Eviitiyu Evyaani ya Opaceryiha Soohuserya sa Piipiliya

Eviitiyu yawaakuveya erino muru “Ntakhara Heeni Omuhuserya Piipiliya?” ennaaphiyerya achu ancipale mu jw.org. Eviitiyu ela epakiwe wi yaaceenyerye achu arino nchuno wi yeemererye yoohuserya ya Piipiliya yamahaleene. Ela poti weemereryiwa mwa othanla “Peça um Estudo Bíblico” va epotau ya empa nari ekootiku QR (waakhula wawaakuveya) enaphwanyeya oculi wa itrataato sahu ivyaani. Va aakhalavo makhalelo makina a opharihela phaama eviitiyu.

• Vaavaa munapakaanyu ekwaha yooxekurya muloce wa namakhala: “Poti Kiwooniheeni eviitiyu yookhuveya enoneiha moota munahaalaanyu ophwanya maakhulo a makoho anyu a Mpiipiliyani?” Wakhala wi owo oheemererya, mmoonihe eviitiyu mu telefone anyu nari mu komputatore awe.

• Wakhala wi hiyaano noovaha etratato evyaani mu onamoona woohilakelela nari onamoona wa vanlakani, nithoonye ekootiku QR nave nimuceenyerye muchu wi apharihele mu telefone awe. Nthowa na ilocelo sincipale mu ekootiku QR enakeriha mu eviitiyu mu site ahu, ti wooweryeya woona eviitiyu mmupharihelaka telefone anyu.

• Mwaaleele asinthamwene oomutekoni, ooxikola, asuweli nari akina vooloca sa eviitiyu, nave mwiivahe wi nwoonihe awo. Mwaarepele e-mail vamoha ni eviitiyu, nave mwaawope wi yoone mu telefone mwaya.

Moorweela wa opharihela mukhalelo ola muvyaani, nnanwerya opaceryiha soohuserya sa Piipiliya, okhaviherya makupa oomunepani a “othene yawo yiyatheryiwe khuluwi wukumini wohimala.”​—Saweriwa Tarummwa 13:48.