Kiniisooneiha hai wa Yehova?
1. Piipiliya onalikana ni eweheryo mwawiihai?
1 Muniivarerya ikwaha hai va eweheryo? Ancipale a hiyo anneerano mahiku oothene nthowa nawi eyo ennaakhaviherya woona mukhalelo wa omuchu ayu wa vaate onachuneya orehererya. Piipiliya onalikanyihiwa ni eweheryo. Waalakhanya Masu a Muluku annanikhaviherya wiiweha wi noone omuchu ahu wampuwa, muchu yoowo Yehova onamooneiye. (1 Sam. 16:7; Yak. 1:22-24) Masu a Muluku ananwerya ‘orórihasha sawanyiherya ni sawupuwelela sa murima’. (Ahe. 4:12) Nnii niwerye hai omwaalakhanya ni omuupuwelela Piipiliya mahiku oothene wi anikhaviherye woona makupa yaawo nnaphwanelaahu olipiha wi nikhale alaleeryi a mphurelo?—Sal. 1:1-3.
2. Piipiliya onii anikhaviherye hai wiisaalikhela mukhatiihu?
2 Mmupharihele Piipiliya ntoko eweheryo: Saweereya sa Piipiliya sa akapuro ororomeleya a Yehova sinnanihusiha mikhalelo siri saphaamaxa wa yoowo. Ntoko yootakiherya, Tavite aahooniherya mvai mu nsina na Yehova. (1 Sam. 17:45, 46) Yesaya moolipa murima aahiivaha olaleerya mu ekulucu yookacamiha. (Yes. 6:8, 9) Osivela otokotoko Yesu aareiyeno wa Atiithi awe a wirimu waamweeriha woona orummwa ntoko ehime ya olipiha ni ohakalala, ohiya ntoko murici woolimela. (Yoh. 4:34) Akiristu a nsana noopacerya yaalaleerya ni mvai, yaamuroromela Yehova, nave yaalakelela ohimaala. (Saw. 5:41, 42; 2 Akor. 4:1; 2 Tim. 4:17) Wuupuwelela sootakiherya seiya sinnanikhaviherya wiivarerya mukhatiihu ni yoolakelela ya orehererya mukhalelo wa muteko ahu waweela.
3. Ntakhara heeni hinnaphwanela olekela opaka matorokelo oochuneya?
3 Mweerevo echu wi murehererye soohesa: Chiryene, tahi yaphaama wiiweha va eweheryo nave nihipwacha yooheseya. Hiyaano nnanwerya omveka Yehova wi anikhaviherye wiivarerya mukhatiihu mwaphaama ni opaka matorokelo oochuneya. (Sal. 139:23, 24; Luka 11:13) Woona wi enahala elukuluku vakhaani nave ikumi sa achu sinnavoloweliwa, hinnaphwanela olekela opaka matorokelo oochuneya.—1 Akor. 7:29; 1 Tim. 4:16.
4. Tiheeni enahaala weererya wakhala wi muchu onnaalakhanya Masu a Muluku avinyaka eeravo echu wi arehererye yeeyo oonneiye?
4 Omuchu wampuwa—ti yoowo Yehova onathokororyeiye—ori wookhweleyaxa vancipale opwaha omuchu wa vaate. (1 Pet. 3:3,4) Tiheeni enahaala weereya wakhala wi muchu onnaalakhanya Masu a Muluku avinyaka eeravo echu wi arehererye yeeyo onneiye? Owo ‘hanakhala mulipa-wiwa óchiwala, nyenya awerano muteko, onarwa-akhala órela mu werano wawe.’ (Yak. 1:25) Aai, nnahaala okhala oohakalala ni a mphurelo mu orummwa nthowa nawi “ninnoneya ntoko vayisonani ovuwa wa Apwiya.”—2 Akor. 3:18, Bibiliya Nsu na Muluku.