Mpharihele jw.org mu Orummwa Wanyu

Site ahu ekaruma yaphaama enanikhaviherya omwaramwaxa michaka saphaama “ophiyerya wiwo elapo ekomenlaya’wo.” (Saw. 1:8) Anamakhala ancipale hanamphwanya jw.org mukhataaya. Awo anasuwela pahiru emanle wooniheryiwa ni mulaleeryi.

Ooweherya aweeceeca mmoha aakhalano eviitiyu Ntakhara Heeni Omuhuserya Piipiliya? mu telefone awe nave aanooniherya mu ikari soothene akhaleiyeno. Ntoko yootakiherya, vaavaa onayeiye empa ni empa, owo onnaloca: “Kinapaka oxekurya wawaakuveya wi kaakhaviherye achu ophwanya maakhulo a makoho mararu oochuneya: Ntakhara heeni elapo yoosareya makacamiho? Muluku onahaala omaliha hai? Nave nnii niwerye hai ovilela mweelukuluku yeela? Eviitiyu ela ennathokororya makoho yaala.” Voocharela owo onnarumiha nave onnaweherya waakhulela wa namakhala. Eviitiyu ti yootannya murima ophiyerya wi achu ancipale hanamaala oweha ophiyerya omakuchuwelo. Amala, ooweherya aweeceeca onnaloca: “Nyuwaano mohiiwa wi munanwerya oveka yoohuserya ya Piipiliya mu interneti. Woona wi kiri va, kinamusiveliwa owoonihaani yeeyo mwawaakuveya.” Wakhala wi namakhala onneemererya, owo onnooniherya yoohuserya apharihelaka eproxura Michaka Yaphaama. Wakhala wi namakhala haano elukuluku, onnapaka marehereryo wi eereno yeeyo mu oxekurya onacharela. Vaavaa onayeiye nipuro na othuma yoolya, owo onnaloca echu emohamoha ni muchu waacamela yoowo emanle ochekula monthamwene. Nyuwaano munnampharihela jw.org mu orummwa wanyu?