannyaya.

²⁵ Mwa yeeyo, ninnavuwiha esaiti jw.org elukuluku yoothene nnakhalaahuno ekari. Wakhala wi muchu oonikoha vooloca sa soororomela sahu, nnanwerya ompharihela telefoni naari komputatore wi nimoonihe naakhulo noophwanelela. Wakhala wi nookumana ni muchu yoowo onaloca elocelo ekina, ophitaanyerya elocelo ya ineneeryo, nnanwerya omuthoonyerya mu esaiti ahu wi amphwanye Piipiliya ni soolaleeryiwa sa Piipiliya mu elocelo awe. Alaleeryi ancipale annapharihela ixilema inaphwanyeya mu esaiti ahu wi epaceryihe ovaanela vooloca sa Piipiliya.

ONAMOONA WOOHILAKELELA

²⁶ Yesu aahiloca wa yaale yaawiriyana Masu awe: “Nyuwo muri omwaleela wa elapo ya vathi. . . . Hiihaa omwaleela wanyu waaryeke vamiithoni va achu, wi anoonaaya miteko anyu yaphaama yaacicimiheke atiithinyu ari wirimu.” (Mat. 5:14-16) Oohuserya yaale yaanooniherya mikhalelo sa Muluku moorweela wa omutakiherya Yesu, yoowo aalonce sa yoowo mwaneene ariki: “Miyo kiri omwaleela weelapo ya vathi.” Yesu oovaha yootakiherya wa Akristu mu weemererya wi “omwaleela wa okumi” onaarya wi waakhaviherye oothene yaale anahaala onwiriyanaka.—Yoh. 8:12.

²⁷ Murummwa Paulo oonivaha tho yootakiherya wi ncharihe. (1 Kor. 4:16; 11:1) Ari Watena, owo aanalaleerya mahiku oothene mmusika mapuro yaawo aaphwanyeiye achu. (Saw. 17:17) Akristu o Filipi yaahichariha yootakiherya awe. Ni mathowa yaala, Paulo aahaarepela wi awo yaakhala “veeri wa achu yaala ootakhala ni oohuweliha a mutano,” variyari va yaawo saakhalavo “mithuko soomwaleela veelaponi yavathi.” (Fil. 2:15) Olelo nnanwerya weeriha eparipari ya Omwene waarya moorweela wa masu ahu ni saweera yakhalavo ekari ya waaleela akina michaka saphaama. Chiryene, yootakiherya ahu yaphaama ntoko ororomeleya ni waapwacha achu enanwerya waakhaviherya woona wi hiyaano nri oohiyana ni elapo. Vanonto, wakhala wi nnaloca ni achu vooloca sa michaka saphaama, awo anahaala osuwela ntakhara heeni nryaahu oohiyana ni elapo.

²⁸ Achu a Yehova annaloca michaka saphaama wa oothene anakumanaayano o muteko, osikola, mmapuro awaaciwamo, naari vaavaa anapakaaya miteko saya sa nihiku nnihiku. Wakhala wi nri vamukwahani, nnawerya okhalano ekari ya oloca ni yaawo nnachaananaahuno. Muchu ti muchu, onaphwanela okhalaka ooreheryeya opaceryiha ochekula mu olaleerya. Hankooni nikhale ooreheryeya oloca ni akina mu elukuluku yoophwanelela.

²⁹ Nnahaala oceenyeryeya weerano yeeyo wakhala wi ninnuupuwela wi ninnamvuwiha Mpatuxa ahu ni ocicimiha nsina nawe. Mwawaaceererya, nnawerya waakhaviherya yaale a murima waphaama omusuwela Yehova wi ewerye tho omurumeela yoowo ni okhalano ewehereryo ya okumi yoowo onarweela mu omuroromela Yesu Kristu. Yehova onnahakalala ni wiilipixerya ntoko yoowo nave onoona okhala muteko waweela.—Ahe. 12:28; Wup. 7:9, 10.

EKULUCU

³⁰ Ti yookhwela ya Yehova wi michaka sa Omwene silaleeryiwe veelapo yoothene, ntoko mpooma ni mmiceche. Mwa yeeyo, miloko ni yaawo anarumeela mmapuro oovalaanyeya annaakhela ikulucu orweela ofiliyale. (1 Kor. 14:40) Eyo enniiwanana ni marehereryo a Muluku a nsana noopacerya. (2 Kor. 10:13; Gal. 2:9) Ni waaceereryeya wa oya vahoolo wa muteko wa Omwene mmahiku yaala ookuchula, muteko onnakhwaanihereya vaavaa marehereryo a ekulucu ya muloko anakhalaaya ooreheryeya phaama.

³¹ Marehereryo yaala anavareryeliwa ni ooweherya a muteko. Murummwa oorumeela onanwerya okawaka ikulucu. Aakhalavo makupa meeli a ikulucu, ikulucu sa nikhuuru ni ikulucu sa muchu mukhateiye. Wakhala wi ekulucu ya muloko ekhaani, ahooleli a makhuuru a olaleerya anahaala ovahererya ikulucu wi nikhuuru na alaleeryi niweryeke olaleerya. Mmukhalelo mukina, wakhala wi ekulucu etokweene, mulaleeryi ti mulaleeryi onamukhalano ekulucu awe.

³² Mulaleeryi yoowo onakhalano ekulucu awe onahaala okhalano makupa awe wi alaleeryeke wakhala wi hepakiwe marehereryo a oya muteko woolaleerya naari wakhala wi hathukumanne nnikhuuru. Ntoko yootakiherya, akina annakhalano ekulucu waacamela mpuro analapaayawo wi elaleeryeke elukuluku ya wiichuuwa naari ephenre muteko. Ichoko ikina sinnakhalano ekulucu waacamela owannyaya wi elaleeryeke mmahiku makina, ntoko oxekuwa. Okhalano ekulucu ya muchu mukhateiye osuwenleiye phaama enanwerya omukhaviherya mulaleeryi opharihela phaama elukuluku awe wi alaleerye. Chiryene, ekulucu ya muchu mukhateiye enanwerya tho olaleeryiwa ni makhuuru makina. Wakhala wi munnachuna okhalano ekulucu anyu, mumveke munna yoowo onawehererya ikulucu.

³³ Wakhala wi oowehererya a nikhuuru ookhalano ekulucu ya nikhuuru naari mulaleeryi akhalano ekulucu awe, awo anaphwanela ororomela wi wiilipiserya woopakiwa wi alociweno muchu ti muchu mu ipa soothesene. Marehereryo a waakhwaniha ekulucu anaphwanela okhala mwawiiwanana ni malamulo a elapo vooloca sa ovuwiha michaka wa akaneene a vaate. Ooweherya a nikhuuru naari mulaleeryi yoowo orino ekulucu awe onaphwanela wiilipixerya wi amalihe ekulucu awe variyari va miyeeri mixexe. Amanle omaliha ekulucu awe, onaphwanela omuleela murummwa a ikulucu. Mwawiiwanana ni mikhalelo, oowehererya a nikhuuru na olaleerya naari mulaleeryi onanwerya olapa mu ekulucu awe ekwaha yanaawiili naari omukookiherya murummwa a ikulucu.

³⁴ Wakhala wi alaleeryi oothene anniiwanana, ekulucu enanwerya omalihiwa. Navetho, nnamusepa wi alaleeryi eeli naari awaaca esekurye ipa imohamoha ehivinrevo elukuluku yincipale, yeeyo yaahaala waanyeenyeiha alipa a vaate. Hiiha nnamooniherya waapwacha annihu ni achu mu ekulucu.

WIIWANANA WI NAAHUSIHE ACHU A ILOCELO SOOTHENE

³⁵ Oothene anaphwanela ohuserya sa Yehova Muluku, mwanawe ni Omwene awe. (Wup. 14:6, 7) Nri oolakelela waakhaviherya achu a ilocelo soothene wi yiichane nsina na Yehova wi evuluxiwe ni onwara muchu ahiihaano. (Aro. 10:12, 13; Kol. 3:10, 11) Makacamiho taani anakhumelela vaavaa nnalaleeryaahu michaka yaphaama mmapuro yaawo onalociwawo ilocelo soohiyanahiyana? Nni nivoothe hai makacamiho yaawo wi naakhaviherye achu ancipale okhalano ekari ya wiiwa michaka sa Omwene mu elocelo aniiwexexaaya phaama?—Aro. 10:14.

³⁶ Ekulucu yeeyo muloko ti muloko othanleliwaaya oniiwanana ni elocelo ya Muloko. Mapuro yaawo onalociwamo ilocelo soohiyanahiyana, alaleeryi a miloko soohiyanahiyana annalaleerya mu makupa mamohamoha. Mwa yeeyo, ti woochuneya wi alaleeryi a muloko ti muloko eteteiweke ni waalaleerya achu yaawo analoca elocelo ya. Eyotho ennaphariheleya wakhala wi wookhalavo mukipici wa vayaakhani wa okawa miwopelo. Nto, vaavaa anavahaaya onamoona wa vanlakani ni woohilakelela, alaleeryi ananwerya oloca ni achu oothene ni ovaha soolaleeryiwa mu elocelo eri yoothene.

³⁷ Mmikhalelo mikina, miloko sa ilocelo ikina hasinawerya omaliha makupa makina oorakamela a ekulucu. Mmikhalelo seiyo, ooweherya a muteko a miloko inavolowela anaphwanela ovaanelaka mukina ni mukhweiye ni yoolakelela ya opaka marehereryo wi emalihiwe ekulucu. Eyo enahaala waavaha ekari achu oothene wi ewerye wiiwa michaka sa Omwene nave onahaala osepiwa wiilipiserya woohiphwanelela.—Masi. 15:22.

³⁸ Tiheeni nnaphwanelaahu weera wakhala wi muchu onaakhenle onaloca elocelo ekina? Hannaphwanela wuupuwela wi alaleeryi yaawo analoca elocelo awe anahaala omulaleerya. Alaleeryi akina annahuserya mukhalelo wa opaceryiha ovaanela mu elocelo yeeyo enalociwa mu ekulucu aya. Nnawerya omooniha muchu mukhalelo oneereiye aalakhanye ni okumiha yoolaleeryiwa mu elocelo awe mu esaiti ahu yaweemereryiwa jw.org, naari nnawerya omvaha yoolaleeryiwa mu elocelo awe.

³⁹ Wakhala wi muchu ohooniherya nchuno, nnaphwanela omwaavya mulaleeryi mukina oophwanelela wi aweryeke omukhaviherya mu elocelo oniiwexexeiye. Nave tho nnawerya omuleela nipuro nawaacamela oneeriwawo muthukumano wa elocelo awe. Wakhala wi onnachuna olociwano ni muchu onaloca elocelo awe, nnawerya omooniha mukhalelo wa orepela sooleeliherya mu jw.org. Efiliyale enahaala wiilipixerya omwaavya mulaleeryi a waacamela, nikhuuru naari muloko oni owerye omvaha nikhaviheryo.

⁴⁰ Nnaphwanela opwahiherya omusekuryaka muchu yoowo ophiyerya alonce wi onnaxekuryiwa ni muchu onaloca elocelo awe. Mmikhalelo mikina, efiliyale enahaala waaleela asitokweene wi nlelo haphwanyen’ye mulaleeryi yoowo onaloca elocelo awe. Wakhala wi eyo yoheereya, nnaphwanela opaka yeeyo nnaweryaahu wi nipwahiherye waaceererya nchuno nawe. Wakhala wooweryeya, nnanwerya omuhusiha Piipiliya, nipharihelaka yoolaleeryiwa ya elocelo awe. Wakhala wi ninnapharihela phaama iruku ni omveka wi aalakhanye soorepa iromoliwe, owo onanwerya wiiwexexa mahusiheryo ari mathipelo a Piipiliya. Muchu mukina a veechokoni vawe osuwenle phaama elocelo awe ni elocelo ya vanipuroni onamukhala ooreheryeya wi akhaviherye otaphulela.

⁴¹ Wi nimuhoole muchu orino nchuno mmarehereryo a Muluku, nnaphwanela onwopa ophiya mmithukumano sahu, naamwi ahiiwexexaka phaama yeeyo enalociwa. Vaavaa soorepa inaalakhanyiwaaya, nnaphwanela omukhaviherya ophwanya soorepa moorweela wa ompharihela Piipiliya mu elocelo awe wakhala wi onnaphwanyeya. Okhala ni akina mmulokoni enanwerya omulipiha ni omukhaviherya owo oya vahoolo mmakupa oomunepani.

⁴² Makhuuru makhaani: Nikhuuru nikhaani nnaphitaanyerya alaleeryi yaawo analaleerya mu elocelo ekina ohiya yeele ya muloko, naamwi mutokweene naari murummwa oophwanelela ahiphwanyeyaka wi ahooleleke mithukumano esumana ti esumana mu elocelo yeele. Efiliyale enahaala weemererya wi muloko wookhalano nikhuuru nikina wakhala wi sinnaphwanyeya sooleeliherya inacharela:

1. (1) Waaca wa achu mmukuma yoowo analoca elocelo ekina opwaha elocelo ya muloko.

2. (2) Enaweheryiwa wi alaleeryi vakhaani esuwele elocelo aya naari anniilipiserya wi ehuserye.

3. (3) Nikhuuru na atokweene nri nooreheryeya ohoolela muteko woolaleerya mu elocelo yeeyo.

Wakhala wi nikhuuru na atokweene ninnachuna okhaviherya nikhuuru nikhaani, anahaala ovaanela ni ooweherya a ekulucu. Owo akhweya oosuwela miloko mikina ineererya waalaleerya achu a elocelo yeeyo nave onamvahererya miselo soophwanelela inahaala okhaviherya olakelela muloko taani onaphwanelela okhaviherya nikhuuru nikhaani. Omanle olakeleliwa muloko, atokweene anahaala orumiha ekaarata ofiliyale nave eveke weemereryiwa ntoko muloko onakhaviherya nikhuuru nikhaani.

⁴³ Makhuuru: Efiliyale enahaala weemererya muloko wi onnakhaviherya nikhuuru wakhala wi sinnaphwanyeya sooleeliherya inacharela:

1. (1) Ekhalevo achu awaakhwanela arino nchuno ni oya vahoolo wa muteko woolaleerya mu elocelo yeeyo.

2. (2) Alaleeryi vakhaani eloceke elocelo yeeyo naari ehuseryeke yeeyo.

3. (3) Akhalevo mutokweene oophwanelela naari murummwa oorumeela wi eeciheke muthukumano mmoha mano wa esumana ti esumana—naari makupa mamoha a muthukumano wa esumana ti esumana, ntoko mwaha wa vanlakani naari Mulipeleli—mu elocelo yeeyo.

Vaavaa soovekeya iha inaakhwaniheryeyaaya, nikhuuru na atokweene nnahaala orumiha ekaarata ni soothene inaweheryiwa ofiliyale evekaka weemereryiwa wawaakhwanela ntoko muloko onakhaviherya nikhuuru. Mutokweene naari murummwa oorumeela onahoolela onahaala okhala “ooweherya a nikhuuru” naari “murummwa a nikhuuru” yoowo orino murici wa ohoolela nikhuuru.

⁴⁴ Nikhuuru nimanle otikitheryiwa, nikhuuru na atokweene nnakhaviherya nikhuuru nnahaala olakelela makupa taani a mithukumano sa muloko anaphwanela opakiwa mu nikhuuru nave ikwaha kavi mithukumano inaphwanelaaya opakiwa variyari va mweeri. Ananwerya tho opakiwa marehereryo a mithukumano sa muteko woolaleerya. Oothene a nikhuuru anahaala ohooleliwaka nnikhuuru na atokweene yaawo anahoolela nikhuuru nenlo. Atokweene anahaala ovahaka ohoolela woophwanelela nave anahaala ovahaka nikhaviheryo na soothowa sa nikhuuru nenlo. Vaavaa ooweherya a ekulucu onalapeiye nnikhuuru nenlo na muloko mu esumana ya vameekhaaya, owo onahaala orepela Ofiliyale oya vahoolo wa nikhuuru nenlo, nave onahaala oloca soothowa sa nikhuuru. Moovira wa elukuluku, akhweya nikhuuru nnamweemereryiwa okhala muloko. Wakhala wi oothene annachariha ohoolela woomuluku, eyo enahaala omuhakalaliha Yehova.—1 Kor. 1:10; 3:5, 6.

ONAMOONA WA MAKHUURU

⁴⁵ Akristu a wiiveleela aakhalano murici wa olaleerya michaka saphaama wa akina. Sookhalavo mikhalelo sawaaca sa weerano yeeyo, nto ancipale a hiyo ninnasiveliwa oya mmuteko woolaleerya ni akina. (Luka 10:1) Ni mathowa yaala, muloko onnathukumana ntakhara muteko woolaleerya veeri va esumana ni omakuchuwelo. Mahiku a iferiyatu ennakhalavo ekari ya olaleerya, woona wi anna ancipale hanalapa. Nikhuuru na Muteko wa Muloko ninnapaka marehereryo a mithukumano sa muteko woolaleerya mu elukuluku nnipuro noophwanelela variyari va nihiku ni osekuwa.

⁴⁶ Nikhuuru na alaleeryi ninnalapa vamoha ni ‘olipihana munroromelo.’ (Aro. 1:12) Alaleeryi avyaani ananwerya olapa vamoha ni ale arino mavyakelo wi evyakihiwe. Mmapuro makina, onamukhala waphaama alaleeryi apiili naari awaaca olapa vamoha nthowa na woopiha wa nipuro. Naamwi mulakelenle olaleeryaka mukhatiinyu mu ekulucu, othukumana nnikhuuru enamukhala yoolipiha wa oothene. Osuwela wi akina ari mmuteko woolaleerya, mu ekulucu emohamoha, eyo enanwerya woolipihaani. Mapiyoneero ni akina hanaphwanela woona wi anamukhinyereryiwa okhaviherya muthukumano woothene wa muteko woolaleerya orehereryiwe moorweela wa muloko, xaxaxa wakhala wi onapakiwa mahiku oothene. Nyenya, wiiliwiili ti wooweryeya okhaviherya mithukumano mikina sa muteko woolaleerya esumana yoothene.

⁴⁷ Hankooni oothene ahu nicharihe yootakiherya ya Yesu ni arummwa awe! Nnaphwanela ororomela wi Yehova onahaala oreeliha wiilipixerya wahu wi nikhaviherye muteko woochuneya wa olaleerya michaka saphaama sa Omwene.—Luka 9:57-62.