Mumphariheleke Piipiliya ntoko espeelyu

Oohuserya Tiyaku aahimulikanyiha Piipiliya ni espeelyu wi anikhaviherye woona omuchu ahu weeparipari. (Tiy. 1:22-25) Nni nimpharihele hai Pipiliya ntoko espeelyu mmukhalelo woophwanelela?

Mmwaalakhanyeke mweephoole. Wakhala wi niiwenhe mwawaakuveya va espeelyu, akhweya haniwerya woona mukhalelo nryaahu. Mmukhalelo mmohamoha, wakhala wi nnamwaalakhanya Piipiliya mwawaakuveya, haniwerya woona mikhalelo sahu soonanara sa mpuwa seiyo onahaala okhala woochuneya opaka matorokelo. Mwa yeeyo, ti woochuneya omwaalakhanyaka Piipiliya mweephoole ni mwawiichaalela.

Mutikitheryeye wa nyuwo mmakupa yaawo onachuneya opaka matorokelo ohiya wa akina. Vakina vaya, vaavaa nniiwehaahu va espeelyu, nnanwerya wuupuwela mukhalelo akina anooneyaaya, nave nnanwerya otikitheryeya wa makupa aya ahireenre. Moolikana tho, eyo enneereya vaavaa nnamwalakhanyaahu Piipiliya nuupuwelaka soohesa sa akina. Eyo henikhaviherya orehererya makupa ahu ooheseya.

Mukhale oophimelela. Wakhala wi noohiiweha va espeelyu nave ntikitheryeya pahiru wa yeeyo ehinisivenle, nnanwerya oceecheya. Vaavaa nnamwaalakhanyaahu Piipiliya nnaphwanela okhala oophimelela, hinnaphwanela oweheryaka sincipale wa hiyaano opwaha yeeyo Yehova onaweheryeiye.—Tiy. 3:17.