Taani Aahaala Osiveliwa ni Ola?
1. Vaavaa nnaalakhanyaahu erevista A Sentinela nari Despertai!, tiheeni nnaphwanelaahu othokororya, nave ntakhara heeni?
1 A Sentinela ni Despertai! anapakiwa yuupuweliwaka elapo yoothene. Mwawiihiiha, miyaha sinnathokororya miru soohiyana hiyana. Vaavaa nnaalakhanya mwaha ori woothene mu erevista ahu, nnaphwanela othokororya taani xaxaxa aahaala osiveliwano, namala namvahe muchu yoowo.
2. Miyaha taani inaphwanyeya mu irevista sahu sahaala waasivela akina?
2 A Sentinela a hiihaano onathokororya mwaha wa Piipiliya yoowo nyuwano mwaaloncaanyu ni nthamwene oomutekoni? Wookhalavo mwaha vooloca sa okumi wa echoko waahaala omukhaviherya mmusi anyu? Moomusuwela muchu onachuna oya mu elapo yeeyo enathokororyiwa mu Despertai!? Emoha ya irevista iha yaahaala waasivela achu a mapuro a maroca nari mapuro a olamulela mu ekulucu anyu? Ntoko yawooniherya, erevista yeeyo enathokororya makacamiho yaawo achu awuuluvala anakumanaayano poti waasivela achu mmapuro anaakhapelela awuuluvala. Mapuro a malamulo poti osiveliwa ni erevista enaloca miyaha sa ohooxa.
3. Muloce yootakiherya emoha yeeyo enooniherya esisapo ya ovaha irevista wa yaale nnoonaahu wi anahaala osiveliwano miyaha saya.
3 Sookhumelela: Amanle omwaakhela Despertai! a Otupuru a 2011 “Moota wa Waaphuwa Anamwane Aphaama” mutheli mmoha a Afrika do Sul aahitelefonaarela ixikola 25 mu ekulucu ya muloko aya. Mapuro makhumi meeli napiili yaahiweemererya nave yaahaakawela anaxikola aya. Mutheli mukina mu elapo yeeyo aahikhalano moonelo mmohamoha nave aavaha irevista mu ixikola mu ekulucu awe. Ahusiha mu emoha ya ixikola seiyo yaalakelela opharihela erevista mu mahusiheryo aya a esumana eri yoothene. Mutheli aahikawana yaweereya awe ni ooweherya a esirkwitu. Vano oweherya a esirkwitu aaceenyenrye miloko mu esirkwitu awe wi eloce ni ixikola mu ikulucu saya. Efiliyale yaahaakhela sooveka sincipale wi saaceereryiwe irevista seiyo ophiyerya opakiwa wanawiili!
4. Ntakhara heeni nnachunaahu ovaha irevista wa achu ancipale anaweryeya?
4 Irevista sahu inathokororya yootaphulela yeeparipari ya saweereya sa mutano nave sinnathoonyerya omuroromela Piipiliya ni Omwene wa Muluku. Irevista iho ti seiyo pahiru sinalaleerya “nivuluso” veelaponi yavathi. (Yes. 52:7). Mwawiihiiha hiyaano nnachuna waavaha achu ancipale anaweryeya. Mukhalelo mmoha wa weerano eyo ori wiikoha mukhatinyu, ‘Taani Aahaala Osiveliwa ni Ola?’