Ikari Ikina sa Omuthamala Yehova
1. Nrehereryo taani nivyaani nnahaala onikhaviherya wi ‘nimuthamale Yehova vatokotoko’?
1 Opacerya Marsu ovinre, nohaakhela nrehereryo nivyaani, nnaavaha alaleeryi ekari ya opiyoneero wookhaviherya wa iwora 30 khata Marsu ni Apirili ni mweeri wa oxekurya wa ooweherya a esirkwitu. Waakhala wi oxekurya wa ooweherya a esirkwitu oneereya mu miyeeri miili, alaleeryi avenke iwora 30 poti othanla mweeri mmoha nari mukina wi erumeele ntoko mapiyoneero ookhaviherya. Mapiyoneero ookhaviherya oothene anahaala owiriyana muthukumano woothene yoowo ooweherya a esirkwitu onapakeiye ni mapiyoneero a elukuluku yoothene ni avameekhaaya. Eyo enataphulela wi wakhala wi iwora 50 sinnanivila waakhwaniha, hiyaano nlelo nnanwerya ‘omuthamala Yehova vatokotoko’ ntoko mapiyoneero ookhaviherya itila xexe vayaakhani ni iwora 30 inachuneya!—Salmo 109:30; 119:171.
2. Tiheeni anahaalaaya opuha mapiyoneero ookhaviherya variyari va oxekurya wa ooweherya a esirkwitu?
2 Variyari va Oxekurya wa Ooweherya a Esirkwitu: Vano ancipale anahaala owerya orumeela ntoko mapiyoneero ookhaviherya variyari va oxekurya wa ooweherya a esirkwitu ni opuha olipihana onarwa vaava nnalapaahuno mu orummwa. (Arom. 1:11, 12) Mapiyoneero ookhaviherya arino muteko wa elapo poti omveka ooweherya a esirkwitu wakhala wi owo onahaala olapa ni yaawo Nawoorowa nari Namurunku. Akhweya ancipale anahaala oveka nihiku nimoha omutekoni waya variyari va esumana wi elape ni ooweherya a esirkwitu. Mwawaacererya, eyo enahaala okhala yoolipiha wa mapiyoneero ookhaviherya owiriyana muthukumano vamoha ni mapiyoneero a elukuluku yoothene!
3. Ntakhara heeni elukuluku ya Mukonelo ti yaphaama wa opiyoneero wookhaviherya?
3 Variyari va Marsu ni Apirili: Yaale apunhe marehereryo akhalai a opiyoneero wookhaviherya wa iwora 30 mweeri mmoha variyari va Mukonelo vano poti waaceererya ‘ephepa aya yomuthamalano’! (Ahe. 13:15) Marsu ni Apirili miyeeri saphaama wi naacererye orummwa ahu ntoko mapiyoneero ookhaviherya. Variyari va elukuluku yeela khata eyaakha, ninnapaka makupa mu ekampaanya yoohakalaliha wi naawope akina wi erwe va Mukonelo. Mwawaacererya, woona wi ancipale annaaceererya orummwa aya variyari va elukuluku ya Mukonelo, hiyaano poti olapa ni alaleeryi oohiyanahiyana. Wavira Mukonelo, hiyaano ninnathokororya ochuna wooniheryiwe ni yaale yaaruule ni waalipiha wi erwe va mwaha wa vanlakani wavameekhaaya. Murima anyu onahaala wooceenyeryaani wi mpuhe ikari seiyo sa opiyoneero wookhaviherya?—Luka 6:45.