Mpharihele jw.org mu Orummwa Wanyu​—“Mukhale Nthamwene a Yehova.”

Makupa a jw.org “Soohusiha sa Piipiliya” aakhalano miyaha sa anamwane iniichaniwa “Mukhale Nthamwene a Yehova” enaphitaanyerya macipo, iviitiyu, ni miteko. Montoko opharihela makupa yaala mu orummwa wanyu? Wakhala wi munneeciha yoohuserya ya Piipiliya ni mmusi orino anamwane, ntakhara heeni ohimooniha? Eyo akhweya yaammweeriha otholathola makupa makina a Site ahu.

Vaavaa naakawaahu Michaka ya Omwene No. 38, munna mmoha aamphwanya muthiyana yoowo aapacenrye waalakhanya etrataato yeeyo aamvanheiye. Owo aakhalano anamwane awaaca yaasiveliwa ni etrataato. Mwawaakuveya munna aathokororya miyaha nave aamooniha site ahu oculi wa etrataato. Woona wi muthiyana aahooniherya nchuno, aarumiha eviitiyu emoha wa yoowo vamoha ni anamwane awe enaloca sa Petro ampharihelaka telefone.

Murokora mmoha aaloca ni nthamwene awe a muteko aarino anamwane vooloca sa site ahu ni miyaha sinaloca sa imusi. Muthiyana aavolowa mu jw.org vamoha ni anamwane awe. Ohoolo waya, owo aaloca ni murokora wi anamwane awe yaaniipa ncipo “Laleyaani Masu,” nnarweela mu nikupa “Mukhale Nthamwene a Yehova.”

Mwiikhovelelihe ni makupa yaala a jw.org ni okumiha iviitiyu, macipo, naari miteko mikina mu ekhankoonya anyu? Voocharela mpharihele nikupa nla na jw.org mu orummwa. Ela ekaruma yoophara muteko enanikhaviherya waarumeela Apwiya!​—Saweriwa Tarummwa 20:19.