Moota wa Orehererya Mapaceryiho Anahaala Oruuhela Mphurelo
1. Ntakhara heeni ti yoochuneya okhalano mapaceryiho a phaama?
1 Wi mukhale osiviha mapaceryiho anyu enachuneya wi mukhaleno yoochariha, opaceryiha waphaama onnahula ephiro wi mukhaleno ovaanela waphaama wa soorepa. Opaceryiha wa mphurelo onarweela wa mwaha nthanlilaahu, hiiha ntoko yoolya yoosiva, hiyo nnaphwanela wiilipiherya wiihusiha ni wiirehererya. (Masi. 15:28) Tiheeni munaphwanelaanyu weera wi mukhaleno mapaceryiho a mphurelo?
2. Ti mwa wi hai nnahaalaahu orehererya mapaceryiho oochuneya?
2 Muthanle Miyaha Soochuneya: Mapaceryiho ahu ananwerya okhala oochuneya, wa namakhala nari wa yaale nnavaanelaahuno. Vaavaa nnarehereryaahu, mwaha woochuneya mu ekulucu. Achu a ekulucu anyu annachuna olamulelo wa phaama, ekumi ya echoko yoohakalala, nari omala wa ikhoco? Wiiliwiili achu annasiveliwa oloca moonelo aya, nyenya orehererya muupuwelo ahu onnakhaviherya opaka makoho a moonelo. Nyuwano munanwerya opharihela muteko sawooniherya sa ntakiheryo orweela mu Orummwa Wahu wa Omwene nave weerano ntoko yookhovelela ya ekulucu anyu? Ntakhara heeni muhinarehereryaanyu mapaceryiho awo mu ohiyu anyu wa malapelo a emusi?
3. Ti mwawiihai nnahaalaahu opaka mapaceryiho nthokororyaka sookhovelela ni ovyakihiwa wa achu mu ekulucu ahu?
3 Muthokororye Sookhovelela ni Ovyakihiwa: Mmapuro makina onaweheryiwa wi namalaleya aakuvele oloca mwaha orweenleiye. Mmapuro makina onooniwa ntoko ohiisuwela, oloca echu ohipacenrye okoha muxelo wa namakhala nari miyaha mikina sa ekumi ya namakhala owo. Mmapuro makina, nthowa nawi achu akhalano malapelo aya hiyaano poti okhala otaphuwa ompharihela Piipiliya mmapaceryiho ahu. (Saw. 2:14-17) Ti waphaama, mmakupa yaawo achu ahiryaaya akiristu nari ahiraayano ekerexa ompharihela Piipiliya mu oxekurya wanaawiili, ohiya omuromola Piipiliya mu ekwaha yoopacerya. (Saw. 17:22-31)
4. Ekasope taani nnaphwanelaahu okhalano mu masu ahu a mapaceryiho?
4 Masu Oopaceryiha: Mureherye phaama mapaceryiho anyu. Mmasu a waakuveya, wiiliwiili ookhweya tooreeraxa. Masu ookhweya woopaceryani toochuneya tho. Muloce moohakalala. Muloce mweeparipari. Mooniherye onthamwene moorweela mwa otheya vakhaani eyo enahaala wooniherya ompwacha wanyu namakhala. Ochariha malakiheryo yaala onahaala onikhaviherya oreherya phaama mapaceryiho yaawo anahaala waaceenyerya achu mu ekulucu ahu wi elye “o’hasarini wa Apwiya.”—1 Akor. 10:21.