Makoho Aakhuliwe

◼ Tiheeni anamwane anaphwanelaaya ohuserya wi yinnuwe omunepani?

Asitiithi Eekiristu anniilipixerya vancipale wi yaaruuhele anamwane aya “maphuwelo ni mathoriheryo a Apwiya.” (Aef. 6:4) Ntoko yootakiherya, asitiithi annaphwanya mphurelo othokororya yoorepa ya nihiku ni anamwane aya khata wooxixelo. Variyari va malapelo a eechoko ni ilukuluku ikina, imusi poti woona ni othokororya vamoha iviitiyu, oloca miyaha sookhweleya inarweela mu Jovens Perguntam, wooniherya yaweereya ya mpiipiliyani, nari okhalano makupa oophara muteko. Mwawiihiiha, vakina vaya wi anamwane ‘echareke otokwene,’ awootho poti ohusihiwa iparipari sawiiseela sa Piipiliya.​—Ahe. 6:1.

Muthokororye yeeyo nnaahusihaahu yaale nnaaphwanyaahu mu ekulucu ahu. Mmasu oopacerya nari mu oxekurya, hiyaano chiryene ninniilipixerya wi nipaceryihe yoohuserya ya Piipiliya nimpharihelaka Piipiliya Onahusiha Eheeni Chiryene? Namala othokororya yoolaleeryiwa yeela, hiyaano ninnampharihela “Mantenha-se no Amor de Deus.” Ntakhara heeni? Piipiliya Onahusiha Eheeni onaavaha oohuserya mathipelo a mahusiheryo a soorempwa. Liivuru “Amor de Deus” onaahusiha awo moota wa opharihela malakiheryo a Piipiliya mahiku oothene a okumi aya. Othokororya soolaleeryiwa soopiili ennaakhaviherya avyaani wi ‘yeche’ mwa Kiristu ni “awitikitherya mu nroromelo.” (Akol. 2:6, 7) Soolaleeryiwa seiya hisahaala tho waakhaviherya anamwane ahu? Anamwane tho annachuna ohusihiwa vooloca sa woopola, Omwene, ni mukhalelo wa alipa ookhwa. Awo tho annachuna osuwela ntakhara heeni Muluku onneemererya makacamiho ni moota wa osuwela mahiku ookuchula a mukhalelo yoola wa ichu. Awo tho anaphwanela okhala oolekecheya wi Anamoona a Yehova aakhalano eparipari. Anamwane annachuna wi yiiwexexe malakiheryo a Piipiliya ni ovyakiha “masuwelelo aya.” (Ahe. 5:14) Chiryene, asitiithi anaphwanela othokororya iyaakha ni mukhalelo wa osuwela wa anamwane aya. Mwawiihiiha, anamwane ancipale aakhalano owerya wi epacerye ohuserya iparipari sawiiseela sa Piipiliya naamwi eri akhaani.​—Luka 2:42, 46, 47.

Wi yaakhaviherye asitiithi, soohoolela sa soohuserya inarweela mu Liivuru Piipiliya Onahusiha Eheeni. Inahaala ophwanyeyaka mu jw.org. Imusi inanwerya ophwanya seiyo mu Web site ahu moorweela wa oweha vathi va ENSINOS BÍBLICOS > ADOLESCENTES. Omwaahiyu, soohoolela sa soohuserya inahaala orehereryiwa irweelaka mu Liivuru “Amor de Deus”. Chiryene, makupa ookumihiwa a liivuru yaala poti tho ophariheliwa muteko. Asitiithi anaphwanela olakelela yeeyo anahaalaaya opharihela muteko variyari va malapelo aya a echoko, vaavaa aneecihaaya yoohuserya ni khata mwaana, nari vaavaa anamvyakihaaya mwaana wi apake yoohuserya ya muchu mukhateiye.