Mmupharihele Site mu Orummwa—“Makoho a Piipiliya Aakhuliwe”
“Soohusiha sa Piipiliya” makupa a jw.org erino mwaha “Makoho a Piipiliya Aakhuliwe.” Wakhala wi nookhovelela nikupa nenla na makoho nnahaala omuthoonyerya namakhala site ahu maakhulo a soorempwa. Makoho yaala enanwerya tho ophariheliwa wi mpaceryihe ochekula mu orummwa. Nnaphwanela opaka nikoho nnahaala otannya nchuno mu ekulucu ahu, mmukohe namakhala moonelo awe, nave voocharela mmuleele tiheeni Piipiliya onaloceiye, mpharihelaka muupuwelo onarweela mu jw.org. Namala, ntharihe naari nimoonihe ti woowi niphwannyaahuwo miselo sahu. Mukhalelo mukina ori omuhiya wi aalakhanye maakhulo mu site. Mwaara a ooweherya aweeceeca onnaphwanya mphurelo moorweela wa oloca ariki: “Achu ancipale annakoha, apwanne Muluku tanatannya makacamiho ahu? Mwaahaala osiveliwa wiiwa waakhuliwa wa nikoho nenla mu asekunto 51?” Voocharela owo onnatannya yooruma enavaha yawaakhula yeeyo owo okuminheiye mu ekhankoonya awe. Nave onnakuchula apaceryihaka ekapitulu 11 ya liivuru Piipiliya Onahusiha Eheeni.