Yoochariha ya Exikola ya Orummwa Woomuluku ya 2015.

¹ Oomurepa Salmo Tavite aaloca: “Masu a m’wano mwaka ni sawupuwelela sa m’murima mwaka semyeryeryeye va mithoni vanyu, Yehova, mwala aka, ni ókopola aka.” (Sal. 19:14) Ntoko Tavite, nnachuna wi masu ahu emucicimihe Yehova, nave ninnathamalela ekari ahu ya oloca eparipari mmulokoni ni mu orummwa. Exikola ya Orummwa Woomuluku echu Yehova onaphariheleiye wi anvyakihe mu orummwa. Mavyakiheryo yaala aneereya omakuchuwelo wa esumana eri yoothene opwaha miloko 111.000 orukurerya elapo yoothene. Ela ennaakhaviherya anna ni arokora a elapo yoothene ni a mukhalelo woothene wa okumi okhala oophwanelela ntoko alaleeryi a michaka yaphaama, wi ewerye ohusiha mookwakwaleya, mwa ncicimiho, ni mweepewe.​—Saw. 19:8; Akol. 4:6.

² Yoochariha ya exikola ya 2015 enahaala ophitaanyerya miyaha inarweela mu efolyeto Mapaceryiho a Masu a Muluku hiiha ntoko miyaha sinarweela mu liivuru Piipiliya Onahusiha Eheeni ni Osivela wa Muluku. Mwawaacererya, aapakiwa matorokelo vooloca sa elukuluku ya Waalakhanyiwa wa Piipiliya ni mwaha No. 1. Matorokelo ala vamoha ni mukhalelo anahaalaaya operekhiwaka makupa a exikola ennathokororyiwa mu iparakrafo inacharela.

³ Waalakhanyiwa wa Piipiliya: Anna anahaala ovahiwaka makupa yaala, anahaala okhalakano aminutu apiili wi ethokororye yoorepa emoha yamphurelo aphwannyaaya mu waalakhanyiwa wa Piipiliya wa esumana. Wiirehererya phaama onahaala okhala wa mphurelo wi nuuke miyaha soochuneya ni muloko nihivirelenle elukuluku. Mwa yeela, anna anahaala okhalano aminutu thanu nammoha wi evahe sooloca saya sa asekunto 30 naari vakhaani wa miyaha soochuneya aphwannyaaya mu omwaalakhanya waya Piipiliya variyari va esumana. Onachuneya wiirehererya ni okhala oophimelela wi mvahe sooloca sanyu sa mphurelo mu asekunto 30, nyenya weerano yeeyo mavyakiheryo aphaama wa hiyaano. Eyo tho enahaala weeriha wi akina evahe sooloca saya sa yeeyo ahusenryaaya mu otholathola waya.

⁴ Mwaha No. 1: Elukuluku yaavahiwe ya omwaalakhanya Piipiliya yookukuciwa wa aminutu araru naari vakhaani, nave enahaala waalakhanyiwaka emeya ya epaaxina ya Piipiliya. Yaawo anaakhela mwaha yoola anaphwanela wiivyakiha phaama wi yaalakhanye mu elukuluku elociwe nave tho wi yaalakhanye mwawiiwexexeya. Akapuro oothene a Yehova anaphwanela wiilipixerya wi yaalakhanyeke phaama, woona wi waalakhanya makupa oochuneya a mathamalelo ahu. Ninnahakalala osuwela wi anamwane ahu ancipale annaalakhanya phaama, nave asitiithi annaceenyeryiwa wi yaakhaviherye moosivela anamwane aya waalakhanya phaama.

⁵ Mwaha No. 2: Ola onahaala operekhiwaka ni murokora mu aminutu athanu. Muru wa mwaha onaphwanela othokororyiwa. Wakhala wi mwaha onarweela mu efolyeto Mapaceryiho a Masu a Muluku, enaphwanela operekhiwa ntoko makhalelo a olaleerya ari a mphurelo mu ekulucu. Wakhala wi mwaha onarweela mu liivuru Piipiliya Onahusiha Eheeni, onaphwanela othokororyiwa mukhalelo wa olaleerya oniiwanana ni ekulucu ya vanipuroni. Wakhala wi mwaha onarweela mu liivuru Osivela wa Muluku, oohuserya onaphwanela ovuwiha mwaha othanliwe, nave athanle soorepa soophwanelela wi apharihele muteko, ni wooniherya ti mwawiihai ikano sa Piipiliya inaphariheleyaaya mu okumi Weekiristu. Soorepa sawaaceererya inaphwanela othokororyiwa. Ooweherya exikola onahaala omuthanla mukhaviheryi awe.

⁶ Mwaha No. 3: Ola onahaala operekhiwaka ni munna naari murokora mu aminutu athanu. Wakhala wi murokora tovahiwe nikupa nla, nnaphwanela operekhiwa ntoko elociwaaya va Mwaha No. 2. Wakhala wi ovahiwe munna, onaphwanela operekhiwa ntoko mwaha, awuupuwelaka alipa oowiriyana mu Empa ya Omwene.

⁷ Mukhalelo Muvyaani wa Mwaha No. 3 Onahaala Ovahiwaka Anna: Wakhala wi mwaha onarweela mu efolyeto Mapaceryiho a Masu a Muluku, onaphwanela operekhiwa ntoko yawooniherya ya malapelo a echoko naari muteko wa mmacani. Ntoko yookhovelela, ooweherya a exikola onahaala omuthanla mukhaviheryi ni mukhalelo wa operekha. Mukhaviheryi onaphwanela okhala muhima a oohuserya naari munna a mmulokoni. Soorepa sawaaceererya inavuwiha nlakiheryo na Piipiliya inaphwanela othokororyiwa mu yawooniherya. Elukuluku ni elukuluku mutokweene onahaala orummwaka wi apake makupa yaala. Mutokweene onahaala omuthanla mukhaviheryi awe vamoha ni mukhalelo wa operekha. Moohikhwa minikwa, ela enahaala okhala yoolipiha muloko owoona atokweene yooniheryaka makhalelo a ohusiha ni achu a echoko awe naari anna akina.

⁸ Ekano: Ooweherya a exikola onahaala waamaliha aminutu apiili vaavaa oohuserya ori oothene onamaleiye operekha nikupa nawe wi avahe masu oolipiha hiiha ntoko miruku enarweela mu liivuru Beneficie-se da Escola do Ministério Teocrático. Vaavaa ooweherya a exikola onapaceriheiye nikupa na oohuserya, tahi woochuneya oromola yoohuserya owo onaphwaneleiye waakhwaniherya. Omakuchuwelo wa mwaha ori woothene oweherya a exikola onahaala oloca masu oophwanelela yaawo owo aakhwanihenryeiye, alocaka mookwakwaleya mukhalelo oohuserya operenkheiye mwaha yoole, naari wooniherya ntakhara heeni ti yamphurelo wa oohuserya othokororya phaama mwaha yoowo.

⁹ Ntoko yaawuupuxerya, miruku sinavahiwa wa oohuserya ori oothene inaphwanela orweela mu liivuru Beneficie-se da Escola do Ministério Teocrático epaaxina 79-81. Naxikola ori oothene amanle okhwaaniherya makupa awe, ooweherya a exikola onahaala opaka soorepela soophwanelela mu liivuru a oohuserya nave amukohe wa vameekheiye wakhala wi owo oopaka muteko ori mu liivuru. Omuthamalela, hiiha ntoko masu ookhaviherya anaphwanela ovahiwa oohuserya elukuluku ekina imanle mithukumano. Omuthokororya oohuserya ori oothene onaphwanela wooniwa ntoko ekari ya omukhaviherya wunnuwa omunepani.​—1 Tim. 4:15.

¹⁰ Wakhala wi oohuserya oovirelela elukuluku, oowerya a exikola naari mukhaviheryi onaphwanelela omvaha eneneeryo, ohiya onyakula naari omana echu wi ooniherye wi elukuluku awe yoomala, nyenya mmukhalelo woovitheya. Ohuserya onaphwanela woona eneneeryo nave amalihe mwaha awe ni avinyewo o palku.​—Mmoone liivuru Escola do Ministério Teocrático, epaax. 282, epar. 4.

¹¹ Oothene anaakhwaniherya soochuneya annaceenyeryiwa wi erempwe mu Exikola ya Orummwa Woomuluku. (Mmoone liivuru Escola do Ministério Teocrático, epaax. 282, epar. 6.) Mahusiheryo a liivuru yoola annaakhaviherya achu a Yehova wi eweryeke ohusiha michaka yaphaama ya Omwene ni olipa murima, ncicimiho, ni osivela. Moohikhwa minikwa Yehova onnacicimihiwa ni othamaleliwa wa oothene yaale anakumiha mphurelo wa mahusiheryo oomuluku!​—Sal. 148:12, 13; Yes. 50:4.

[Yooleeliherya va epaaxina 5]

Munnuwe omunepani moorweela wa weemererya ni opharihela ekano