Ti Woochuneya Wiiwanana wi Nlaleerye mu Ekulucu Erino Ilocelo Soohiyanahiyana

Wiiliwiili achu annaakhulela phaama wakhala wi anawiriyana michaka sa Omwene mu elocelo aya yooyariwano. Akhweya ti nthowa nene mu Pentekoste a 33 E.K., Yehova aapankeiye marehereryo wi Ayuta erwe mu “ilapo sothene sa vathi,” wi yiiwe michaka yaphaama mu ‘malocelo aya’ naamwi akhweya yaasuwenle oloca elocelo yaari yawunlaana mu elapo aya, ntoko Ehepiri naari Ekriki. (Saw 2:5, 8) Olelo, mu ekulucu erino ilocelo soohiyanahiyana, ipa sa omwene inaphariheliwa ni miloko sa ilocelo soohiyanahiyana sinnakhalano ikulucu sookhuveela. Ti mwawiihai alaleerye a miloko seiha eneeraaya elapeke mwawiiwanana wi elaleerye wa muchu ori oothene navetho mu elukuluku emohamoha esepaka owaakanyerya akaneene a vaate?

• 

  Ti yaphaama okoha (Masi 15:22): Ooweherya a muteko onaphwanela ovaanela ni anna wi aphwanye mukhalelo waphaama wa olaleerya michaka yaphaama onahaala okhaviherya miloko soothene. Wakhala wi ekulucu aya ekhaani, miloko seiho inalaleerya mu ilocelo ikina inamuchuna wi nyuwaano muhiye olaleerya mu ipa inaphwanyeya mu ekulucu aya. Vakina vaya wakhala wi hanawerya omaliha ekulucu aya, awo akhweya anamoovekaani wi muhihiye olaleerya mu ekulucu eya nyenya mwaaleele muchu ori oothene onooniherya nchuno mu ekulucu yeeyo. (od-T epaax. 93 epara. 37) Naari awo ananwerya oveka wi muloko anyu okhaviherye waaphwanya achu analoca elocelo aya wi ewerye waaxekurya. (km-T 12/7 epaax. 5, ekaaxa) Muupuwele wi vakina vaya achu anakhala vaate vamoha, annaloca ilocelo soohiyana. Marehereryo a waakhwaniha ekulucu anaphwanela okhala mwawiiwanana ni malamulo a elapo vooloca sa ovuwiha michaka wa akaneene a vaate.

• 

  Wiiwanana (Éfeso 4:16): Mucharihe vakhivirukhiviru malakiheryo oothene munaakhelaanyu ni ooweherya a muteko. Apwanne nyuwaano munneeciha yoohuserya ya Piipiliya ni muchu yoowo onaloca elocelo ehiri yeeyo ya muloko anyu? Mulipa oohuserya onahaala waakuvela oya vahoolo wakhala wi onathokororyiwa ni muloko yoowo onaloca elocelo awe.

• 

  Wiirehererya (Masi 15:28; 16:1): Wakhala wi mwaneene a vaate ekulucu anyu onaloca elocelo ekina, mwiilipixerye olaleerya michaka yaphaama wa yoowo. Nyuwaano munanwerya wiirehererya moorweela wa waavya osuwela ilocelo seiho inalociwa wiiliwiili, nave munpaxaare woosiilo Piipiliya mu elocelo yeeyo naari exilema mu ekhankoonya anyu. Munanwerya tho ompharihela aplikativo JW Language wi muhuserye mukhalelo wa omwenyerya mu ilocelo sincipale.