Makoho Aakhuliwe

◼ Malakiheryo taani a Piipiliya anaphariheleya vooloca sa waapharihela muteko atelefone selular mu mithukumano seeKiristu ni mu orummwa?

“Itxu Sothene Sokhalano Elukuluku Aya.” (Ekle. 3:1, BNM): Atelefone selular annaavaha achu ekari ya orepa nari oloca mukina ni mukhwaawe elukuluku yoothene. Nyenya, sookhalavo ilukuluku seiyo aKiristu ahinachunaaya okhala awuukhuliwa ni atelefone aya. Mwa ntakiheryo, mithukumano sahu eri elukuluku ya omulapela Yehova, waakhela ikano soomunepani, ni opuha onthamwene wa olipihana. (Malam. 31:12; Sal. 22:22; Arom. 1:11, 12) Nanwerya onwala telefone ahu vaavaa nnaphiyaahu nave nikookele woona michaka sahu imanle mithukumano? Wakhala wi nnaweherya echu yawaakuveya enakhweleya wi nihinwale telefone ahu, nnaphwanela omuhiya mmukhalelo oni ohiwuukhule akina.

‘Mweereno Sothe Sene Ntakhara Mitchaka Yaphama.’ (1 Akor. 9:23): Ikwaha ikina, annakhalavo mathowa oophwanelela ompharihela muteko telefone selular mu orummwa. Mu ntakiheryo, munna onahoolela poti ompharihela wi aloce ni yaale analaleerya mmakupa makina a ekulucu. Wiiliwiili alaleeryi annampharihela telefone selular aya wi emwiichane muchu onachuna nari oohuserya a Piipiliya ehaakumve omuxekurya, xaxaxa wakhala wi muchu owo onakhala makupa oorakamela. Wakhala wi hiyaano noomukuxa telefone ahu, nnaphwanela wiikasopa wi ahinikwace vaavaa nnalocaahu ni namakhala. (2 Akor. 6:3) Vaavaa nnaawehereryaahu alaleeryi akina, ohiya omwiichana nari omurepela michaka nthamwene, hiyaari yaphaama okuha muupuwelo ahu mu orummwa ni yaale nnalapaahuno vamoha?

Mwaacicimihe akina. (1 Akor. 10:24; Afil. 2:4): Hinnachuna okhala ooyere vooloca sa ophiya mu elukuluku mmithukumano sa muteko wa mmacani ni yoochuna ya wi elukuluku yoothene nnahaala omwiichana nari omurepela mukina wi nsuwele weiwo nikhuuru nnalaleeryaayawo. Vaavaa nnalekelaahu ophiya, wiiliwiili onnakhweleya orehererya nikhuuru wanaawiili. Nyenya, saweereya soohiweryeya poti oneeriha olekela ophiya. Mwawiihiiha, vaavaa nnakhovelelaahu ophiya mu elukuluku, hiyaano ninnooniherya ncicimiho wa marehereryo a Yehova, wa munna onahoolela, ni wa alaleeryi akhwiihu.