“Wathukumanye Atxhu”
1. Mithukumano sa miceche ni mithukumano sa ilapo soohiyana inaphwanaphwana hai ni muthukumano wa a Isarayeli elukuluku vakhaani emanle okhuma o Yiikuputu?
1 Elukuluku vakhaani emanle okhuma o Yiikuputu, Yehova aamuleela Moose ariki “wathukumanye Atxhu”.va Mwaako Sinai wi ewiriyane masu a Yehova wi emooveke Yoowo ni waahusiha anamwane aya iphiro sa Yehova. (Malam. 4:10-13, Bibiliya Nsu na Muluku.) Ninnaweherya elukuluku yavameekhaaya ni yoolipiha! Mu miyeeri vakhaani inacharela, achu a Yehova anahaala ophwanyeya o muthukumano wa muceche ni muthukumano wa ilapo soohiyana wi ehusihiwe ni Yehova. Tiheeni nnaphwanelaahu weera wi niphure vancipale?
2. Ti heeni nnaphwanelaahu weera wi nikhale “ooreheryeya” wa muthukumano wa muceche ahu?
2 Khalani Ooreheryeya: Yehova aahaaleela Aisarayeli wi ekhale ooreheryeya wi ethukumane o Mwaako Sinai. (Muk. 19:10, 11) Moolikana, onakhweleya wi oothene anahaala oya omithukumano yiirehererye phaama, ohiya pahiru wa yaale anahaala okhalano makupa mu eprokrama. Ntoko yootakiherya, ancipale anahaala ochuna oveka wiichuuwa omutekoni waya. Akhweya mukhalelo anyu ori woolikana ni wa Nehemiya. Owo aachuna ohiya muteko awe ntoko mutokweene a akoopho a viinyu a mwene Artaxerxes wi aye o Yerusalemu wi areherye ixiri, nyenya owo aasuwela wi mwene hi eemererye. Nehemiya aapaka nivekelo nave moolipa murima aaveleela yooveka awe. Mwene aaheemererya wi apwahe nave tho aakhaviherya muteko wa oteka ixiri! (Neh. 2:1-9) Ohiya pahiru oveka wiichuuwa wa patarau anyu, nyuwaano moorehererya mukwaha anyu ni nipuro na okona? Asitokweene a muloko anahaala ohakalala omukhaviherya yoowo onahaala ochuna nikhaviheryo. Mwiirehererye wi mwaakuvele ophiya wa nikupa noothene nave okhala ooreheryeya “othokororasha hiho” munahaalaanyu owiriyana.—Ahe. 2:1.
3. Tiheeni enahaala onikhaviherya orehererya murima ahu wa eprokrama?
3 Makupa makina a wiirehererya wahu onavolowela orehererya murima ahu wi niwiriyane ni ohuserya. (Esd. 7:10) Eprokrama ya muthukumano wa muceche enahaala oheliwa mu site jw.org nave inahaala ophwanyeya miru sa miyaha soothene ni yoorepela emoha naari piili ya khata mwaha. Eyo enahaala onivaha miyaha saphaama sa othokororya mu ohiyu wa malapelo eechoko mu isumana ohaakumve muthukumano wa muceche. Alaleeryi akina annakumiha eprokrama yeeyo wi erepeleke iponto sookhweleya variyari va muthukumano wa muceche.
4. Ti mwawiihai asitiithi anahaalaaya opharihela muthukumano wa muceche wi yaahusihe anamwane aya?
4 Mwaahusihe Anamwane Anyu: Yoolakelela emoha ya muthukumano va Mwaako Sinai yaari wi asitiithi a Isarayeli ‘yahusihe anàya.’ (Malam. 4:10) Muthukumano wa muceche onnaavaha asitiithi ekari yaphaama ya weerano emohamoha. Asitiithi anaphwanela okiraathi vamoha ni anamwane aya variyari va makupa ni waakhaviherya awo okhala oowiriyana. Omakuchuwelo wa khata nihiku ni omakuchuwelo wa malapelo eechoko, emusi poti othokororya vamoha eprokrama.
5. Nnahaala ophura hai moorweela wa ophwanyeya mmuthukumano wa muceche onoorwa?
5 Muthukumano o Mwaako Sinai waahaakhaviherya Aisarayeli othamalela ekari aya yavameekhaaya ya okhala achu a Muluku. (Malam. 4:7, 8) Muthukumano ahu wa muceche onoorwa orehereryiwe wi onikhaviherye mmukhalelo woolikana. Mmahiku mararu nnahaala owerya okhuma mu ntakhwa noonanara na elapo ya Satana nave opuha wiichuuwa woomunepani ni waaceererya waataana wahu mparataiso oomunepani. (Yes. 35:7-9) Ni waacamela wa nihiku na Yehova, nihicompele ekari yeela yaphaama ya othukumana vamoha wi nuupuwelelane mukina ni mukhwaawe!—Ahe. 10:24, 25.