Wiirehererya ti Woochuneya wi Nihusihe Moophwanelela

Mu ikwaha piili Yesu aapakeliwa nikoho nimohamoha vooloca sa ekumi yoohimala, nyenya mu ikwaha soothene owo aathokororya soothowa sa namakoha ti namakoha. (Luka 10:25-28; 18:18-20) Mwawiihiiha, naamwi nsuwenle phaama mwaha nnayaahu ohusiha, nnaphwanela wiirehererya woosiilo nimuupuwelaka yoole nnayaahu omuhusiha. Makupa taani anahaala omvila wiiwexexa naari weemererya? Soorepa taani siromoliwe kinaphwanelaaka waalakhanya? Kinaphwanela othokororya ophiyerya vaavi? Nnaphwanela orehererya niphwanaphwaniho, naari makoho a waaceererya wi nimukhaviherye oohuserya wiiwexexa phaama mahusiheryo. Mwawaaceererya, woona wi ti Yehova oneeriha wi mmiso wa eparipari wunnuwe mmurimani, nnaphwanela omveka Yehova wi anikhaviherye variyari va wiirehererya wahu, ni omukhaviherya oohuserya wunnuwa omunepani.​—1 Kor. 3:6; Tiy. 1:5.