Mpharihele Efolyeto “Mapaceryiho a Masu a Muluku”—Wi Mpaceryihe Ovaanela
1. Ekaruma taani evyaani naakhenlaahu wa orummwa?
1 Efolyeto “Mapaceryiho a Masu a Muluku” yookhalano miselo seiho sinaphwanyeya o makupa oopacerya a Piipiliya muvyaani Tradução do Novo Mundo. Nnii nipharihele hai ekaruma ela evyaani vaavaa nnarehereryaahu mapaceryiho mu orummwa? Nikupa nenla na soorepa iri vathi va miyaha sa Piipiliya, inalikana ni mukhalelo wa liivuru Raciocínios, inahaala onikhaviherya opaceryiha ovaanela.
2. Nnii nipharihele hai “Mapaceryiho a Masu a Muluku” mu orummwa?
2 Nyuwaano akhweya mpharihele nikoho 8 nave muloce: “Hiyaano nnapaka oxekurya wa waakuveya wa amwaacamani nthowa nawi achu ancipale annakoha, ‘Muluku tonatannya makacamiho a achu?’ [Mu ikulucu ikina, ti wa mphurelo omooniha namakhala nikoho nene.] Tuuvi ori moonelo anyu? [Nweherye naakhulo.] Piipiliya onnavaha naakhulo noohakalaliha wa nikoho nenla.” Mwaalakhanye nave muthokororye orweela Mpiipiliyani eversikulu emoha naari piili iromoliwe. Wakhala wi namakhala ohooniherya nchuno, munaphwanela omooniha owo makoho 20 anaphwanyeya mu efolyeto nave mumveke wi athanle nimoha wi muthokororye mu oxekurya woocharela. Naari wi munaphwanela omvaha yoolaleeryiwa ahu yoohuserya erino sooleeliherya sincipale wa mwaha mmanlaanyu othokororya.
3. Nnii nipharihele hai “Mapaceryiho a Masu a Muluku” wi nipaceryihe ovaanela mu ikulucu weiwo achu anapaka makupa a malapelo ehiri Eekiristu?
3 Makoho 4 ni 13 ophiyerya 17 enanwerya onikhaviherya vaavaa nnalaleeryaahu mu ikulucu weiwo achu anapaka makupa a malapelo ehiri Eekiristu. Ntoko yootakiherya, akhweya mpharihele sooleeliherya sinarweela va nikoho 17 nave muloce: “Nnaaxekurya achu mwawaakuveya. Nyuwaano munneemererya wi olelo imusi sinnahoolela makacamiho mancipale? [Nweherye naakhulo.] Atheli ancipale annaphwanya nikhaviheryo mmasu ala a miruku: “Muthiana owo upuweleke wi amoveke mulopwana.” [Nyuwaano hamunaphwanela oloca wi ela enarweela mu Aefeso 5:33. Wakhala wi munaloca ni muthiyana, nyuwaano akhweya muloce masu a Aefeso 5:28.] Munuupuwela wi opharihela nlakiheryo nenla nnahaala okhaviherya mu othela?”
4. Tiheeni munaphwanelaanyu weera omakuchuwelo wa ovaanela wanyu ni muchu onapaka makupa a malapelo ehiri Eekiristu?
4 Omakuchuwelo wa ovaanela wanyu, mpake marehereryo wi mutitelele othokororya mu elukuluku ekina. Akhweya mwiirehererye wi muloce yoorepa ekina enarweela mu nikoho mpankaanyu. Mmukhalelo waphaama, muhiye wi namakhala asuwele wi mwaha munathokororyaanyu onarweela Mpiipiliyani. Mwaha anyu mwiiwananihe ni moonelo wa muchu ni wa Piipiliya. mumvahe yoolaleeryiwa munoonaanyu wi ennaphariheleya ni namakhala owo.—Moone sawaacererya mu Orummwa Wahu wa Omwene Tesempuru a 2013.