Wunnuwiha Mavyakelo ahu mu Orummwa​—Orehererya Masu ahu Oohulela

Ntakhara Heeni ti Yoochuneya: Wakhala wi masu ahu oohulela hanatannya nchuno, namakhala poti okwatelela mwaha nihaakumve ovaha onamoona. Mwawiihiiha, alaleeryi ancipale annathokororya masu ahu oohulela wi ekhale makupa ookhweleya vancipale mu ovaanela wahu. Naamwi sawooniherya sa ntakiheryo iphwanyeyaka mu Orummwa Wahu Wa Omwene ni liivuru Raciocínios, iho tahi wi wiiliwiili sinnaphitaanyerya masu oothene oohulela, nyenya yoolakelelaaya ori onikhaviherya okhala awaakuveya. Naamwi sawooniherya sa ntakiheryo iri sawaakhwanela, alaleeryi poti olakelela otoroka naari orehererya masu aya oohulela. Hiiha, nnamukhalano mphurelo wakhala wi ninnarehererya phaama masu ahu oohulela, ohiya wiimoona oloca yeeyo enarwa mmuupuweloni vaavaa namakhala onahuleiye mulako.​—Masi. 15:28.

Moota wa Weerano Yeela:

• Muthanle mwaha anyu. Owo onaphwanela orweela mu yoolaleeryiwa yeeyo munavahaanyu nave enaphwanela okhala yoochuneya wa achu mu ekulucu anyu.

• Murehererye mwawiichaalela masu anyu oopacerya nari meeli yaawo munahaalaanyu oloca mwamala olocela. Nyuwaano poti opacerya muriki: “Mi kiri vaava ntakhara . . . ” “Achu ancipale annuukhuwa vooloca sa . . . ,” “Miyaano kaanachuna osuwela moonelo anyu vooloca sa . . . ,” naari echu ekina. Masu ookhweya, wiiliwiili annakumiherya mphurelo waphaama. Alaleeryi akina annathanla wuupuwelela masu aya oohulela.

• Orehererya makoho a moonelo yaawo anahaala omvoliiherya namakhala mu ovaanela. (Mat. 17:25) Muupuwele wi muhaakumve ophiya akhweya owo aanuupuwela ichu ikina, mwa yeeyo makoho hanaphwanela okhala oowalamela nari anahaala omoopopiha.

Mweererye ela Variyari va Mweeri:

• Mwiivahe elukuluku variyari va malapelo eechoko wi murehererye nave mooniherye masu anyu oohulela.

• Mwakhala mu orummwa, mukawane ni alaleeryi akina yeeyo mureherenryaanyu. (Masi. 27:17) Mutoroke wakhala wi masu anyu oohulela hanakumiha mphurelo.