Kuxani Yootakiherya ya Alipa Miririmo—Sofoniya
1. Sofoniya arumeenle mmukhalelo taani ntoko mulipa a miririmu nave ti mwawiihai oreiye yootakiherya yaphaama wa hiyo olelo?
1 Yaari emeya ya eseekulo ya neethanu napiili E.E.K. nave malapelo a Paala yaari awunlaana o Yuuteya. Mwene oonanara Amooni aammalaru okhwa, nave Mwene mmiravo Yosiya analamulela. (2 Math. 33:21–34:1) Variyari va elukuluku yeeyo, Yehova aamuthanla Sofoniya wi alokohe michaka sawe soothoriha. Naamwi Sofoniya aari a nihimo na ahooleli a Yuuteya, owo haakhunwe michaka sa othoriha wa Yehova wa ahooleli a Yuuteya. (Sof. 1:1; 3:1-4) Moophwanaphwana, ninniilipixerya wi ntakiherye olipa murima wa Sofoniya ni oheemererya wi amusi evolowele moonanara malapelo ahu a Yehova. (Mat. 10:34-37) Michaka taani Sofoniya aalaleeryeiye, nave ni yookhumelela taani?
2. Tiheeni nnaphwanelaahu weera wi nivuluxiwe mu nihiku na esara ya Yehova?
2 Mmwaavye Yehova: Yehova Pahiru tonahaala waavuluxa achu mu nihiku na esara awe. Mwawiihiiha, Sofoniya aahaalopola achu a Yuuteya wi emwaavye Yehova, yaavye ekhaikhai, nave yaavye wiichacala, elukuluku ehaakumve omala. (Sof. 2:2, 3) Emohamoha enneereya mmahiku ahu. Ntoko Sofoniya, hiyaano ninnaaceenyerya achu wi emwaavye Yehova, nyenya tho nnaphwanela weeravo echu, olakelela osepa ‘ohiwiwelela Apwiya.’ (Sof. 1:6, Bibiliya Nsu na Muluku) Opwaha yeeyo, hiyaano ninnamwaavya Yehova moorweela wa ohuserya mwa ephoole Masu awe ni oveka ohoolela wawe. Hiyaano ninnaavya ekhaikhai moorweela wa okhalano meecelo ookumi aphaama. Hiyaano ninnaavya wiichacala moorweela wa okhalano moonelo wa wiiwelela ni waakhulela mwawaakuveya ohoolela onarweela mmarehereryo a Yehova.
3. Ntakhara heeni nnaphwanelaahu okhalano moonelo waphaama mu orummwa?
3 Sookhumelela Saphaama: Michaka sa othoriha wa Sofoniya waakumiherya mphurelo waphaama wa achu vakhaani a Yuuteya, xaxaxa wa mmiravo Yosiya, yoowo aapacenrye omwaavya Yehova vaavaa aareiye mmiravo. Vahoolo vaya Yosiya aapaka mukipici mutokotoko wa otoloxa malapelo a soophwaniherya mu elapo. (2 Math. 34:2-5) Olelo, naamwi mmiso wa Omwene omorelaka mphironi, mmalukuni, naari mmiiwani, mukina tho onnamorela mu echaya yaphaama nave onniimiha sawiima. (Mat. 13:18-23) Hiyaano ninnaroromela wi Yehova onahaala otitelela oreeliha wiilipiherya wahu vaavaa nnakhalaahu ooweiwa nimisaka mmiso wa Omwene.—Sal. 126:6.
4. Ntakhara heeni nnaphwanelaahu onweherya Yehova?
4 Akina o Yuuteya yoona wi Yehova haahaala weeravo echu. Nyenya Yehova aahaaroromeliha oothene wi nihiku nawe ntokotoko naari vakhiviru. (Sof. 1:12, 14) Ovuluxa waahaala okhala pahiru wa yaale yaachawela mwa yoowo. (Sof. 3:12, 17) Vaavaa ‘nnanweheryahu’ Yehova, nnanwerya ophwanya ohakalala mu omurumeela mwawiiwanana vamoha ni alapeli a Muluku ahu mutokotoko!—Sof. 3:8, 9, BNM.