Mukhalelo wa Waakhaviherya Yaale Arino Makacamiho a Waalakhanya
1. Nikacamiho taani nnarweela wa waahusiha Piipiliya yaale arino makacamiho a waalakhanya?
1 Anamakhala yaawo arino makacamiho a waalakhanya ananwerya osiveliwa ni ichu soomunepani, nyenya awo ananwerya omoova Piipiliya ni aliivuru akina. Waavaha liivuru Piipiliya Onahusiha Eheeni Chiryene, woopaceryani, hokumiherya mphurelo. Nnii naakhaviherya hai omunepani? Hiyaano naahaakoha alaleeryi oovyaka a ilapo 20 soohiyana vooloca sa yeeyo aneeraaya. Sinnacharela sooleeliherya saya.
2. Ikaruma taani siri soophwanelela waakhaviherya yaale arino makacamiho a waalakhanya?
2 Wakhala wi namahuserya hanaalakhanya phaama naari hanasuwela waalakhanya, ti yaphaama opaceryiha ni eproxura, Mmuwiriyane Muluku, naari Mmuwiriyane Muluku nave Mukhale Okhala Wookhala. Piyoneero mmoha a Estados Unidos onnamooniha namakhala iproxura soopiili nave onnamukoha teevi yahaala omusivela. Efiliyale ya Keniya yoolokoha wi ikaruma seiya sinnakumiherya mphurelo waphaama nthowa na wi mu ilapo sa Afrika, achu anahusihiwa orweela wa oleeliwa ohiya othokororya wa okoha ni waakhula. Muchu oohuserya mookhweya onnawerya waalakhanya ni waakhula, nyenya mukhalelo yoola onanwerya omweeriha muchu ohusenrye vakhaani okhala awuukhuwa. Wakhala wi namakhala onnaalakhanya vakhaani, alaleeryi ancipale annasiveliwa opaceryiha ni eproxura Michaka Yaphaama Yoorweela Wa Muluku! naari Munanwerya Okhala Nthamwene a Muluku! naari akhweya Liivuru Aka a Myaha sa Piipiliya.
3. Sooleeliherya taani vooloca sa yaale ahinawerya waalakhanya inahaala onikhaviherya okhala a mphurelo wa waahusiha yaawo?
3 Othamalela: Yaale ahihusenrye waalakhanya ananwerya okhala awuukhuwa, nave ancipale hanisoona okhala echu. Waakhaviherya yaawo okhala oohuukhuwa echu yoopacerya wi naahusihe eparipari. Achu ancipale yaawo ahinawerya waalakhanya toovyaka nave aakhalano owerya wa ohuserya. Nwooniherye yaawo ncicimiho ntokweene, nave mwaakhalihe moophwanelela. (1 Pet. 3:15) Awo anahaala oceenyereya otitelela ohuserya wakhala wi annoona wi wiilipixerya waya ti waphaama nave wi annaya vahoolo omunepani. Mwawiihiiha khalani awaathamalela.
4. Nnii naaceenyerye hai yaale ahinaalakhanya phaama wiirehererya wa yoohuserya?
4 Naamwi namahuserya ahaalakhanyaka phaama, mmuceenyere wi areherereke yoohuserya awe. Alaleeryi akina a Afrika do Sul onnaaceenyerya oohuserya aya wi emvekeke muchu a echoko naari nthamwene yoowo onawerya waalakhanya phaama wi yaakhaviherye anamahuserya. Mulaleeryi mmoha a Kra-Pretanya onnaaceenyerya anamahuserya awe orweela wa waahiya awo wi empharihele liivuru awe iparakrafo vakhaani variyari va yoohuserya wi ewerye woona okhweya waya ophwanya maakhulo wakhala wi awo aaheliwa eneneero. Munna mmoha a Indiya onnaaceenyerya oohuserya awe woona ni wuupuwelela iruku wi ethokororye mu esumana enacharela.
5. Nnii nooniherye hai opixa-murima vaavaa nneecihaahu yoohuserya?
5 Khalani Oopixa Murima: Moohipwacha yoolaleeryiwa yeeyo munapharihelaanyu, mvuwihe miyaha soochuneya, nave mwaakhaviherye oohuserya anyu wiiwexexa phaama. Omapacereryo othokororya wa aminutu 10 ophiyerya 15 ti waphaama. Muheererye othokororya miyaha sawaaca, pahiru iparakrafo vakhaani mu yoohuserya. Mukhale oopixa-murima wakhala wi namahuserya onaalakhanya mwawaapasiha. Owo onahaala oceenyereya wunnuwiha mavyakelo awe a waalakhanya vaavaa onaaceereryeiye othamalela wa Yehova. Wi nimukhaviherye oohuserya ahu, ti waphaama onwopa oya omithukumano ovinyerya omapacereryo.
6. Nnii niwerye hai waakhaviherya achu ohuserya waalakhanya?
6 Wakhala wi oohuserya a Piipiliya aasuwela waalakhanya, awo anahaala oya vahoolo omunepani mwawaakuveya. (Sal. 1:1-3) Ancipale ahaakhaviherya oohuserya aya orweela wa opharihela yoolaleeryiwa Thokororyani Ohuserya Walakhanya ni Orepa aminutu vakhaani omakuchuwelo wa yoohuserya. Wakhala wi namahuserya onnaceecheya, akhweya nyuwaano munanwerya oteka ororomela wawe moorweela wa omuleela ichu seiyo aawenreiye ohuserya mukhalelo wa weerano. Mmulipihe wi Yehova onahaala oreeliha wiilipixerya wawe, nave mmuceenyerye wi avekeleke avekaka nikhaviheryo. (Masi. 16:3; 1 Yohane 5:14, 15) Alaleeryi akina a Kra–Pretanya annaalipiha oohuserya aya otikitherya soolakelela soophimelela ni sooya vahoolo—akhweya opacerya osuwela iletra, waavya ni waalakhanya soorepa ithanliwe, nave wookuchulani waalakhanya soolaleeryiwa sa Piipiliya sookhweya. Waakhaviherya achu waalakhanya wiiliwiili onaphitaanyerya waaceenyerya awo ochuna weerano yeeyo, ohiya pahiru waahusiha mukhalelo wa weerano.
7. Ntakhara heeni hannaphwanela woovelela waaleela eparipari yaale arino makacamiho a waalakhanya?
7 Yehova hanaanyoosa yaale ahihusenrye. (Yup. 34:19) Yehova onavarerya murima wa muchu.(1 Math. 28:9) Mwawiihiiha muhoovelele waaleela eparipari yaale arino makacamiho a waalakhanya. Nyuwaano mookhalano ikaruma sincipale munaweryaanyu opharihela. Moovira wa elukuluku, nyuwaano munanwerya okeriha yoohuserya mu liivuru Piipiliya Onahusiha Eheeni Chiryene ni omvaha owo wiiwexexa wawaacereryeya wa Soorepa.
[Yooleeliherya va epaaxina 4]
Yaale ahihusenrye waalakhanya ananwerya okhala awuukhuwa, nave ancipale hanisoona okhala echu. Waakhaviherya yaawo okhala oohuukhuwa echu yoopacerya wi naahusihe eparipari
[Ekaaxa va epaaxina 4]
Wakhala wi namakhala hanawerya waalakhanya mweerere ela:
• Woopaceryani mpharihele Mmuwiriyane Muluku, Mmuwiriyane Muluku nave Mukhale Okhala Wookhala, naari yoolaleeryiwa ekina yoophwanelela.
• Mmukhalihe moophwanelela, nave mmuthamalele.
•Othokororya okhale wawaakuveya, nave muheererye othokororya miyaha sawaaca.
• Mmukhaviherye wunnuwiha mavyakelo awe a waalakhanya.
Vaavaa onooniheryeiye othamalela eparipari ni ochuna ohuserya, nyuwaano munanwerya okeriha yoohuserya mu liivuru Piipiliya Onahusiha Eheeni Chiryene.
[Epaaxina Ohirivo Echu 5, 6]