Nyuwo Munahaala Okhala Piyoneero Ookhaviherya?
1. Ntakhara heeni elukuluku ya Mukonelo ti elukuluku yaphaama ya waacererya orummwa ahu?
1 Elukuluku ya Mukonelo elukuluku yaphaama ya waacererya orummwa ahu. Ti elukuluku yeeyo hiyaano nnuupuwelelaahu osivela otokotoko wa Yehova wa omvaha Mwanawe ntoko mukucho. (Yoh. 3:16) Ela enneeriha wi murima ahu okhala woosareya ni othamalela, ochuna mwawiiseela waaleela akina vooloca sa Yehova ni yeeyo owo onaweereleiye achu. (Yes. 12:4, 5; Luka 6:45) Elukuluku nnapuhaahu tho ekampaanya ya vameekhaaya ya waawopa asinthamwene ni achu mu ekulucu wi eye o Mukonelo ni hiyo. Vahoolo vaya, ninniilipixerya waacererya ochuna wa yaale yaaruule. Munahaala waaceererya orummwa anyu moorweela wa okhala piyoneero ookhaviherya mu Marsu, Apirili, nari Maiyu?
2. Tiheeni eneeriha Março okhala mweeri waphaama wa okhala piyoneero ookhaviherya?
2 Março Okhale Mweeri wa Vameekhaaya: Março onahaala okhala mweeri waphaama wa okhala piyoneero ookhaviherya. Yaawo enii ekhale anahaala othanla yookhweleya ya iwora, iwora 30 nari iwora 50. Wakhala wi oxekurya wa ooweherya a esirkwitu onahaala okhala mu Março, mapiyoneero ookhaviherya anahaala okhala va muthukumano yoowo onapakeiye ni mapiyoneero a elukuluku yoothene ni avameekhaaya. Ekampaanya ya okawa nwopelo wa Mukonelo, onahaala weereya Nanawiili, 26 a Marsu a 2013, yohaaceereryiwa opwaha iyaakha ivinre nave enahaala opacerya 1 a Marsu. Waaceererya, Março okhalano omala wa isumana thanu. Ntakhara heeni muhinathokororyaanyu mwawiiseela wakhala wi munahaala wuuka weeriha wi okhale mweeri wa vameekhaayaxa wa eyaakha?
3. Marehereryo taani nnaphwanelaahu opaka wi naacererye orummwa ahu?
3 Murehererye Hiihaano: Vano elukuluku ya ovarerya eprograma anyu nave moone tiheeni munahaalaanyu weera wi mukhale piyoneero. Wiiwanana wa echoko ti wookhweleya, mwawiihiiha mpharihele elukuluku ya Malapelo Eechoko anyu wi mvaanele soolakelela sa echoko ni mpake eprograma. (Masi. 15:22) Wakhala wi hamunawerya okhala piyoneero, muhikhale ooceecheya. Munanwerya orehererya eprograma anyu wi mwaacererye olaleerya mmahiku munakhumaanyu? Mwanwerya waaceererya nihiku nimoha veeri va esumana oya mu orummwa?
4. Mareeliho taani anahaala okhumelela mu waaceererya muteko ahu variyari va Marsu, Apirili, ni Maiyu?
4 Vaavaa nnaacereryaahu muteko ahu variyari va Marsu, Apirili, ni Maiyu, nnahaala waacererya otheya ni ohakalala wa omurumeela Yehova ni waavaha akina. (Yoh. 4:34; Saw. 20:35) Opwaha soothene, wiilipiherya wahu wawiiveleela onahaala omuhakalaliha Yehova.—Masi. 27:11.