Mmupharihele Site Ahu wi Mwaahusihe Aniinyu
1. Tiivi eri yoolakelela ya nikupa na site ahu nrino muru “Crianças”?
1 Site ahu jw.org, orehereryiwe wa achu a iyaakha soothene. Makupa a site arino muru: “Crianças” (muye Ensinos Bíblicos > Crianças) annaakhaviherya amiravo ni asitiithi aya waataana mmoha ni mukina ni Yehova (Malam. 6:6, 7). Muni mpharihele hai makupa yaala wi mwaahusihe anamwane anyu?
2. Munii muthanle hai mwaha oniiwanana ni iyaakha wi muhuserye ni anamwane anyu?
2 Munatoroka: Khata mwaana ookhalano soothowa sawe. (1 Akor. 13:11) Munii muthanle hai mwaha oniiwanana ni iyaakha wi muhuserye ni anamwane anyu? Mwiikohe: ‘Tiheeni enahaala waasivela anamwane aka? Ophiyerya mweryo taani awo anaweryaaya wiiwexexa? Ophiyerya mweryo taani awo anaweryaaya owiriyana mwaha?’ Wa mwaana orino iyaakha chaaru nari vakhaani, nyuwo munaphwanela othokororya miyaha inaphwanyeya vathi va “Minhas Primeiras Lições da Bíblia.” Amusi akina annapuha miyaha sa Piipiliya mu nikupa “Ensine Seus Filhos.” Navetho, muthokororye miyaha inacharela.
3. Ti mwawiihai asitiithi anahaalaaya opharihela phaama miyaha ni miteko inaphwanyeya vathi va “Marehereryo a Malapelo Eechoko”?
3 Marehereryo a Malapelo Eechoko: Marehereryo awo ikaruma wi saakhaviherye ahooleli a ichoko ohuserya ni anamwane aya. Wi musuwele moota wa opharihela miyaha ni miteko, muhule nipuro na okumiha, nave mwaalakhanye “Guia para os Pais” wa khata marehereryo. Mpharihele miteko sa iruku ntoko ipaaxina soorerihiwa wi mwaahusihe anamwane anyu akhaani. Mwaakhaviherye anamwane atokweene waakhwaniherya marehereryo a ohuserya. Miteko soothene sa khata marehereryo inaloca miyaha nari soohuserya imohamoha sa Piipiliya, wa yeeyo, anamwane a iyaakha soothene poti opaka makupa a marehereryo mamohamoha a malapelo eechoko.
4. Tiheeni nnahaalaahu ophwanya mu nikupa “Okhale Nthamwene a Yehova”?
4 Okhale Nthamwene a Yehova: Iviidiyu, macipo ni miteko mu nikupa nenla na site ahu sinnaakhaviherya asitiithi waahusiha anamwane aya akhaani Masu a Muluku. (Malam. 31:12) Eviidiyu yookhuveya yooreerihiwa ennahusiha yoohuserya yoochuneya. Miteko seiya ntoko waavya ni waaphwanya axooku sinnacicimiherya soohuserya seiyo. Woona wi wiiliwiili anamwane annasiveliwa wiipa—nave macipo annaakhaviherya anamwane wuupuwela yeeyo ahusenryaaya—macipo a Omwene ni macipo arempwe xaxaxa wa anamwane annakuhiwamo moohihiyererya.
5. Ntakhara heeni asitiithi anaphwanelaaya omveka Yehova wi aakhaviherye waahusiha anamwane aya eparipari?
5 Asitiithi, Yehova onachuna wi mukhale tiithi ni mai a mphurelo. Mwawiihiiha mumveke yoowo wi ookhaviheryeni waahusiha anamwane anyu eparipari. (Amut. 13:8) Ni nikhaviheryo na Yehova nyuwo munanwerya waavyakiha anamwane anyu ‘okhalano miruku ophiyerya ovulushiwa, mwa nroromelo mwa Kiristu Yesu.’—2 Tim. 3:15; Masi. 4:1-4.